Деяния святых Апостолов, глава 11

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 11
11:1 См.: 🔗Деян. 10:44	Слышаша же Апостоли и братия сущии во Иудеи, яко и языцы прияша слово Божие.
11:2	И егда взыде Петр во Иерусалим, препирахуся с ним иже от обрезания,
11:3	глаголюще, яко к мужем обрезания не имущым вшел еси и ял еси с ними.
11:4	Начен же Петр, сказоваше им поряду, глаголя:
11:5	аз бех во граде Июппийстем моляся и видех во ужасе видение, сходящь сосуд некий, яко плащаницу велию, от четырех краев низпущаему с небесе, и прииде даже до мене:
11:6	в нюже воззрев смотрях, и видех четвероногая земная и звери и гады и птицы небесныя.
11:7	Слышах же глас глаголющь мне: востав, Петре, заколи и яждь.
11:8	Рех же: никакоже, Господи, яко всяко скверно или нечисто николиже вниде во уста моя.
11:9	Отвеща же ми глас вторицею с небесе глаголющь: яже Бог очистил есть, ты не скверни.
11:10	Сие же бысть трижды: и паки взяшася вся на небо.
11:11	И се, абие трие мужие сташа пред храминою, в нейже бех, послани от Кесарии ко мне.
11:12 См.: 🔗Деян. 10:20 🔗Деян. 15:7	Рече же ми Дух ити с ними, ничтоже разсуждая: приидоша же со мною и шесть братия сии, и внидохом в дом мужа.
11:13	И возвести нам, како виде Ангела (свята) в дому своем, ставша и рекша ему: посли во Июппию мужы и призови Симона, нарицаемаго Петра,
11:14	иже речет глаголы к тебе, в нихже спасешися ты и весь дом твой.
11:15 См.: 🔗Деян. 2:2	Внегда же начах глаголати, нападе Дух Святый на них, якоже и на ны в начале.
11:16 См.: 🔗Мф. 3:11 🔗Мк. 1:8 🔗Деян. 1:5 🔗Деян. 19:4	Помянух же глаголгол Господень, якоже глаголаше: Иоанн убо крестил есть водою, вы же имате креститися Духом Святым.
11:17	Аще убо равен дар даде им Бог, якоже и нам веровавшым в Господа нашего Иисуса Христа, аз же кто бех могий возбранити Бога?
11:18	Слышавше же сия умолкоша и славляху Бога, глаголюще: убо и языком Бог покаяние даде в живот.
11:19 См.: 🔗Деян. 8:1	Разсеявшиися убо от скорби, бывшия при Стефане, проидоша даже до Финикии и Кипра и Антиохии, ни единому же глаголюще слово, токмо Иудеем.
11:20	Бяху же нецыи от них мужие Кипрстии и Киринейстии, иже, вшедше во Антиохию, глаголаху к Еллином, благовествующе Господа Иисуса.
11:21 См.: 🔗Деян. 5:14	И бе рука Господня с ними: многое же число веровавше обратишася ко Господу.
11:22	Слышано же бысть слово о них во ушию церкве сущия во Иерусалиме, и послаша Варнаву преити даже до Антиохии:
11:23 См.: 🔗Деян. 14:22	иже пришед и видев благодать Божию, возрадовася и моляше всех изволением сердца терпети о Господе:
11:24	яко бе муж благ и исполнь Духа Свята и веры. И приложися народ мног Господеви.
11:25 См.: 🔗Деян. 9:30	Изыде же Варнава в Тарс взыскати Савла, и обрет его, приведе его во Антиохию:
11:26	бысть же им лето цело собиратися в церкви и учити народ мног, нарещи же прежде во Антиохии ученики Христианы.
11:27 См.: 🔗Деян. 13:1 🔗Деян. 15:32	В тыя же дни снидоша от Иерусалима пророцы во Антиохию:
11:28 См.: 🔗Деян. 21:10	востав же един от них, именем Агав, назнаменаше Духом глад велик хотящь быти по всей вселенней, иже и бысть при Клавдии кесари:
11:29 См.: 🔗Деян. 24:17	от ученик же, по елику кто имеяше что, изволиша кийждо их на службу послати живущым во Иудеи братиям,
11:30 См.: 🔗Рим. 15:25 🔗2Кор. 8:4 🔗2Кор. 9:8	еже и сотвориша, пославше к старцем рукою Варнавлею и Савлею.