Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 10 | |
10:1 | Рече же Господь к Моисею глаголя: вниди к фараону: Аз бо ожесточих сердце его и рабов его, да и еще приидут знамения сия на них: |
10:2 См.: 🔗Исх. 12:26 | яко да повесте во ушеса чад ваших и чадом чад ваших, елико наругахся Египтяном, и знамения Моя, яже сотворих в них, и увесте, яко Аз Господь. |
10:3 См.: 🔗Исх. 9:1 | Вниде же Моисей и Аарон пред фараона и реста ему: сия глаголет Господь Бог Еврейский: доколе не хощеши усрамитися Мене? Отпусти люди Моя, да послужат Ми: |
10:4 См.: 🔗Пс. 104:34 | аще же не хощеши ты отпустити люди Моя, се, Аз наведу в сей час заутра пруги многи на вся пределы твоя, |
10:5 | и покрыют лице земли, и не возможеши видети земли, и поядят весь останок земли оставшийся, егоже остави вам град, и изядят всяко древо растущее вам на земли: |
10:6 | и наполнятся домове твои и домове рабов твоих, и вси домове по всей земли Египетстей: ихже никогдаже видеша отцы твои, ни прадеды их, от негоже дне быша на земли, даже до дне сего. И уклонився Моисей, изыде от фараона. |
10:7 | Рекоша же раби фараоновы к нему: доколе нам сия будет мука? Отпусти люди, да послужат Господу Богу своему: или видети хощеши, яко погибнет Египет? |
10:8 | И возвратиша Моисеа и Аарона пред фараона, и рече им фараон: идите и послужите Господу Богу вашему: кто же и кто суть идущии? |
10:9 | И рече Моисей: с юнотами нашими и с старцы пойдем, с сынми и дщерьми, и со овцами и волами нашими: будет бо праздник Господа Бога нашего. |
10:10 | И рече им фараон: да будет тако, Господь с вами: якоже отпущаю вас, еда и стяжание ваше? Видите, яко лукавство обретается в вас: |
10:11 | не тако: но да идут мужие и да послужат Богу: сего бо сами просите. И изгнаша их от лица фараонова. |
10:12 См.: 🔗Исх. 9:32 | Рече же Господь Моисею: простри руку твою на землю Египетскую, и да взыдут прузи на землю Египетскую, и снедят всю траву земную и весь плод древесный, егоже остави град. |
10:13 См.: 🔗Исх. 14:21 🔗Чис. 11:31 | И воздвиже Моисей жезл на небо, Господь же наведе ветр южный на землю во весь той день и во всю нощь: утро бысть, и ветр южный взя пруги, |
10:14 См.: 🔗Пс. 77:46 | и наведе я на всю землю Египетскую: и нападоша на вся пределы Египетския мнози зело: прежде сих не быша сицевии прузи, и по сих не будут тако, |
10:15 См.: 🔗Пс. 104:35 | и покрыша лице земное, и истле земля: и снедоша всю траву земную и весь плод древесный, иже остася от града: не остася зелено ничтоже на древех и во всей траве польней, по всей земли Египетстей. |
10:16 См.: 🔗Исх. 8:25 🔗Исх. 9:27 | Потщася же фараон призвати Моисеа и Аарона, глаголя: согреших пред Господем Богом вашим и к вам: |
10:17 | простите убо мой грех еще ныне и помолитеся Господу Богу вашему, да отимет от мене смерть сию. |
10:18 | Изыде же Моисей от фараона и помолися ко Господу: |
10:19 См.: 🔗Исх. 8:31 | и премени Господь от моря ветр велик и взя пруги, и вверже их в море Чермное: и не остася ни един пруг на всей земли Египетстей. |
10:20 См.: 🔗Исх. 11:10 | И ожесточи Господь сердце фараоново, и не отпусти сынов Израилевых. |
10:21 См.: 🔗Ис. 50:3 | Рече же Господь Моисею: простри руку твою на небо, и да будет тма по земли Египетстей, осязаемая тма. |
10:22 См.: 🔗Пс. 104:28 | Простре же Моисей руку свою на небо, и бысть тма, мрак, буря по всей земли Египетстей три дни: |
10:23 См.: 🔗Прем. 17:5 🔗Прем. 18:1 | и не виде никтоже брата своего три дни, и не воста никтоже от одра своего три дни, всем же сыном Израилевым бяше свет во всех (жилищах), в нихже пребываху. |
10:24 См.: 🔗Исх. 8:8 | И призва фараон Моисеа и Аарона, глаголя: идите, послужите Господу Богу вашему: токмо овцы и волы оставите: стяжание же ваше да идет с вами. |
10:25 | И рече Моисей: ни: но и ты нам даси всесожжения и жертвы, яже сотворим Господу Богу нашему: |
10:26 | и скот наш пойдет с нами, не оставим и копыта: от них бо возмем на службу Господу Богу нашему: мы же не вемы, чим послужим Господу Богу нашему, дондеже дойдем тамо. |
10:27 | Ожесточи же Господь сердце фараоново, и не восхоте отпустити их: |
10:28 | и рече ему фараон: отиди от мене, внемли себе ктому, да не приложиши видети лица моего: в оньже бо день аще явишися мне, умреши. |
10:29 | Рече же Моисей: якоже рекл еси, ктому не явлюся пред лицем твоим. |