Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 34 | |
34:1 См.: 🔗Сир. 5:6 🔗Иер. 29:8 | Тщетны надежды и лживы (суть) неразумиву мужу, и сония вперяют безумных. |
34:2 | Якоже емляйся за стень и гоняй ветры, такожде емляй веру сном: |
34:3 | сие по сему видение снов, прямо лицу подобие лица. |
34:4 См.: 🔗Мф. 12:34 | От нечистаго что очистится, и от лживаго кая истина? |
34:5 | Волшебства и обаяния и сония суетна суть, и якоже раждающия сердцу мечтания бывают: |
34:6 | аще не от Вышняго послана будут на посещение, не вдаждь в ня сердца твоего: |
34:7 | многих бо прельстиша сония, и отпадоша надеющеся на ня. |
34:8 | Без лжи совершится закон, и премудрость во устех верных совершение. |
34:9 | Муж ученый уведа много, и многоискусный повесть разум. |
34:10 | Иже не искусися, мало весть: обходяй же страны умножит хитрость. |
34:11 | Много видех во обхождении моем, и вящшая словес моих разум мой: |
34:12 | многащи даже до смерти бедствовах, и спасен бых сих ради. |
34:13 См.: 🔗Пс. 55:12 | Дух боящихся Господа поживет, надежда бо их на Спасающаго я. |
34:14 | Бояйся Господа ни чего убоится и не устрашится, Той бо надежда ему. |
34:15 См.: 🔗Пс. 127:1 | Боящемуся Господа блаженна душа: чим одержится, и кто ему утверждение? |
34:16 См.: 🔗Пс. 33:16 | Очи Господни на любящыя Его: защищение силы и утверждение крепости, покров от вара и покров в полудне, хранение от претыкания и помощь от падения: |
34:17 | воздвизаяй душу и просвещаяй очи, изцеление даяй, живот и благословение. |
34:18 См.: 🔗Прит. 21:27 | Иже приносит жертву от неправды, приношение порочно, и не суть во благоволение дары беззаконных. |
34:19 См.: 🔗Прит. 15:8 🔗Прит. 21:27 | Не благоволит Вышний о приношении нечестивых, ни множеством жертв очистит грехи. |
34:20 См.: 🔗Ис. 66:3 | Яко жряй сына пред отцем его, тако приносяй жертвы от имения убогих. |
34:21 См.: 🔗Втор. 24:15 🔗Сир. 7:22 | Хлеб убогим живот убогих, лишаяй его человек кровей есть. |
34:22 См.: 🔗Лев. 19:13 | Убивает искренняго отемляй ему поживление, и проливает кровь лишаяй мзды наемника. |
34:23 | Един созидаяй, а другий разоряяй, что успеет более, токмо труд? |
34:24 | Единому молящуся, а другому проклинающу, коего глас услышит Владыка? |
34:25 См.: 🔗Чис. 19:11 | Омываяйся от мертвеца и паки прикасаяйся ему, кая польза ему от бани? |
34:26 См.: 🔗2Пет. 2:22 | Тако человек постяйся о гресех своих и паки ходяй и таяжде творяй, мольбу его кто услышит, и что успе смирением своим? |