Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 4 | |
4:1 См.: 🔗Иез. 20:11 | Сия книга повелений Божиих и закон сый во век: вси держащиися ея в живот (внидут), оставившии же ю умрут. |
4:2 | Обратися, Иакове, и имися ея, ходи ко сиянию прямо света ея. |
4:3 | Не даждь иному славы твоея, и полезных тебе языку чуждему. |
4:4 См.: 🔗Втор. 4:8 🔗Пс. 147:8 | Блажени есмы, Израилю, яко угодная Богу нам разумна суть. |
4:5 | Дерзайте, людие мои, память Израилева. |
4:6 | Продани бысте языком не на пагубу: понеже разгневасте Бога, предани бысте супостатом, |
4:7 См.: 🔗Втор. 32:17 | преогорчисте бо Сотворшаго вас, (Бога вечнаго,) пожерше бесом, а не Богу: |
4:8 | забысте бо Господа питающаго вас, опечалисте же и воспитавшаго вас Иерусалима. |
4:9 | Виде бо нашедший вам гнев от Бога и рече: слышите, приселницы Сиони, наведе бо ми Господь сетование велико, |
4:10 | видех бо пленение людий сынов моих и дщерей, еже наведе им Вечный. |
4:11 | Питах бо я с веселием, испустих же я с плачем и рыданием. |
4:12 См.: 🔗Мих. 7:8 | Никтоже да радуется о мне вдовице и оставленней от многих, опустех за грехи чад моих, понеже уклонишася от закона Божия, |
4:13 | и оправданий Его не познаша, и не ходиша в путех заповедий Божиих, ниже стезьми наказания в правде Его ступаша. |
4:14 | Да приидут окрестнии Сиони, и помяните пленение сынов моих и дщерей, еже наведе им Вечный: |
4:15 См.: 🔗Втор. 28:49 | наведе бо на ня язык издалеча, язык безстудный и иноязычный: |
4:16 | понеже не усрамишася старца, ни помиловаша отрочате, и отведоша любезных вдовичих, и от дщерей едину опустошиша. |
4:17 | Аз же како мощен помощи вам? |
4:18 | Наведый бо вам злая избавит вас от руки враг ваших. |
4:19 | Идите, чада, идите: аз бо остахся пуста, |
4:20 | совлекохся ризы мирныя, облекохся же во вретище моления моего: возопию к Вечному во дни моя. |
4:21 | Дерзайте, чада, возопийте к Богу, и избавит вас от насилия руки вражия. |
4:22 | Аз бо (исперва) надеяхся на Вечнаго о спасении вашем: и прииде ми радость от Святаго в помиловании, еже приидет вам вскоре от Вечнаго Спаса нашего. |
4:23 | Испустих бо вас с рыданием и плачем, отдаст же ми Бог вас с радостию и веселием в век. |
4:24 | Якоже бо ныне видеша приселницы Сиони ваше пленение (от Бога), такожде узрят вскоре спасение ваше от Бога, еже приидет вам со славою великою и со освещением Вечнаго. |
4:25 | Чада, долготерпите иже от Бога нашедший вам гнев, гонил бо тя враг твой, и узриши пагубу его вскоре и на выю его наступиши. |
4:26 | Младии мои ходиша в пути жестоки, восхищени суть, якоже стадо похищено врагами. |
4:27 См.: 🔗Ис. 49:14 | Дерзайте, чада, и возопийте к Богу, будет бо вам от Наведшаго память. |
4:28 | Якоже бо бысть ум ваш заблудити вам от Бога, тако ныне десятижды усугубите обратившеся взыскати Его: |
4:29 | Наведый бо вам злая наведет вам вечное веселие со спасением вашим. |
4:30 | Дерзай, Иерусалиме, утешит тя нарекий тебе. |
4:31 См.: 🔗Пс. 136:7 | Окаянни озлобившии тя и радовавшиися о падении твоем, (мщение будет над ними). |
4:32 | Окаянни гради, имже поработаша чада твоя, окаянна приимшая сыны твоя. |
4:33 | Якоже бо порадовася о твоем падении и возвеселися о разорении твоем, такожде опечалится о своем запустении. |
4:34 | И отсеку от нея веселие многонародства, и величание ея будет в рыдание. |
4:35 См.: 🔗Ис. 34:14 | Огнь и найдет на ню от Вечнаго во дни многи, и населится бесами на множайшее время. |
4:36 См.: 🔗Вар. 5:5 | Воззри на восток, Иерусалиме, и виждь веселие грядущее тебе от Бога. |
4:37 | Се, грядут сынове твои, ихже испустил еси, грядут собрани от восток даже до запад словом Святаго, радующеся о славе Божией. |