Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 14 | |
14:1 | В лето второе Иоаса сына Иоахаза царя Израилева, и воцарися Амессиа сын Иоасов, царь Иудин: |
14:2 См.: 🔗2Пар. 25:1 | сын двадесяти пяти лет бе, внегда царствовати ему и двадесять пять лет царствова во Иерусалиме. Имя же матере его Иоадина от Иерусалима. |
14:3 | И сотвори правое пред очима Господнима, обаче не якоже Давид отец его: по всем, елика сотвори отец его Иоас, сотвори, |
14:4 | токмо высоких не разруши: еще людие жряху и кадяху на высоких. |
14:5 | И бысть егда утвердися царство в руку его, и изби рабы своя убившыя отца его: |
14:6 | сынов же убийц тех не изби, якоже писано в книзе закона Моисеова, якоже заповеда Господь, глаголя: да не умирают отцы за сыны, и сынове да не умирают за отцы, но токмо кийждо за своя грехи да умрет. |
14:7 См.: 🔗2Пар. 25:11 | Сей порази Едома в Гемеле десять тысящ и взя Камень и на брани, и нарече имя ему Иефоил до днешняго дне. |
14:8 См.: 🔗4Цар. 13:12 🔗2Пар. 25:17 | Тогда посла Амессиа послы ко Иоасу сыну Иоахаза сына Ииуа царя Израилева, глаголя: прииди, да видимся в лице. |
14:9 См.: 🔗Суд. 9:14 🔗2Пар. 25:18 | И посла Иоас царь Израилев ко Амессии царю Иудину, глаголя: терн, иже в Ливане, посла к кедрови сущему в Ливане, глаголя: даждь дщерь твою сыну моему в жену: и приидоша зверие лужнии, иже в Ливане, и попраша терние:: |
14:10 | побивая поразил еси Идумею, и вознесе тя сердце твое, прославися седя в дому твоем, и почто любопришися в злобе твоей? И падеши ты, и Иуда с тобою. |
14:11 См.: 🔗2Пар. 25:20 | И не послуша Амессиа. И взыде Иоас царь Израилев, и видестася лицем той и Амессиа царь Иудин в Вефсамисе Иудине. |
14:12 См.: 🔗2Пар. 25:22 | И паде Иуда пред лицем Израилевым, и побеже кийждо в домы своя. |
14:13 См.: 🔗Зах. 14:10 | И Амессию сына Иоасова, сына Охозии, царя Иудина, ят Иоас сын Иоахазов царь Израилев в Вефсамисе: и прииде во Иерусалим, и разби стену Иерусалиму от врат Ефремлих до врат уголных, на четыреста лакот: |
14:14 См.: 🔗2Пар. 25:24 | и взя сребро и злато, и вся сосуды обретеныя в дому Господни и в сокровищах дому царева, и сыны смесившихся, и возвратися в Самарию. |
14:15 См.: 🔗2Пар. 25:26 | И прочая словес Иоасовых, елика сотвори в силе своей, якоже брася со Амессиею царем Иудиных, не сия ли писана в книзе словес дний царей Израилевых? |
14:16 См.: 🔗4Цар. 13:13 | И успе Иоас со отцы своими и погребен бысть в Самарии с цари и Израилевыми. И воцарися Иеровоам сын его вместо его. |
14:17 См.: 🔗2Пар. 25:25 | И поживе Амессиа сын Иоасов, царь Иудин, по умертвии Иоаса сына Иоахаза царя Израилева пятьнадесять лет. |
14:18 См.: 🔗2Пар. 25:26 | И прочая словес Амессиевых, и вся елика сотвори, не сия ли писана в книзе словес дний царей Иудиных? |
14:19 См.: 🔗3Цар. 15:27 🔗4Цар. 12:20 | И восташа на него полки во Иерусалиме: и убеже в Лахисы, и послаша вслед его в Лахисы, и убиша его ту: |
14:20 См.: 🔗2Пар. 25:28 | и взяша его на кони, и погребен бысть со отцы своими во Иерусалиме во граде Давидове. |
14:21 См.: 🔗4Цар. 15:1 🔗2Пар. 26:1 | И пояша вси людие Иудины Азарию, и той сын шестинадесяти лет, и поставиша его царем вместо отца его Амессии: |
14:22 См.: 🔗Втор. 2:8 🔗2Пар. 26:2 | той созда Елоф, и возврати его Иуде по умертвии царя со отцы его. |
14:23 | В лето пятоенадесять Амессии сына Иоаса царя Иудина, царствова Иеровоам сын Иоасов над Израилем в Самарии четыредесять и едино лето, |
14:24 См.: 🔗3Цар. 15:26 🔗4Цар. 13:2 | и сотвори лукавое пред Господем: не отступи от всех грехов Иеровоама сына Наватова, иже в грех введе Израиля: |
14:25 См.: 🔗Чис. 34:3 🔗Ион. 1:1 | той приврати предел Израилев от входа Емафова даже и до моря аравитскаго, по глаголу Господа Бога Израилева, егоже глагола и рукою раба Своего Ионы, сына Амафиина, пророка, иже от Гефаховера, |
14:26 См.: 🔗4Цар. 13:4 🔗Втор. 32:36 | яко виде Господь смирение Израилево горько зело, и мало содержимых, и умаленных, и оставленых, и не бе помогающаго им. |
14:27 | И не глагола Господь искоренити семене Израилева под небесем: и спасе я рукою Иеровоама сына Иоасова. |
14:28 См.: 🔗2Пар. 12:15 | И прочая словес Иеровоамовых, и вся елика сотвори, и силы его, елика повоева, и како возврати Дамаск и Емаф Иуде во Израили, не сия ли писана в книзе словес дний царей Израилевых? |
14:29 См.: 🔗4Цар. 15:8 | И успе Иеровоам со отцы своими, со цари Израилевыми: и воцарися Захариа сын его вместо его. |