Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 16 | |
16:1 См.: 🔗1Пар. 25:4 | И бысть слово Господне рукою Иуа сына Ананиева ко Ваасе, глаголя: |
16:2 | понеже вознесох тя от земли и дах тя властеля над людьми Моими Израилем, и пошел еси путем Иеровоамлим и ввел еси в грех люди Моя Израиля, еже прогневати Мя суетными их: |
16:3 См.: 🔗4Цар. 9:9 🔗3Цар. 15:29 | се, Аз отвергу наследие Ваасы и наследие дому его, и сотворю дом твой яко дом Иеровоама сына Наватова: |
16:4 См.: 🔗3Цар. 21:24 | умершаго Ваасова во граде снедят его пси, и умершаго на поли снедят его птицы небесныя. |
16:5 См.: 🔗2Пар. 16:11 | И прочая словес Ваасовых, и вся яже сотвори, и сильная его, не се ли, суть писана в книзе словес дний царей Израилевых? |
16:6 | И успе Вааса со отцы своими, и погребен бысть во Ферсе, и воцарися Ила сын его вместо его. |
16:7 См.: 🔗4Цар. 9:9 🔗3Цар. 15:28 | И рукою Иуа сына Анании пророка глагола Господь на Ваасу и на дом его всю злобу, юже сотвори пред Господем, еже прогневати Его делами рук своих, быти ему якоже и дому Иеровоамлю, и о еже ему поражену быти. |
16:8 См.: 🔗3Цар. 14:17 🔗3Цар. 15:21 | В лето двадесять шестое Асы царя Иудина, царствова Ила сын Ваасин над Израилем во Ферсе два лета. |
16:9 | И воздвиже (Господь) на него отроки его, и Замвриа воеводу половины конников: и Ила бе во Ферсе упиваяся, и пиян сый в дому Арсы домостроителя во Ферсе: |
16:10 См.: 🔗4Цар. 9:31 | и вниде Замврий, и порази его, и умертви его, в лето двадесять седмое Асы царя Иудина, и воцарися вместо его. |
16:11 | И бысть царствующу ему, внегда сести ему на престоле его, и изби весь дом Ваасов: не остави ему мочащаго к стене, и ужиков его, и друга его. |
16:12 См.: 🔗3Цар. 16:1 | И изби Замврий весь дом Ваасов по глаголу Господню, егоже глагола на дом Ваасов и ко Иую пророку, |
16:13 См.: 🔗3Цар. 15:34 | о всех гресех Ваасовых и Илы сына его, яко сотвори согрешити Израилю, еже разгневати Господа Бога Израилева суетными их. |
16:14 | Прочая же словес Илы, яже сотвори, не се ли, сия писана в книзе словес дний царей Израилевых? |
16:15 См.: 🔗3Цар. 15:27 | В лето двадесять седмое Асы царя Иудина царствова Замврий седмь дний во Ферсе: и бе полк Израилев на Гавафон иноплеменнический. |
16:16 См.: 🔗4Цар. 8:26 | И слышаша людие сущии в полце, глаголющих: превратися Замврий и порази царя. И поставиша царем во Израили Амвриа воеводу, иже над воями во Израили в день он в полце. |
16:17 См.: 🔗4Цар. 15:14 | И взыде Амврий и весь Израиль с ним от Гавафона и обседе Ферсу. |
16:18 См.: 🔗Мих. 6:16 | И бысть егда увиде Замврий, яко предвзят бысть град его, и вниде во внутренний дом царский, и зажже над собою дом царев огнем, и умре |
16:19 См.: 🔗3Цар. 15:26 | за грехи своя, яже сотвори, сотворения ради лукаваго пред Господем, еже ходити путем Иеровоама сына Наватова, и во гресех его, яже сотвори, яко введе во грех Израиля. |
16:20 | И прочая словес Замврииных, и наветы его, яже совеща, не се ли, сия суть писана в книгах словес дний царей Израилевых? |
16:21 | Тогда разделишася людие Израилстии, пол людий бысть за Фамнием сыном Гонафовым, яко да царствует он, и пол людий бысть со Амврием. |
16:22 | Людие же сущии по Амврии превозмогоша людий бывших со Фамнием сыном Гонафовым и умре Фамний и Иорам брат его во время оно, и воцарися Амврий по фамнии. |
16:23 | В лето тридесять первое Асы царя Иудина царствова Амврий во Израили дванадесять лет, во Ферсе же шесть лет царствова. |
16:24 | И купи Амврий гору Семерон у Семира господина горы двема таланты сребра, и созда гору, и нарече имя горе, юже созда, во имя Семира господина горы оныя, гора Семирон. |
16:25 | И сотвори Амврий лукавое пред Господем, и прелукавнова паче всех бывших пред ним: |
16:26 См.: 🔗3Цар. 15:26 | и хождаше по всем путем Иеровоама сына Наватова и во гресех его, имиже введе во грех Израиля, еже разгневати Господа Бога Израилева в суетных их. |
16:27 | И прочая словес Амвриевых, и вся яже сотвори, и вся сила его, не се ли, сия писана в книзе словес дний царей Израилевых? |
16:28 | И успе Амврий со отцы своими, и погребен бысть в Самарии. И воцарися Ахаав сын его вместо его. |
16:29 | Ахаав же сын Амвриев воцарися над Израилем в лето тридесять осмое Асы царя Иудина: царствова же Ахаав сын Амвриев над Израилем в Самарии двадесять два лета: |
16:30 См.: 🔗4Цар. 10:18 | и сотвори Ахаав лукавое пред Господем, и прелукавнова паче всех бывших прежде его: |
16:31 См.: 🔗Отк. 2:20 | и не бе ему доволно, еже ходити во гресех Иеровоама сына Наватова, и взя жену Иезавель дщерь Иефеваала царя Сидонскаго: и иде, и нача служити Ваалу, и поклонися ему, |
16:32 | и постави требище Ваалу в дому мерзостей его, егоже созда в Самарии: |
16:33 См.: 🔗Втор. 7:5 🔗4Цар. 13:6 | и сотвори Ахаав дубраву: и приложи Ахаав творити прогневания, еже разгневати Господа Бога Израилева и душу свою погубити: злодействова паче всех царей Израилевых бывших прежде его. |
16:34 См.: 🔗Нав. 6:25 | Во дни же его созда Ахиил Вефилянин Иерихон: на Авироне первороднем своем основа его, и на Сегуве юнейшем своем постави двери его, по глаголу Господню, егоже глагола рукою Иисуса сына Навина. |