Второзаконие, глава 14

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 14
14:1 См.: 🔗Лев. 19:27 🔗3Цар. 18:28	Сынове есте Господа Бога вашего: да не нарезуетеся и не возложите плеши между очима вашима над мертвым:
14:2 См.: 🔗Втор. 7:6 🔗Втор. 26:18	яко людие святи есте Господеви Богу вашему, и вас избра Господь Бог ваш быти вам людем избранным Ему от всех языков иже на лицы земли.
14:3 См.: 🔗Деян. 10:14	Да не снесте всякия мерзости.
14:4 См.: 🔗Лев. 11:2	Сия скоты ядите: телца от говяд и агнца от овец и козла от коз:
14:5 См.: 🔗Втор. 12:15	еленя и серну, и буйвола и ланя, и зубря и онагра и сайгака.
14:6	Всяк скот на двое деля пазнокти, и копыто на двое копыта, и отрыгая жвание в скотех, да ясте.
14:7 См.: 🔗Лев. 11:4	И сих да не снесте от отрыгающих жвание и от делящих пазнокти на двое, но копыт не раздвояющих: велблюда и заяца и хирогрилля: яко отрыгают жвание сии, но копыт не раздвояют, нечиста сия вам суть.
14:8 См.: 🔗Ис. 65:4	И свинии, яко на двое делит пазнокти и копыта раздвояет, и сия жвания не отрыгает, нечиста сия вам есть: от мяс их да не ясте, и мертвечинам их да не прикоснетеся.
14:9 См.: 🔗Лев. 11:9	И сия да ясте от всех яже в воде: вся, имже суть перие и чешуя, ядите.
14:10	И всех, имже несть перия, на чешуи, да не ясте: нечиста суть вам.
14:11	Всяку птицу чисту да ясте.
14:12 См.: 🔗Лев. 11:13	И сих да не ясте от них:
14:13	орла и грифа и орла морскаго,
14:14	и неясыти и иктина и подобных сим:
14:15	и врана и врабия, и выпелицы и сухолапля, и ястреба и подобных сим:
14:16	и врана нощнаго и лилика и подобных сим:
14:17	и еродиа и лебедя, и ивина и катаракта, и вдода
14:18	и нощнаго нетопыря, и сыча и теслоноса, и харадриона и подобных сим, и порфириона.
14:19	Вся гады птичия нечиста суть вам: да не ясте от них.
14:20	Всяку птицу чисту да ясте.
14:21 См.: 🔗Исх. 23:19 🔗Исх. 34:26	Всякия мертвечины да не ясте: приселнику, иже во градех твоих, да дасте, и да яст, или да продасте страннику: яко людие святи есте Господеви Богу вашему. Да не свариши ягняте во млеце матере его.
14:22 См.: 🔗Лев. 27:30 🔗Чис. 18:21	Десятины да даси от всего плода семене своего, плод нив твоих от года до года,
14:23 См.: 🔗Втор. 12:7 🔗Мф. 21:12	и да снеси я пред Господем Богом твоим на месте, идеже изберет Господь Бог твой призывати имя Его тамо: да принесеши десятину пшеницы твоея и вина твоего и елеа твоего, и первенцы волов твоих и овец твоих, да научишися боятися Господа Бога твоего вся дни.
14:24	Аще же далече будет путь от тебе и не возможеши донести их, яко далече место от тебе, еже изберет Господь Бог твой призывати имя Его тамо, яко да благословит тя Господь Бог твой:
14:25 См.: 🔗Мф. 21:12	и продаси сие на цене, и возмеши сребро в руку твою, и пойдеши на место, иже изберет Господь Бог твой,
14:26 См.: 🔗Лев. 10:9 🔗Втор. 27:7	и даси сребро за все, на неже пожелает душа твоя, на волы и овцы, или на вино, или на сикеру, или на все, егоже желает душа твоя, и да снеси тамо пред Господем Богом твоим, и возвеселишися ты и дом твой.
14:27 См.: 🔗Чис. 18:20	И левит иже во градех твоих, не оставивши его, яко несть ему части ни жребия с тобою:
14:28 См.: 🔗Лев. 27:30	по трех летех да изнесеши всю десятину жит твоих в лето оно, да положиши ю во градех твоих:
14:29 См.: 🔗Прит. 10:24 🔗2Кор. 9:6	и приидет левит, яко несть ему части ни жребия с тобою, и пришлец, и сирота и вдова, яже во градех твоих, да ядят и насытятся: да благословит тя Господь Бог твой во всех делех твоих, яже аще сотвориши.