Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 45 | |
45:1 См.: 🔗Деян. 7:13 🔗Быт. 42:7 | И не можаше Иосиф удержатися всем предстоящым ему, но рече: отослите всех от мене. И не предстояше ни един Иосифу, егда познавашеся братии своей. |
45:2 | И испусти глас с плачем: слышаша же вси Египтяне, и слышано бысть в дому фараонове. |
45:3 | Рече же Иосиф братии своей: аз есмь Иосиф: еще ли отец мой жив есть? И не могоша братия отвещати ему: смутишася бо. |
45:4 См.: 🔗Деян. 7:13 | Рече же Иосиф братии своей: приближитеся ко мне. И приближишася. И рече: аз есмь Иосиф, брат ваш, егоже продасте во Египет: |
45:5 См.: 🔗Быт. 50:20 | ныне убо не скорбите, ниже жестоко вам да явится, яко продасте мя семо: на жизнь бо посла мя Бог пред вами: |
45:6 | сие бо второе лето глад на земли, и еще пять лет оста, в нихже не будет орания, ни жатвы: |
45:7 | посла бо мя Бог пред вами оставити вам останок на земли и препитати ваш останок велий: |
45:8 См.: 🔗Прем. 10:14 🔗Быт. 50:20 | ныне убо не вы посласте мя семо, но Бог: и сотвори мя яко отца фараону и господина всему дому его и князя всей земли Египетстей: |
45:9 См.: 🔗Деян. 7:14 | потщавшеся убо, взыдите ко отцу моему и рцыте ему: сия глаголет сын твой Иосиф: сотвори мя Бог господина всей земли Египетстей: сниди убо ко мне и не умедли: |
45:10 См.: 🔗Быт. 46:28 | и вселишися в земли Гесемли аравийстей, и будеши близ мене ты и сынове твои, и сынове сынов твоих, овцы твоя и волове твои, и елика суть твоя: |
45:11 | и препитаю тя тамо, еще бо пять лет будет глад на земли, да не погибнеши ты и сынове твои, и вся имения твоя. |
45:12 | Се, очи ваши видят, и очи Вениамина брата моего, яко уста моя глаголющая к вам: |
45:13 | возвестите убо отцу моему всю славу мою сущую во Египте, и елика видите: и ускоривше, приведите отца моего семо. |
45:14 См.: 🔗Быт. 33:4 🔗Быт. 46:29 | И напад на выю Вениамина, брата своего, плакася над ним, и Вениамин плакася на выи его. |
45:15 См.: 🔗Исх. 4:27 | И облобызав всю братию свою, плакася над ними: и по сих глаголаша к нему братия его. |
45:16 | И пронесеся глас в дому фараонове, глаголюще: приидоша братия Иосифова. Возрадовася же фараон и раби его. |
45:17 | Рече же фараон ко Иосифу: рцы братии своей: сие сотворите: наполните сосуды вашя (пшеницы) и идите в землю Ханааню, |
45:18 | и вземше отца вашего и имения ваша, приидите ко мне: и дам вам от всех благ Египетских, и снесте тук земли: |
45:19 | ты же заповеждь сия: взяти им колесницы от земли Египетския, детем их и женам их: и поимше отца своего, приидите: |
45:20 | и не пощадите очима сосудов ваших: вся бо благая Египетская вам будут. |
45:21 См.: 🔗Деян. 7:14 | Сотвориша же тако сынове Израилевы: даде же им Иосиф колесницы по повелению фараона царя (Египетска), и даде им брашно на путь: |
45:22 | и всем даде сугубы ризы, Вениамину же даде триста златниц и пятеры ризы пременныя: |
45:23 | и отцу своему посла такожде, и десять ослов везущих от всех благ Египетских, и десять мсков везущих хлебы на путь отцу его. |
45:24 | И отпусти братию свою. И отидоша. И рече им: не гневайтеся на пути. |
45:25 | Изыдоша же из Египта и приидоша в землю Ханааню ко Иакову отцу своему |
45:26 | и поведаша ему глаголюще: яко сын твой Иосиф жив есть, и он владеет над всею землею Египетскою. И ужасеся в мысли Иаков: не вероваше бо им. |
45:27 | Глаголаша же ему вся реченная от Иосифа, елика рече им. Узрев же колесницы, яже посла Иосиф, еже взяти его, оживе дух Иакова, отца их, |
45:28 См.: 🔗Быт. 46:30 | и рече Израиль: велико ми есть (сие), аще еще Иосиф сын мой жив есть: шед узрю его, прежде неже умрети ми. |