Книга пророка Исаии, глава 51

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 51
51:1	Послушайте Мене, гонящии правду и взыскающии Господа, воззрите на твердый камень, егоже изсекосте, и в юдоль потока, юже ископасте.
51:2 См.: 🔗Быт. 12:1	Воззрите на Авраама отца вашего и на Сарру породившую вы: яко един бе, и призвах его, и благослових его, и возлюбих его, и умножих его.
51:3 См.: 🔗Иез. 36:35 🔗Пс. 109:2 🔗Ис. 2:3	И тебе ныне утешу, Сионе, и утеших вся пустыни его, и поставлю пустыню его яко рай, и яже ко западом его аки рай Господень: радость и веселие обрящут в нем, исповедание и глас хваления.
51:4	Послушайте Мене, людие Мои, послушайте, и царие, ко Мне внушите: яко закон от Мене изыдет, и суд Мой во свет языком.
51:5 См.: 🔗Ис. 59:16	Приближается скоро правда Моя, и изыдет яко свет спасение Мое, и на мышцу Мою языцы надеятися будут: Мене острови ожидати и на мышцу Мою уповати будут.
51:6 См.: 🔗Пс. 101:27	Воздвигните на небо очи ваши и воззрите на землю долу, понеже небо яко дым утвердися, и земля яко риза обетшает, живущии же на земли якоже сия изомрут, спасение же Мое во век будет, и правда Моя не оскудеет.
51:7 См.: 🔗Пс. 36:31	Послушайте Мене, ведящии суд, людие Мои, имже закон Мой в сердцы вашем, не бойтеся укорения человеча и похулению их не покаряйтеся.
51:8 См.: 🔗Ис. 51:6	Якоже бо риза снедена будет временем, и яко сукно изястся мольми, правда же Моя во веки будет и спасение Мое в роды родов.
51:9 См.: 🔗Лк. 1:51 🔗Исх. 14:14	Востани, востани, Иерусалиме, и облецыся во крепость мышцы твоея, востани яко в начале дне, яко род века: не ты ли еси победил гордаго и расторгнул змиа?
51:10 См.: 🔗Исх. 14:21	Не ты ли еси опустошаяй море, воду бездны многу? Положивый глубины морския путь прохода изятым и избавленым?
51:11 См.: 🔗Пс. 125:5 🔗Ис. 66:14 🔗Ин. 16:22	Господем бо возвратятся и приидут в Сион с радостию и со веселием вечным: на главе бо их веселие и хвала, и радость приимет я: отбеже болезнь и печаль и воздыхание.
51:12 См.: 🔗Мф. 10:28 🔗Пс. 89:6	Аз есмь, Аз есмь Утешаяй тя: разумей, кто сый убоялся еси человека смертна и сына человеча, иже яко трава изсхоша,
51:13 См.: 🔗Иер. 51:15	и забыл еси Бога Создавшаго тя, Сотворшаго небо и основавшаго землю: и боялся еси присно во вся дни лица ярости стужающаго тебе: како бо восхоте взяти тя, и ныне где ярость стужающаго тебе?
51:14	Внегда бо спастися тебе, не станет, ниже умедлит:
51:15 См.: 🔗Иов. 26:12 🔗Ис. 54:5	яко Аз Бог твой, возмущаяй море и творяй шум волнам его: Господь Саваоф имя Мне.
51:16 См.: 🔗Ис. 49:2	Положу словеса Моя во уста твоя и под сению руки Моея покрыю тя, еюже поставих небо и основах землю: и речет Сиону: людие Мои есте вы.
51:17 См.: 🔗Пс. 59:5 🔗Иер. 25:15 🔗Иез. 23:31	Востани, востани, воскресени, Иерусалиме, испивый чашу ярости от руки Господни: чашу бо падения, фиал ярости испил и истощил еси,
51:18	и не бысть утешаяй тебе от всех чад твоих, яже родил еси, и не бысть подемлющаго руки твоея, ниже от всех сынов твоих, ихже вознесл еси.
51:19 См.: 🔗Ис. 47:9	Два сия противна тебе, кто сожалеет тебе? Падение и сокрушение, глад и мечь, кто утешит тя?
51:20	Сынове твои обнищавшии, седяще на краи всякаго исхода, яко свекла недовареная, исполнени ярости Господни, разслаблени Господем Богом.
51:21 См.: 🔗Иер. 25:18	Сего ради слыши, смиренный и упивыйся не вином:
51:22 См.: 🔗Ис. 51:17	тако глаголет Господь Бог судяй людем Своим: се, взях от руки твоея чашу падения, фиал ярости Моея, и не приложиши ксему пити ея:
51:23 См.: 🔗Пс. 74:9 🔗Пс. 128:3 🔗Ис. 49:26	и вложу ю в руце преобидевших тя и смиривших тя, иже рекоша души твоей: преклонися, да минем: и положил еси равно земли плещы твоя отвне мимоходящым.