Книга Бытия, глава 49

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 49
49:1 См.: 🔗Втор. 33:1	Призва же Иаков сыны своя и рече им: соберитеся, да возвещу вам, что срящет вас в последния дни:
49:2	соберитеся и послушайте мене, сынове Иаковли, послушайте Израиля, послушайте отца вашего.
49:3 См.: 🔗Быт. 29:32 🔗Втор. 21:17	Рувим, первенец мой, ты крепость моя и начало чад моих: жесток терпети и жесток упорник:
49:4 См.: 🔗Быт. 35:22 🔗1Пар. 5:1	досадил еси яко вода, да не воскипиши: возшел бо еси на ложе отца твоего, тогда осквернил еси постелю, идеже возшел еси.
49:5 См.: 🔗Быт. 34:25 🔗Иудиф. 9:2	Симеон и Левий братия совершиста обиду от воли своея:
49:6 См.: 🔗Быт. 34:26	в совет их да не приидет душа моя, и к собранию их да не прилепятся внутренняя моя: яко во гневе своем избиста человеки, и в похоти своей пререзаста жилы юнца:
49:7 См.: 🔗Нав. 19:1 🔗Нав. 21:3	проклята ярость их, яко упорна, и гнев их, яко ожесточися: разделю их во Иакове и разсею их во Израили.
49:8 См.: 🔗1Пар. 4:27	Иудо, тебе похвалят братия твоя, руце твои на плещу враг твоих: поклонятся тебе сынове отца твоего:
49:9 См.: 🔗Чис. 24:9	скимен львов Иуда: от леторасли, сыне мой, возшел еси: возлег уснул еси яко лев и яко скимен: кто возбудит его?
49:10 См.: 🔗1Пар. 5:2 🔗Ин. 1:45 🔗Ин. 5:46 🔗Мф. 2:6	Не оскудеет князь от Иуды и вождь от чресл его, дондеже приидут отложеная Ему, и Той чаяние языков:
49:11 См.: 🔗Ис. 63:1	привязуяй к лозе жребя свое и к винничию жребца осляте своего, исперет вином одежду свою и кровию гроздия одеяние свое:
49:12 См.: 🔗Отк. 1:14	радостотворны очи его паче вина, и белы зубы его паче млека.
49:13 См.: 🔗Нав. 19:10	Завулон при мори вселится, и той на пристанищи кораблей, и прострется даже до Сидона.
49:14 См.: 🔗Суд. 5:15	Иссахар доброе возжела, почивая посреде пределов,
49:15 См.: 🔗Втор. 33:18	и видев покой, яко добр, и землю, яко тучна, подложи рамы свои на труд, и бысть муж земледелец.
49:16 См.: 🔗Суд. 13:25	Дан судити имать люди своя, яко и едино племя во Израили,
49:17 См.: 🔗Суд. 18:1	и да будет Дан змий на пути, седяй на распутии, угрызая пяту конску:
49:18 См.: 🔗Пс. 118:166 🔗Лк. 2:30	и падет конник вспять, спасения ждый Господня.
49:19 См.: 🔗Чис. 32:17	Гад, искушение искусит его: он же искусит того при ногах.
49:20 См.: 🔗Втор. 33:24	Асир, тучен его хлеб, и той даст пищу князем.
49:21 См.: 🔗Суд. 4:6	Неффалим стебль распущающаяся, издаяй во отрасли доброту.
49:22 См.: 🔗Быт. 48:16	Сын возращен Иосиф, сын возращен мой ревностный, сын мой юнейший, ко мне обратися:
49:23	на негоже советующе укоряху и наляцаху нань господие стреляний,
49:24 См.: 🔗Втор. 33:17	и сотрошася с крепостию луки их, и разслабеша жилы мышцей рук их, рукою сильнаго Иакова: оттуду укрепися Израиль от Бога отца твоего,
49:25	и поможе тебе Бог мой, и благослови тя благословением небесным свыше и благословением земли и имущия вся: благословения ради сосцев и ложесн,
49:26 См.: 🔗Втор. 33:16	благословения отца твоего и матере твоея: преодоле паче благословения гор пребывающих и благословения холмов вечных: будут на главе Иосифове и на версе (главы) братий, имиже обладаше.
49:27 См.: 🔗Суд. 20:21	Вениамин волк хищник, рано яст еще и на вечер дает пищу.
49:28 См.: 🔗Сир. 44:26	Вси сии сынове Иаковли дванадесять: и сия глагола им отец их, и благослови их: коегождо по благословению его благослови их,
49:29 См.: 🔗Быт. 25:8 🔗Быт. 47:30	и рече им: аз прилагаюся к людем моим: погребите мя со отцы моими в пещере, яже есть в селе Ефрона Хеттеанина,
49:30 См.: 🔗Быт. 23:16 🔗Быт. 50:13 🔗Деян. 7:16	в пещере Сугубей, яже прямо Мамврии в земли Ханаани, юже стяжа Авраам пещеру у Ефрона Хеттеанина в стяжание гроба.
49:31 См.: 🔗Быт. 25:9 🔗Быт. 35:29	Тамо погребоша Авраама и Сарру жену его, тамо погребоша Исаака и Ревекку жену его, тамо погребоша Лию,
49:32	в стяжании села и пещеры, яже есть в нем у сынов Хеттеовых.
49:33 См.: 🔗Деян. 7:15	И преста Иаков завещая сыном своим, и возложив Иаков нозе свои на одр умре, и приложися к людем своим.