Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 1 | |
1:1 См.: 🔗3Цар. 4:32 | Притчи Соломона сына Давидова, иже царствова во Израили, |
1:2 | познати премудрость и наказание и уразумети словеса мудрости, |
1:3 | прияти же извития словес и разрешения гаданий, уразумети же правду истинную и суд исправляти: |
1:4 | да даст незлобивым коварство, отрочати же юну чувство же и смысл. |
1:5 См.: 🔗Сир. 10:28 | Сих бо послушав, мудрый премудрее будет, а разумный строителство стяжет: |
1:6 | уразумеет же притчу и темное слово, речения же премудрых и гадания. |
1:7 | Начало премудрости страх Господень, разум же благ всем творящым его: благочестие же в Бога начало чувства, премудрость же и наказание нечестивии уничижат. |
1:8 | Слыши, сыне, наказание отца твоего и не отрини заветов матере твоея: |
1:9 См.: 🔗Прит. 4:9 🔗Сир. 6:32 | венец бо благодатей приимеши на твоем версе и гривну злату о твоей выи. |
1:10 См.: 🔗Прит. 4:14 | Сыне, да не прельстят тебе мужие нечестивии, ниже да восхощеши, |
1:11 См.: 🔗Иер. 5:26 🔗Мих. 7:2 | аще помолят тя, глаголюще: иди с нами, приобщися крове, скрыем же в землю мужа праведна неправедно: |
1:12 См.: 🔗Пс. 123:3 | пожрем же его якоже ад жива, и возмем память его от земли, |
1:13 | стяжание его многоценное приимем, исполним же домы нашя корыстей: |
1:14 | жребий же твой положи с нами: обще же влагалище стяжем вси, и мешец един да будет всем нам. |
1:15 См.: 🔗Пс. 1:1 | Не иди в путь с ними: уклони же ногу твою от стезь их: |
1:16 См.: 🔗Ис. 59:7 🔗Рим. 3:15 | нозе бо их на зло текут, и скори суть излияти кровь. |
1:17 | Не без правды бо простираются мрежи пернатым: |
1:18 См.: 🔗Мф. 26:16 | тии бо убийству приобщающеся, сокровищствуют себе злая: разрушение же мужей законопреступных зло. |
1:19 | Сии путие суть всех творящих беззаконная: нечестием бо свою душу отемлют. |
1:20 См.: 🔗Прит. 8:1 🔗Лк. 11:49 | Премудрость во исходех поется, в стогнах же дерзновение водит, |
1:21 См.: 🔗Прит. 8:3 | на краех же стен проповедуется, у врат же сильных приседит, во вратех же града дерзающи глаголет: |
1:22 | елико убо время незлобивии держатся правды, не постыдятся: безумнии же досады суще желателие, нечестивии бывше, возненавидеша чувство |
1:23 | и повинни быша обличением. Се, предложу вам моего дыхания речение, научу же вас моему словеси. |
1:24 | Понеже звах, и не послушасте, и простирах словеса, и не внимасте, |
1:25 | но отметасте моя советы и моим обличением не внимасте: |
1:26 См.: 🔗Втор. 28:63 🔗Иез. 21:17 | убо и аз вашей погибели посмеюся, порадуюся же, егда приидет вам пагуба, |
1:27 | и егда приидет на вы внезапу мятеж, низвращение же подобно бури приидет, или егда приидет вам печаль и градоразорение, или егда найдет на вы пагуба. |
1:28 См.: 🔗Ис. 1:15 🔗Иер. 11:11 | Будет бо егда призовете мя, аз же не послушаю вас: взыщут мене злии и не обрящут. |
1:29 См.: 🔗Прит. 1:24 🔗Деян. 13:40 | Возненавидеша бо премудрость, словесе же Господня не прияша: |
1:30 | ниже хотеша внимати моим советом, ругахуся же моим обличением. |
1:31 См.: 🔗Ис. 3:10 | Темже снедят своих путий плоды и своего нечестия насытятся: |
1:32 | ибо, зане обидеша младенцев, убиени будут, и истязание нечестивыя погубит. |
1:33 См.: 🔗Пс. 111:7 | Мене же слушаяй вселится на уповании и почиет без страха от всякаго зла. |