Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 18 | |
18:1 См.: 🔗1Цар. 19:1 🔗1Цар. 20:17 | И бысть егда преста глаголати к Саулу, и душа Ионафана с душею Давидовою спряжеся, и возлюби его Ионафан от души своея. |
18:2 | И поят его Саул во дни оны и не даде ему возвратитися в дом отца его. |
18:3 См.: 🔗1Цар. 19:1 | И завеща Ионафан и Давид завет, понеже возлюби его от души своея: |
18:4 | и совлече Ионафан ризу свою верхнюю и даде ю Давиду, и ины одежды своя даже до меча своего и до лука своего и до пояса своего. |
18:5 | И хождаше Давид разумно во всех, аможе аще посылаше его Саул: постави же его Саул над мужи воинскими, и угоден бе пред очима всех людий и пред слугами Сауловыми. |
18:6 См.: 🔗Пс. 67:26 | И бысть, внегда входити им, егда возвратися Давид от победы над иноплеменником: и изыдоша (девы) ликовствующыя во сретение Саула царя от всех градов Израилевых поющя и скачущя в тимпанех с радостию и с гусльми. |
18:7 См.: 🔗1Цар. 29:5 🔗Сир. 47:7 | И исхождаху жены ликующя и глаголющя: победи Саул с тысящами своими, а Давид со тмами своими. |
18:8 | И разгневася Саул зело, и лукавы явишася глаголы пред очима сауловыма о словеси сем. И рече Саул: Давиду даша тмы, мне же даша тысящы: и чего ему (несть), точию царства? |
18:9 | И бе Саул подзирая Давида от дне онаго и потом. |
18:10 См.: 🔗1Цар. 16:14 🔗1Цар. 19:9 | И бысть от утрешняго дне, и нападаше дух лукавый от Бога на Саула, и прорицаше посреде дому своего: и Давид пояше рукою своею (в гусли), якоже и по вся дни: копие же в руце Саули: |
18:11 См.: 🔗Евр. 11:34 | и взя Саул копие и рече: поражу Давида к стене. И уклонися Давид от лица его дважды. |
18:12 | И убояся Саул от лица Давидова, яко Господь бе с ним, а от Саула отступи: |
18:13 | и отстави его Саул от себе, и постави его себе тысященачалника: и исхождаше и вхождаше пред людьми. |
18:14 См.: 🔗4Цар. 18:7 | И бе Давид во всех путех своих смысля, и Господь бе с ним. |
18:15 | И виде Саул, яко той смыслит зело, и бояшеся от лица его. |
18:16 См.: 🔗1Цар. 8:20 🔗2Цар. 5:2 | Весь же Израиль и Иуда любляху Давида, яко той вхождаше и исхождаше пред лицем людий. |
18:17 См.: 🔗Нав. 1:18 🔗1Цар. 25:28 | И рече Саул к Давиду: се, дщи моя болшая Меров, сию тебе дам в жену, токмо буди ми в сына силы и поборай брани Господни. И Саул рече: да не будет рука моя на нем, но да будет рука иноплеменнича. |
18:18 См.: 🔗2Цар. 7:18 | И рече Давид к Саулу: кто аз есмь? И кое житие сродства отца моего во Израили, яко да буду зять царский? |
18:19 | И бысть во время, егда даней быти подобаше Мерове дщери Саулове Давиду, сия дадеся Адриилу Молафитскому в жену. |
18:20 | И возлюби Мелхола дщерь Саулова Давида: и возвестися Саулу, и угодно бысть пред очима его слово. |
18:21 | И рече Саул: дам ему ю, и будет ему в соблазн. И бе на Саула рука иноплеменнича. И рече Саул к Давиду: в силах будеши ми зять днесь. |
18:22 | И заповеда Саул отроком своим, глаголя: рцыте вы тайно Давиду, глаголюще: се, благоволит о тебе царь, и вси отроцы его любят тя, и ты буди зять царю. |
18:23 | И глаголаша отроцы Сауловы во ушы Давиду глаголы сия. И рече Давид: еда легко пред очима вашима, еже быти (ми) зятем царю? Аз бо есмь муж смирен и не славен. |
18:24 | И возвестиша отроцы Саулу сия словеса, яже глагола Давид. |
18:25 См.: 🔗2Цар. 3:14 | И рече Саул: тако рцыте Давиду: не хощет царь с богатством (зятя), но токмо во сте краенеобрезаний иноплеменнических отмстити врагом царевым. Саул бо мысляше вдати Давида в руце иноплеменником. |
18:26 | И возвестиша отроцы Сауловы глаголы сия Давиду, и угодна быша словеса сия пред очима Давидовыма, еже быти в зятя царю. |
18:27 См.: 🔗2Цар. 3:14 | И не по мнозех днех, воста Давид и иде сам и мужие его с ним, и уби от иноплеменник двести мужей: и принесе краенеобрезания их царю и вдаде я ему, и бысть зять царю, и вдаде ему царь Мелхолу дщерь свою в жену. |
18:28 | И виде Саул, яко Господь есть с Давидом, и весь Израиль любит его: |
18:29 | и приложи Саул оттоле паче боятися Давида. И бысть Саул враждуя на Давида во вся дни. |
18:30 | И исхождаху князи иноплеменничи, и бысть от начала исхождения их, Давид разумен бе паче всех слуг Сауловых, и почтеся имя его зело. |