Книга пророка Исаии, глава 48

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 48
48:1 См.: 🔗Иер. 4:2	Услышите сия, доме Иаковль, прозваннии именем Израилевым и изшедшии из Иуды, кленущиися именем Господа Бога Израилева, поминающии не со истиною, ниже со правдою,
48:2 См.: 🔗Иер. 25:29 🔗Дан. 9:18 🔗Тит. 1:16	и придержащиися имени града святаго, и о Бозе Израилеве подтверждающиися: Господь Саваоф имя Ему.
48:3	Преждняя еще возвестих, и из уст Моих изыдоша, и слышано бысть: внезапу сотворих, и найде.
48:4 См.: 🔗2Пар. 30:8 🔗Иер. 5:3 🔗Иез. 2:4 🔗Иез. 3:7	Вем, яко жесток еси, и жила железна выя твоя, и чело твое медяно.
48:5	И возвестих ти, яже древле, прежде неже приити на тя: слышана тебе сотворих, да не когда речеши, яко идоли мне сия сотвориша, и не рцы, яко изваянная и слиянная заповедаша мне.
48:6	Слышасте вся, и вы не разуместе: но и слышана тебе сотворих новая отныне, яже имут быти:
48:7	и не рекл еси: ныне бывают, а не прежде, и не в преждния дни слышал еси сия: не рцы: ей, вем сия.
48:8 См.: 🔗Пс. 57:5 🔗Зах. 7:12	Не ведел еси, ниже разумел еси, ниже исперва отверзох ушеса твоя: ведех бо, яко отвергая отринеши и беззаконник еще от чрева прозовешися.
48:9 См.: 🔗Чис. 14:8 🔗Пс. 105:45	Имене Моего ради покажу ти ярость Мою, и славная Моя наведу на тя, да не потреблю тебе.
48:10 См.: 🔗Зах. 13:9 🔗Мал. 3:3 🔗1Пет. 1:7	Се, продах тя не сребра ради: изях же тя из пещи убожества.
48:11 См.: 🔗Ис. 42:8	Мене ради сотворю ти, яко Мое имя оскверняется, и славы Моея иному не дам.
48:12 См.: 🔗Ис. 41:4 🔗Ис. 44:6	Послушай Мене, Иакове и Израилю, егоже Аз призываю: Аз есмь первый и Аз есмь во век.
48:13 См.: 🔗Пс. 101:26 🔗Ис. 40:28 🔗Рим. 4:17	И рука Моя основа землю, и десница Моя утверди небо: призову я, и станут вкупе,
48:14	и соберутся вси и услышат: кто им возвести сия? Любя тя сотворих волю твою над Вавилоном, еже отяти племя Халдейско.
48:15	Аз глаголах, Аз призвах, приведох и, и благопоспешит путь его.
48:16 См.: 🔗Втор. 30:11 🔗Ин. 1:2 🔗Ин. 15:26	Приступите ко Мне и слышите сия, исперва не отай глаголах: егда бываху, тамо бех, и ныне Господь Господь посла Мя и Дух Его.
48:17 См.: 🔗Ис. 45:19	Тако глаголет Господь, Избавивый тя, Святый Израилев: Аз есмь Господь Бог твой, научих тя, еже обрести тебе путь, по немуже пойдеши.
48:18 См.: 🔗Втор. 5:29 🔗Пс. 80:15 🔗Ис. 66:12	И аще бы еси послушал заповедий Моих, то был бы убо аки река мир твой, и правда твоя яко волна морская,
48:19	и было бы яко песок семя твое, и изчадия чрева твоего яко персть земли: ниже ныне потребишися, ниже погибнет имя твое предо Мною.
48:20 См.: 🔗Иер. 50:8 🔗Отк. 18:4	Изыди от Вавилона, бежай от Халдеев: глас радости возвестите, и да слышано будет сие, возвестите даже до последних земли, глаголите: избави Господь раба Своего Иакова.
48:21 См.: 🔗Исх. 17:6 🔗Чис. 20:10 🔗Пс. 77:15 🔗Пс. 104:41 🔗Прем. 11:4 🔗1Кор. 10:4	И аще вжаждут, пустынею проведет их и воду из камене изведет им: разсядется камень, и потечет вода, и испиют людие Мои.
48:22 См.: 🔗Ис. 57:21	Несть радоватися нечестивым, глаголет Господь.