Книга Премудрости Соломона, глава 8 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 8
8:1	Досязает же от конца даже до конца крепко и управляет вся благо.
8:2 См.: 🔗Сир. 15:2	Сию возлюбих и поисках от юности моея, и взысках невесту привести себе, и любитель бых красоты ея.
8:3	Благородство славит сожитие Божие имущи, и всех Владыка возлюби ю:
8:4	таибница бо есть Божия хитрости и обретателница дел Его.
8:5 См.: 🔗Прем. 7:8	И аще богатство есть вожделенное притяжание в животе, что премудрости богатейше, еюже делаются вся?
8:6	Аще же разум делает, кто ея от сущих лучший художник есть?
8:7	И аще правду любит кто, труды ея суть добродетели: целомудрию бо и разуму учит, правде и мужеству, ихже потребнее ничтоже есть в житии человеком.
8:8 См.: 🔗3Цар. 10:1	Аще же и многаго искусства желает кто, весть древняя и быти хотящая разсмотряет: свесть извития словес и разрешения гаданий, знамения и чудеса проразумевает и сбытия времен и лет.
8:9 См.: 🔗Прит. 7:4	Судих убо сию привести мне к сожитию, ведый, яко будет ми советница благих и утешение попечений и печали.
8:10	Имети буду ради ея славу в народех и честь пред старцы, юн сый:
8:11 См.: 🔗3Цар. 3:28	остр обрящуся в суде, и лица сильных удивятся мне:
8:12 См.: 🔗Иов. 29:21	молчащу ми потерпят и вещающу ми имут внимати, и глаголющу ми о мнозе, руку положат на уста своя.
8:13	Сея ради прииму безсмертие и память вечную сущым по мне оставлю:
8:14 См.: 🔗Прит. 8:11	управлю люди, и языцы покорятся ми:
8:15	убоятся мене слышавшии мучителие страшнии: во множестве явлюся благ и в брани крепок.
8:16	Вшед в дом мой упокоюся с нею: не бо имать горести сообщение ея, ни болезни сожитие тоя, но веселие и радость.
8:17	Сия помыслив во мне, печахся в сердцы моем, яко безсмертие есть в сродстве премудрости,
8:18 См.: 🔗Мк. 4:20	и в содружении ея услаждение благо, и в трудех руку ея богатство без оскудения, и в сообучении беседы ея разум, и благославие в приобщении словес ея, обхождах ишущь, да восприиму ю в себе.
8:19 См.: 🔗Еккл. 12:7	Отрок же бех остроумен, душу же получих благу:
8:20	паче же благ сый приидох в тело нескверно.
8:21 См.: 🔗Флп. 2:13 🔗Иак. 1:17	Познав же, яко не инако одержу, аще не Бог даст, и сие же бе разума, еже ведети, чия есть благодать, приидох ко Господу и молихся Ему, и рекох от всего сердца моего: