Книга Числа, глава 14

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 14
14:1 См.: 🔗Чис. 21:5 🔗Втор. 1:27 🔗Пс. 105:25	И взем весь сонм, даде глас: и плакахуся людие всю нощь ту:
14:2 См.: 🔗Чис. 16:3	и роптаху на Моисеа и Аарона вси сынове Израилтестии, и рекоша к ним весь сонм:
14:3 См.: 🔗3Езд. 1:18	о дабы умерли быхом в земли Египетстей, или в пустыни сей да быхом умерли: и вскую вводит нас Господь в землю сию, еже пасти на брани? Жены нашя и дети наша будут в разграбление: ныне убо лучше есть нам возвратитися во Египет.
14:4	И рече друг ко другу: поставим себе старейшину, и возвратимся бо Египет.
14:5 См.: 🔗Чис. 16:4	И падоста Моисей и Аарон ниц пред всем сонмом сынов Израилевых.
14:6 См.: 🔗Сир. 46:9 🔗1Мак. 2:55	Иисус же сын Навин и Халев сын Иефонниин от соглядавших землю, растерзаста ризы своя.
14:7	И рекоста ко всему сонму сынов Израилевых, глаголюще: земля, юже соглядахом, добра есть зело зело:
14:8 См.: 🔗Исх. 3:8 🔗Чис. 13:28	аще любит нас Господь, введет нас в землю ту и даст ю нам: земля же есть кипящая медом и млеком:
14:9 См.: 🔗Втор. 20:3 🔗Втор. 32:42	но от Господа не будите отступницы: вы же не убойтеся людий земли тоя, понеже в снедь нам есть: отступило бо время от них, Господь же с нами: не убойтеся их.
14:10 См.: 🔗Исх. 17:4	И рече весь сонм побити их камением: и слава Господня явися во облаце над скиниею свидения всем сыном Израилевым.
14:11	И рече Господь к Моисею: доколе преогорчевают Мя людие сии? И доколе не веруют Мне во всех знамениих, яже сотворих в них?
14:12 См.: 🔗Исх. 32:10	Поражу их смертию и погублю их: и сотворю тя и дом отца твоего в язык велик и мног паче нежели сей.
14:13 См.: 🔗Исх. 32:12	И рече Моисей ко Господу: иуслышат Египтяне, яко возвел еси крепостию Твоею люди Твоя сия от них:
14:14 См.: 🔗Исх. 13:21	но и вси живущии на земли сей слышаша, яко Ты еси Господь в людех сих, иже очима ко очесем являешися, Господи, и облак Твой ста над ними, и столпом облачным идеши Ты пред ними в день, и столпом огненным в нощи:
14:15 См.: 🔗Исх. 32:12	и потребиши люди сия аки единаго человека: и рекут вси языцы, елицы слышаша имя Твое, глаголюще:
14:16 См.: 🔗Втор. 9:28	занеже не возможе Господь людий Своих ввести в землю, о нейже клятся им, погуби их в пустыни:
14:17	и ныне да вознесется рука Твоя, Господи, якоже рекл еси, глаголя:
14:18 См.: 🔗Пс. 102:8 🔗Исх. 20:5 🔗Втор. 5:9 🔗Иер. 32:18	Господь долготерпелив и многомилостив и истинен, отемляй беззакония и неправды и грехи, и очищением не очистит повиннаго, отдая грехи отцев на чада, до третияго и четвертаго рода:
14:19 См.: 🔗Исх. 32:12	остави грех людем сим по велицей милости Твоей, якоже милостив был еси им от Египта даже до ныне.
