Книга Неемии, глава 9

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 9
9:1 См.: 🔗Неем. 8:1 🔗1Езд. 10:1	В день же двадесять четвертый месяца сего собрашася сынове Израилевы в посте и во вретищих, и персть на главах их.
9:2	И отлучишася сынове Израилевы от всякаго сына чужда, и исповедаху грехи своя и беззакония отец своих.
9:3 См.: 🔗Мф. 20:1 🔗Ин. 11:9	И сташа на стоянии своем и чтоша в книзе закона Господа Бога своего четверицею в день, и бяху исповедающеся Господеви и покланяющеся Господу Богу своему.
9:4 См.: 🔗Неем. 8:4	И сташа на степени левитов Иисус и сынове Кадмиили, Саханиа сын Саравиин, сынове Ханани, и возопиша гласом великим ко Господу Богу своему,
9:5	и рекоша левити, Иисус и Кадмиил: востаните, благословите Господа Бога нашего от века даже до века: и благословят имя славы Твоея, и вознесут во всяцем благословении и хвале.
9:6 См.: 🔗Ис. 44:6 🔗Пс. 32:6 🔗Деян. 4:24	И рече Ездра: Ты еси Сам Господь един, Ты сотворил еси небо и небо небесе и вся вои их, землю и вся, елика на ней суть, моря и вся, яже в них, и Ты оживляеши вся, и вои небеснии покланяются Тебе:
9:7 См.: 🔗Быт. 12:1 🔗Быт. 17:5	Ты еси Господь Бог, ты избрал еси Аврама и извел еси его от страны Халдейския, и положил еси имя ему Авраам,
9:8 См.: 🔗Быт. 12:6 🔗Быт. 15:18 🔗1Езд. 9:15	и обрел еси сердце его верно пред Тобою, и завещал еси с ним завет дати ему землю Хананейску и Хеттейску, и Аморрейску и Ферезейску, и Иевусейску и Гергесейску, и семени его: и утвердил еси словеса Твоя, яко праведен еси:
9:9 См.: 🔗Исх. 2:24 🔗Исх. 14:17	и видел еси озлобление отец наших во Египте, и вопль их услышал еси на мори Чермнем,
9:10	и дал еси знамения и чудеса во Египте на фараона и на вся рабы его и на вся люди земли его: познал бо еси, яко возгордешася на них, и сотворил еси Себе имя, якоже день сей:
9:11 См.: 🔗Исх. 14:21	и море расторгл еси пред ними, и проидоша посреде моря по суху, и гонители их ввергл еси в глубину, яко камень в воде зелней:
9:12 См.: 🔗Исх. 13:21	и в столпе облачне водил еси их во дни и в столпе огненне в нощи, еже осветити им путь, по немуже идоша:
9:13 См.: 🔗Исх. 19:18 🔗Втор. 4:12	и на гору Синайскую сшел еси, и глаголал еси к ним с небесе, и дал еси им судбы правы и закон истинный, повеления и заповеди благи:
9:14 См.: 🔗Исх. 20:8	и субботу святую Твою явил еси им, заповеди, повеления и закон повелел еси им рукою Моисеа раба Твоего:
9:15 См.: 🔗Исх. 16:4 🔗Исх. 17:6 🔗Чис. 20:10	хлеб же с небесе дал еси им во алчбе их в пищу им, и воду из камене извел еси им в жажди их, и рекл еси им, да внидут и наследят землю, на нюже простерл еси руку Твою дати им:
9:16 См.: 🔗Ос. 13:6	тии же и отцы наши возгордешася и ожесточиша выя своя и не послушаша заповедий Твоих,
9:17 См.: 🔗Исх. 32:8 🔗Исх. 33:3 🔗Чис. 14:4	и не восхотеша слышати, и не воспомянуша чудес Твоих, яже сотворил еси им: и ожесточиша выю свою, и даша начало возвратитися на работу свою во Египет: Ты же, Боже, милостив и щедр, долготерпелив и многомилостив, и не оставил еси их:
9:18 См.: 🔗Исх. 32:4	еще же сотвориша себе и телца слияна и рекоша: сии бози изведоша нас из Египта: и сотвориша раздражения велия:
9:19 См.: 🔗Исх. 13:21	Ты же в щедротах Твоих многих не оставил еси их в пустыни, столп облачный не уклонил еси от них во дни, еже наставити их на путь, и столп огненный в нощи, еже осветити им путь по немуже идоша,
9:20 См.: 🔗Чис. 11:17 🔗Нав. 5:12 🔗Исх. 17:6	и Дух Твой благ дал еси, еже научити их, и манны Твоея не лишил еси от уст их, и воду дал еси им в жажди их,
