Первая книга Царств (Первая книга Самуила), глава 16

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 16
16:1 См.: 🔗1Цар. 17:12 🔗4Цар. 9:1 🔗3Езд. 3:23	И рече Господь к Самуилу: доколе ты плачеши о Сауле, Аз же уничижих его, не царствовати во Израили? Наполни рог твой елеа и прииди, послю тя ко Иессею до Вифлеема, яко узрех в сынех его Себе царя.
16:2	И рече Самуил: како пойду? И услышит Саул, и убиет мя. И рече Господь: юницу от волов возми в руце твои и речеши: пожрети Господеви иду:
16:3 См.: 🔗1Цар. 9:16	и призовеши Иессеа и сыны его к жертве: и Аз ти покажу, яже сотвориши, и помажеши Ми, егоже ти реку.
16:4 См.: 🔗Лк. 2:4	И сотвори Самуил вся, елика рече ему Господь: и прииде в Вифлеем, и ужасошася старейшины града о пришествии его и реша: мир ли вход твой, о, прозорливче?
16:5 См.: 🔗Исх. 19:10	И рече: мир: пожрети Господу приидох: освятитеся и возвеселитеся днесь со мною. И освяти Иессеа и сыны его, и призва я к жертве.
16:6 См.: 🔗1Цар. 17:13	И бысть внегда внити им, и виде Елиава и рече: сей ли пред Господем помазанник Его?
16:7 См.: 🔗Втор. 10:17 🔗Деян. 10:34 🔗1Пар. 28:9 🔗Пс. 7:10 🔗Иер. 11:20 🔗Отк. 2:23	И рече Господь Самуилу: не зри на лице его, ниже на возраст величества его, яко уничижих его: понеже не тако зрит человек, яко зрит Бог: яко человек зрит на лице, Бог же зрит на сердце.
16:8	И призва Иессей Аминадава и представи его пред лице Самуила. И рече (Самуил): ниже сего избра Господь.
16:9 См.: 🔗2Цар. 13:3	И приведе Иессей Саммаа. И рече: и сего не избра Господь.
16:10	И приведе Иессей седмь сынов своих пред Самуила. И рече Самуил ко Иессею: не избра Господь от сих.
16:11 См.: 🔗2Цар. 7:8 🔗Пс. 77:71	И рече Самуил ко Иессею: не достало ли уже детей? И рече Иессей: еще есть един мал, и сей пасет на пажити. И рече Самуил ко Иессею: посли и приведи его, яко не возляжем, дондеже приидет той семо.
16:12 См.: 🔗Пс. 88:21	И посла, и введе его: и той чермен, добрыма очима, и благ взором Господеви. И рече Господь к Самуилу: востани и помажи Давида, яко сей благ есть.
16:13 См.: 🔗Деян. 7:46 🔗Деян. 13:22	И прия Самуил рог со елеем и помаза его посреде братии его. И ношашеся Дух Господень над Давидом от того дне и потом. И воста Самуил и отиде во Армафем.
16:14 См.: 🔗Суд. 16:20 🔗Лк. 19:24	И Дух Господень отступи от Саула, и давляше его дух лукавый от Господа.
16:15	И реша отроцы Сауловы к нему: се, ныне дух лукавый от Господа давит тя:
16:16	да рекут раби твои ныне пред тобою, и взыщут господину нашему мужа знающа пети в гусли: и внегда будет дух лукавый на тебе, и тогда да поет в гусли своя, и благо ти будет, и упокоит тя.
16:17	И рече Саул ко отроком своим: посмотрите ми мужа добре поюща и введите его ко мне.
16:18	И отвеща един от отрок его и рече: се, видех сына Иессеова из Вифлеема, и той весть пение, и муж разумен, и борец, и мудр в словеси, и муж благ видом, и Господь с ним.
16:19 См.: 🔗1Цар. 8:11	И посла Саул вестники ко Иессею, глаголя: отпусти ко мне Давида сына твоего, иже у стада твоего.
16:20 См.: 🔗1Цар. 25:18	И взя Иессей бремя хлебов и мех вина и козля от коз едино, и посла к Саулу рукою Давида сына своего.
16:21 См.: 🔗1Цар. 18:3	И вниде Давид к Саулу, и предстояше пред ним, и возлюби его зело Саул, и бысть ему носяй оружие его.
16:22	И посла Саул ко Иессею, глаголя: да предстоит Давид предо мною, яко обрете благодать пред очима моима.
16:23	И бысть внегда быти духу лукаву на Сауле, и взимаше Давид гусли и играше рукою своею, и отдыхаше Саул, и благо ему бяше, и отступаше от него дух лукавый.