Первая книга Паралипоменон (Первая книга Хроник, Первая Летопись), глава 11

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 11
11:1 См.: 🔗2Цар. 5:1	И собрася весь Израиль к Давиду в Хеврон, глаголюще: се, кости твоя и плоть твоя мы:
11:2 См.: 🔗1Цар. 16:13 🔗1Цар. 18:13 🔗Пс. 77:71	вчера же и третияго дне, егда еще царствоваше Саул, ты был еси изводяй и вводяй Израиля, и тебе рече Господь Бог твой: ты упасеши люди Моя Израиля, и ты будеши князь над людьми Моими Израилем.
11:3 См.: 🔗1Пар. 12:38 🔗1Цар. 16:13	И приидоша вси старейшины Израилевы ко царю в Хеврон: и утверди Давид с ними завет в Хевроне пред Господем: и помазаша Давида в царя над Израилем по словеси Господню, (еже глагола) рукою Самуиловою.
11:4 См.: 🔗2Цар. 5:6	И иде царь Давид и весь Израиль во Иерусалим, сей есть Иевус, идеже бяху Иевусее жителие земли.
11:5	Рекоша же Давиду, иже обиташа в Иевусе: не внидеши семо. И взя Давид крепость Сионю, яже есть град Давидов.
11:6 См.: 🔗2Цар. 5:8	Рече же Давид: всяк иже убиет Иевусеа в первых, будет князь и воевода. И взыде нань прежде Иоав сын Саруиев и бысть князем.
11:7	И седе Давид во обдержании: сего ради именова е град Давидов.
11:8	И созда град окрест от Маала даже да окружения: Иоав же прочее града сострои: и воева и взя град.
11:9 См.: 🔗2Цар. 5:10	Преспеваше же Давид идый и растый, и Господь Вседержитель бе с ним.
11:10 См.: 🔗2Цар. 23:8	Сии же князи сильных Давидовых, иже помогаху ему в царстве его со всем Израилем, да царь будет по словеси Господню, над Израилем,
11:11 См.: 🔗2Цар. 23:8	и сие число крепких Давидовых: Иесваал сын Ахамань, первый между тридесятми: той извлече мечь свой единожды на триста язвеных во едино время.
11:12 См.: 🔗2Цар. 23:9	И по нем Елеазар, сын Додеа Ахохии: сей бе между треми сильными:
11:13	сей бе с Давидом в Фасодомине, идеже иноплеменницы собрани быша на брань, и бе часть нивы полна ячменя, и людие побегоша от лица иноплеменнича:
11:14 См.: 🔗2Цар. 23:12	и ста посреде части и защити ю, и изби иноплеменники, и сотвори Господь спасение велие (людем Своим).
11:15	Снидоша же тии трие от тридесяти князей на камень ко Давиду в пещеру Одолламлю, а полк иноплеменничь стояше во юдоли Гигантов.
11:16	Давид же бе тогда в крепости, полк же иноплеменничь бе тогда в Вифлееме.
11:17 См.: 🔗2Цар. 23:15	И возжада Давид и рече: кто напоит мя водою от кладязя Вифлеемска, иже есть во вратех?
11:18	И трие тии проторгошася сквозе полк иноплеменничь и почерпоша воду из кладязя, иже в Вифлееме, иже бе во вратех, и взяша и принесоша к Давиду, да пиет. И не восхоте Давид пити ея и возлия ю Господеви
11:19	и рече: милостив ми Бог, еже сотворити глагол сей: аще кровь мужей сих испию в душах их, понеже душами своими принесоша. И не восхоте пити ея. Сие сотвориша трие сильнии.
11:20 См.: 🔗2Цар. 23:18	И Авесса брат Иоавль, той бе первый в триех: сей извлече мечь свой противу триех сот мужей во един час и уби их, и той бе посреде триех именит:
11:21 См.: 🔗2Цар. 23:19	от триех между двема преславный, и бе им началник, обаче ко трием первым не достиже.
11:22 См.: 🔗2Цар. 23:20	И Ванеа сын Иодаев, сын мужа крепкаго, многа дела его, от Каваслила: той уби двоих Ариилов Моавских, и той сниде и уби льва у кладязя во время снега:
11:23 См.: 🔗1Цар. 17:7	и той уби мужа Египтянина, емуже возраст бе пять лакот, и в руце Египтянина копие яко вратило ткущих: и сниде к нему Ванеа с жезлом, и восхити копие из руки Египтянина и уби его копием его:
11:24	сия сотвори Ванеа сын Иодаев, и бе именит посреде триех сильных:
11:25 См.: 🔗2Цар. 23:23	над тридесятию бе славен сей, а ко трием не достиже: и постави его Давид над отечеством своим.
11:26 См.: 🔗2Цар. 23:24	И сильнии сил: Асаил, брат Иоавль, Елеанан, сын Додоев от Вифлеема,
11:27	Саммоф Аддитянин, Хелкий Афелонин,
11:28	Орей сын от Киса Фекуйский, Авиезер Анафофский,
11:29	Совохай Асофийский, Илий Ахойский,
11:30 См.: 🔗2Цар. 23:28	Воорай сын Нетофафиев, Еллаф сын Ваинака Нетофафийскаго,
11:31	Ифай сын Ривеин от холма Вениаминя, Ванеа сын Фарафониев,
11:32	Урий от Неали, Галсавиил Аравефийский,
11:33	Азмоф Варсамийский, Елиава Саламийский,
11:34	Ирас Гоинийский, Ионафан сын Саги Арарийский,
11:35	Ахиам сын Сахара Арарийскаго, Зифаал сын Орин,
11:36	Афер Мехурафинский, Ахиа Фелонийский,
11:37	Асарай Мармелинский, Ноорай сын Авдиев,
11:38	Иоиль брат Нафанов, Мавар сын Тараиев,
11:39	Селлик Аммониин, Наарей Вирофин, иже носил оружие Иоава сына Саруиева,
11:40	Ира Иефериин, Гарив Фериин,
11:41 См.: 🔗2Цар. 11:3	Уриа Хетфейский, Вазаф сын Оолиев,
11:42	Адина сын Саха, Рувима князь, и у него тридесять,
11:43	Анан сын Маахин, и Иосафат Фафаин,
11:44	Озиа Астарофин, Самма и Иеил сынове Хофана Арариина,
11:45	Иедиил сын Саамерин, и Иозае брат его Фосаин,
11:46	Иелиил Маоин, и Арива, и Осоиа сын его, Енаам, и Иефема Моавитский,
11:47	Елиил, и Овид, и Иесиил Месовиев.