Книга Исход, глава 1

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 1
1:1 См.: 🔗Быт. 46:8 🔗Деян. 7:15	Сия имена сынов Израилевых, входящих во Египет вкупе со Иаковом отцем их, кийждо со всем домом своим внидоша:
1:2 См.: 🔗Быт. 46:8 🔗Исх. 6:14	Рувим, Симеон, Левий, Иуда,
1:3	Иссахар, Завулон и Вениамин,
1:4	Дан и Неффалим, Гад и Асир: Иосиф же бяше во Египте.
1:5	Бяше же всех душ изшедших из Иакова седмьдесят пять.
1:6 См.: 🔗Быт. 50:26	Умре же Иосиф, и вся братия его, и весь род оный:
1:7 См.: 🔗Деян. 7:17 🔗Пс. 104:24	сынове же Израилевы возрастоша и умножишася, и мнози быша и укрепишася зело зело: умножи же их земля.
1:8	Воста же царь ин во Египте, иже не знаше Иосифа,
1:9	рече же языку своему: се, род сынов Израилевых великое множество и укрепляется паче нас:
1:10	приидите убо, прехитрим их, да не когда умножатся: и егда аще приключится нам брань, приложатся и сии к супостатом, и одолевше нам изыдут из земли (нашея).
1:11	И пристави над ними приставники дел, да озлобят их в делех. И создаша грады тверды фараону: Пифо, и Рамесси, и он, иже есть Илиополь.
1:12 См.: 🔗Пс. 104:24	По елику же их смиряху, толико множайшии бываху и укрепляхуся зело зело. И гнушахуся Египтяне сынми Израилевыми,
1:13 См.: 🔗Втор. 26:6 🔗Иудиф. 5:11	и насилие творяху Египтяне сыном Израилевым нуждею,
1:14	и болезненну тем жизнь творяху в делех жестоких брением и плинфоделанием, и всеми делы, яже в полях, во всех делех, имиже порабощаху их с нуждею.
1:15	И рече царь Египетский бабам Еврейским: единей их имя Сепфора и имя вторей Фуа,
1:16 См.: 🔗Прем. 18:5	и рече (им): егда бабите Евреаныням, и суть к рождению, аще убо мужеский пол будет, убивайте его: аще же женский, снабдевайте его.
1:17	Убояшася же бабы Бога, и не сотвориша, якоже повеле им царь Египетский, и живляху мужеский пол.
1:18	Призва же царь Египетский бабы и рече им: что яко сотвористе вещь сию, и оживляете мужеский пол?
1:19	Рекоша же бабы фараону: не яко жены Египтяныни, тако и жены Евреаныни: раждают бо прежде неже внити к ним бабам, и раждаху.
1:20	Благо же творяше Бог бабам, и множахуся людие и укрепляхуся зело.
1:21 См.: 🔗1Цар. 2:35	И понеже бояхуся бабы Бога, сотвориша себе жилища.
1:22 См.: 🔗Прем. 18:5 🔗Деян. 7:19	Заповеда же фараон всем людем своим, глаголя: всяк мужеский пол, иже родится Евреом, в реку ввергайте, и всяк женский пол снабдевайте и жив.