Книга пророка Иеремии, глава 25

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 25
25:1	Слово, еже бысть ко Иеремии на вся люди Иудины, в лето четвертое Иоакима сына Иосиина, царя Иудина: то лето первое Навуходоносора царя Вавилонскаго:
25:2	еже глагола Иеремиа пророк ко всем людем Иудиным и ко всем обитателем Иерусалима, рекий:
25:3	в третиенадесять лето Иосии сына Амосова, царя Иудина, и даже до дне сего, сие двадесять третие лето, бысть слово Господне ко мне, и глаголах к вам, заутра востая и глаголя: и не слышасте.
25:4 См.: 🔗Иер. 7:25 🔗Иер. 29:19 🔗Иер. 44:4	И посылаше Господь к вам всех раб Своих пророк, востая заутра и посылая: и не слышасте, ни приклонисте ушес ваших, да слышите, егда глаголаше:
25:5 См.: 🔗4Цар. 17:13 🔗Иер. 18:11 🔗Иер. 35:15 🔗Ион. 3:8	отвратитеся кийждо от пути своего злаго и от злейших умышлений ваших, и обитати будете в земли, юже Господь даде вам и отцем вашым, от века даже и до века:
25:6 См.: 🔗Втор. 8:19 🔗Втор. 11:28 🔗Иер. 7:6	и не ходите вслед богов чуждих, еже служити им и покланятися им, да не прогневаете Мя в делех рук ваших, еже озлобити вас.
25:7	И не послушасте Мя, рече Господь, еже не подвизати Мя ко гневу в делех руку вашею на зло вам.
25:8	Сего ради сия глаголет Господь Сил: понеже не послушасте словес Моих,
25:9 См.: 🔗4Цар. 17:23 🔗Иер. 19:4	се, Аз послю и возму вся племена северска, (рече Господь,) и Навуходоносора царя Вавилонска раба Моего: и приведу их на землю сию и на обитатели ея и на вся языки, иже окрест ея, и убию их и поставлю их во ужас и во звиздание и в поношение вечное:
25:10 См.: 🔗Ис. 24:8 🔗Иер. 7:34	и погублю от них глас радости и глас веселия, глас жениха и глас невесты, благоухание мира и свет светилника:
25:11	и будет вся земля сия в запустение и во ужас, и поработают сии во языцех царю Вавилонску седмьдесят лет.
25:12 См.: 🔗2Пар. 36:21 🔗1Езд. 1:1 🔗Иер. 29:10 🔗Дан. 9:2	Егда же исполнени будут седмьдесят лет, посещу на царя Вавилонска и на язык оный, рече Господь, беззакония их, и на землю Халдейску, и положу тую в запустение вечное,
25:13	и наведу на землю ону вся словеса Моя, яже глаголах на ню, вся писанная в книзе сей, и елика пророчествова Иеремиа на вся языки:
25:14 См.: 🔗Иер. 27:7	яко работаша им, егда беша языцы мнози и царие велицы, и воздам им по делом их и по творению рук их,
25:15 См.: 🔗Отк. 16:19	елико прорече Иеремиа до всех стран: тако бо глаголет Господь Бог Израилев: возми чашу вина нераствореннаго от руки Моея, да напоиши вся языки, к нимже Аз послю тя.
25:16 См.: 🔗Наум. 3:11	И испиют и изблюют, и обуяют от лица меча, егоже Аз послю среде их.
25:17	И взях чашу от руки Господни и напоих вся языки, к нимже посла мя Господь:
25:18 См.: 🔗Ис. 51:21 🔗Иер. 29:22 🔗Иер. 42:18	Иерусалима и грады Иудины, и цари его и князи его, яко положити я во опустение и в непрохождение, и во звиздание и в проклятие, яко день сей,
25:19 См.: 🔗Иер. 46:2	и фараона царя Египетскаго и отроков его, и вельможы его и вся люди его
25:20	и вся примесники его, и вся цари земли Ус и вся цари иноплеменников, Аскалона и Газу, и Аккарона и останок Азота,
25:21 См.: 🔗Иер. 48:1	и Идумею и Моавитиду и сыны Аммони,
25:22	и вся цари Тирски и цари Сидонски и цари, иже об ону страну моря,
25:23 См.: 🔗Лев. 19:27 🔗Иер. 9:26	и Дедана и Фемана, и Роса и всякаго остриженаго по лицу его,
25:24	и вся цари Аравии и вся смесники обитающыя в пустыни,
25:25 См.: 🔗Иер. 49:34	и вся цари Замврийския и вся цари Еламския, и вся цари Персския
25:26 См.: 🔗Иер. 51:41	и вся цари от восточия, дальния и ближния, коегождо ко брату его, и вся царства, яже на лицы земли, и царь Сесах испиет последи их.
25:27 См.: 🔗Иер. 51:7 🔗Ис. 51:21	И речеши им: тако рече Господь Сил, Бог Израилев: пийте и упийтеся, и изблюйте и падите, и не востаните от лица меча, егоже Аз послю среде вас.
25:28	И будет, егда не восхотят прияти чаши от руки твоея, еже пити, речеши к ним: тако рече Господь: пиюще пийте.
25:29 См.: 🔗1Пет. 4:17	Яко во граде, в немже именовася имя Мое, Аз начну озлобляти, и вы очищением не очиститеся: понеже мечь Аз призываю на вся седящыя на земли, рече Господь Сил.
25:30 См.: 🔗Иоил. 3:16 🔗Ам. 1:2	Ты же проречеши на них вся словеса сия и речеши: Господь с высоты суд воздаст, от святаго Своего даст глас Свой, слово проречет на место Свое, сии же яко объемлюще виноград отвещают: и на вся седящыя на земли прииде пагуба,
25:31 См.: 🔗Иоил. 3:2 🔗Соф. 3:8 🔗Отк. 19:15	на часть земли, яко суд во языцех Господу: судитися имать Той со всякою плотию, нечестивии же предани быша мечу, глаголет Господь.
25:32	Тако глаголет Господь: се, злая грядут от языка на язык, и вихорь велик исходит от конца земли.
25:33 См.: 🔗Ис. 34:3 🔗Иер. 7:33 🔗Отк. 11:8	И будут язвении от Господа в день Господень, от края земли и до края земли: не оплачутся, ниже соберутся и не погребутся, в гной на лицы земли будут.
25:34 См.: 🔗Ис. 65:12	Воскликните, пастуси и возопийте, и восплачите, овни овчии, яко исполнишася дние ваши на заколение, и падете якоже овни избраннии,
25:35	и изгибнет бегство от пастухов и спасение от овнов овчих.
25:36	Глас вопля пастырска и кличь овец и овнов, яко потреби Господь пажити их:
25:37	и умолкнут останцы мира от лица ярости гнева Господня.
25:38	Остави якоже лев виталище Свое, яко бысть земля их в непрохождение от лица меча великаго.