9:21 См.: 🔗Втор. 29:5	и четыредесять лет препитал еси их в пустыни, ничтоже им оскуде: одеяния их не состарешася, и сапози их не раздрашася:
9:22 См.: 🔗Чис. 21:21 🔗Чис. 32:33	и дал еси им царства, и люди разделил еси им, и наследиша землю Сиона царя Есевонска и землю Ога царя Васанска:
9:23 См.: 🔗Быт. 15:5 🔗Быт. 22:17	и умножил еси сыны их яко звезды небесныя, и ввел еси их в землю, о нейже глаголал еси отцем их внити и наследити ю:
9:24 См.: 🔗Нав. 6:1 🔗Нав. 12:1	(и внидоша сынове их) и наследиша землю: и сокрушил еси пред ними обитающих в земли Хананейстей, и дал еси их в руку их, и цари их и люди земли, да сотворят им якоже угодно пред ними:
9:25 См.: 🔗Втор. 6:11	и взяша грады высокия, и одержаша домы полны всех благих, кладязи ограждены камением, винограды и маслины и всяко древо снедное во множество, и ядоша и насытишася, и утолстеша и разширишася во благости Твоей велицей:
9:26 См.: 🔗Втор. 28:47	и изменишася и отступиша от Тебе, и повергоша закон Твой созади плоти своея, и пророки Твоя избиша, иже засвидетелствоваху им, да обратятся к Тебе, и сотвориша хулы велики:
9:27 См.: 🔗Суд. 2:14 🔗Суд. 3:8 🔗4Цар. 13:5	и дал еси их в руку оскорбляющих я, и озлобиша их: и во бремя печали своея возопиша к Тебе, и Ты с небесе Твоего услышал еси, и по щедротам Твоим многим дал еси им спасителей, и спасл еси их от рук враг их:
9:28 См.: 🔗Суд. 4:1	и егда упокоишася, возвратишася сотворити лукавое пред Тобою: и оставил еси их в руках враг их, и обладаша ими: и паки возопиша к Тебе, Ты же от небесе услышал еси, и избавил еси их в щедротах Твоих мнозех,
9:29 См.: 🔗Лев. 18:5 🔗Иез. 20:11 🔗Рим. 10:5 🔗Гал. 3:12	и засвидетелствовал еси им, да обратятся к закону Твоему: они же возгордешася и не послушаша, но в заповедех Твоих и в судбах Твоих согрешиша, яже сотворив человек жив будет в них: и даша плещы непокоривыя, и выю свою ожесточиша, и не послушаша:
9:30 См.: 🔗Ис. 42:20	и продолжил еси на них лета многа, и засвидетелствовал еси им Духом Твоим и рукою пророк Твоих, и не вняша, и предал еси их в руку людий земных:
9:31	в милосердиих же Твоих многих не сотворил еси их в скончание, ниже оставил еси их, яко Бог силен еси и милостив и щедр:
9:32 См.: 🔗Неем. 1:5 🔗Дан. 9:4	и ныне, Боже наш крепкий, великий, державный и страшный, храняй завет Твой и милость Твою, да не явится мал пред Тобою всяк труд, иже обрете нас и цари нашя, и началники нашя и священники нашя, и пророки нашя и отцы нашя и вся люди Твоя, от дний царей Ассурских и даже до дне сего:
9:33 См.: 🔗Исх. 32:8	и Ты праведен во всех, яже приидоша на нас, яко истину сотворил еси, мы же согрешихом:
9:34 См.: 🔗Дан. 9:8	и царие наши и началницы наши, и священницы наши и отцы наши не сотвориша закона Твоего и не внимаша повелением Твоим и свидением Твоим, имиже засвидетелствовал еси им,
9:35 См.: 🔗Втор. 32:14 🔗Ос. 13:6	и тии во царствии Твоем и во благостыни Твоей мнозе, юже дал еси им, и в земли широцей и тучней, юже дал еси пред ними, не послужиша Тебе и не отвратишася от начинаний своих лукавых:
9:36	се, мы днесь есмы раби, и земля, юже дал еси отцем нашым ясти плод ея и благая ея, се, есмы раби на ней:
9:37	и плоды ея мнози царем, имже предал еси нас за грехи нашя, и телесы нашими владычествуют и скоты нашими, якоже угодно им, и в печали велицей есмы:
9:38	и во всех сих мы полагаем завет верен и пишем, и печатают вси началницы наши, левити наши и священницы наши.