14:20	И рече Господь к Моисею: милостив им есмь по словеси твоему:
14:21 См.: 🔗Втор. 1:35	но живу Аз, и присно живет имя Мое, и наполнит слава Господня всю землю:
14:22 См.: 🔗Неем. 4:12 🔗Еккл. 7:20	яко вси мужие видящии славу Мою и знамения, яже сотворих во Египте и в пустыни сей, и искусиша Мя, се, десятое, и не послушаша гласа Моего,
14:23 См.: 🔗Втор. 1:35 🔗Пс. 94:11 🔗Евр. 3:11	истинно не узрят земли, еюже кляхся отцем их: разве чадом их, яже суть со Мною зде, иже не ведят добра и зла, всяк юноша не ведый, сим дам землю: вси же разгневавшии Мя не узрят ю:
14:24 См.: 🔗Нав. 14:6 🔗Суд. 1:20 🔗1Мак. 2:56	раб же Мой Халев, яко бысть дух ин в нем, и возследова Мне, введу его в землю, в нюже ходил тамо, и семя его наследит ю:
14:25	Амалик же и Хананей живут во юдоли: утре возвратитеся и подвигнитеся вы в пустыню путем моря Чермнаго.
14:26	И рече Господь к Моисею и Аарону, глаголя:
14:27 См.: 🔗Пс. 105:25	доколе сонм сей злый? Яже они ропщут противу Мне, роптание сынов Израилевых, имже возропташа о вас, слышах:
14:28	рцы им: живу Аз, глаголет Господь: истинно, якоже глаголасте во ушы Мои, тако сотворю вам:
14:29 См.: 🔗Чис. 26:65 🔗Чис. 32:11 🔗Втор. 1:35 🔗Пс. 105:26	в пустыни сей падут телеса ваша, и все соглядание ваше, и сочтения ваша, от двадесяти лет и вышше, елицы ропташа на Мя:
14:30 См.: 🔗Чис. 26:65 🔗Втор. 1:36 🔗Нав. 14:6	аще вы внидете в землю, на нюже прострох руку Мою, вселити вас на ней, разве Халев сын Иефонниин и Иисус сын Навин:
14:31	и чада ваша, ихже ресте в разграблении быти, введу Я в землю, и наследят землю, от неяже вы отвергостеся:
14:32	и телеса ваша падут в пустыни сей:
14:33 См.: 🔗Пс. 94:10	сынове же ваши пасоми будут в пустыни четыредесять лет, и носити имут блужение ваше, дондеже потребятся телеса ваша в пустыни:
14:34 См.: 🔗Пс. 94:10	по числу дний, в нихже соглядасте землю, четыредесять дний, за день лето целое, понесете грехи вашя четыредесять лет, и увесте ярость гнева Моего:
14:35	Аз Господь глаголах вам: истинно тако сотворю сонму сему злому, воставшему на Мя: в пустыни сей потребятся, и тамо измрут.
14:36	И мужие, ихже посыла Моисей соглядати землю, и пришедше возропташа на ню к сонму, еже бы изнести словеса зла о земли,
14:37 См.: 🔗Иуд. 1:5 🔗1Кор. 10:10 🔗Евр. 3:11	и изомроша мужи, глаголавшии о земли зло, язвою пред Господем:
14:38 См.: 🔗Сир. 46:10	и Иисус сын Навин и Халев сын Иефонниин живы остастася от мужей тех ходивших соглядати землю.
14:39	И глагола Моисей словеса сия ко всем сыном Израилевым: и восплакашася людие зело,
14:40 См.: 🔗Втор. 1:41	и воставше заутра, взыдоша на верх горы, глаголюще: се, мы взыдем на место, еже рече Господь, яко согрешихом.
14:41	И рече Моисей: вскую вы преступаете слово Господне? Не благопоспешно будет вам:
14:42	не восходите: несть бо Господь с вами: и падете пред лицем враг ваших:
14:43	зане Амалик и Хананей тамо пред вами, и падете мечем, понеже отвратистеся, не покаряющеся Господу, и не будет Господь с вами.
14:44 См.: 🔗Втор. 1:43	И понудившеся взыдоша на верх горы: кивот же завета Господня и Моисей не двигнушася из среды полка.
14:45 См.: 🔗Суд. 1:17	И сниде Амалик и Хананей седяй в горе той, и сотроша их, и изсекоша их даже до Ермана: и возвратишася в полк.