Книга пророка Иеремии, глава 18

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 18
18:1	Слово, еже бысть ко Иеремии от Господа, рекущее:
18:2	востани и сниди в дом скудельничь, и тамо услышиши словеса Моя.
18:3	И снидох в дом скудельничь, и се, той творяше дело на каменех.
18:4	И разбися сосуд, егоже той творяше от глины рукама своима: и паки той сотвори из него иный сосуд, якоже угодно во очию его творити.
18:5	И бысть слово Господне ко мне, рекущее:
18:6 См.: 🔗Прем. 15:7 🔗Ис. 45:9 🔗Рим. 9:20	еда, якоже скудельник сей, не возмогу сотворити вас, доме Израилев? Рече Господь: се, якоже брение в руку скудельника, тако вы есте, доме Израилев, в руку Моею:
18:7 См.: 🔗Иер. 1:10	наконец возглаголю на язык и на царство, да искореню их и разорю и расточу я:
18:8 См.: 🔗Иез. 18:21	и аще обратится язык той от всех лукавств своих, то раскаюся о озлоблениих, яже помыслих сотворити им:
18:9	и наконец реку на язык и царство, да возсозижду и насажду я,
18:10	и аще сотворят лукавая пред очима Моима, еже не послушати гласа Моего, то раскаюся о благих, яже глаголах сотворити им.
18:11 См.: 🔗Иер. 7:3 🔗Иер. 25:5 🔗Иер. 35:15 🔗Ин. 3:8	И ныне рцы ко мужем Иудиным и обитателем Иерусалима, рекий: сия рече Господь: се, Аз творю на вас злая и мышлю на вас умышление: да обратится убо кийждо от пути своего лукаваго, и исправите пути вашя и умышления ваша.
18:12 См.: 🔗Иер. 2:25	И рекоша: укрепимся, ибо по развращением нашым пойдем, и кийждо угодное сердца своего лукаваго сотворим.
18:13 См.: 🔗Иер. 2:10	Сего ради сия глаголет Господь: вопросите ныне языков, кто слыша сицевая страшная, яже сотвори зело дева Израилева?
18:14	Еда оскудеют от камене сосцы, или снег от Ливана? Еда уклонится вода зелно ветром носимая?
18:15 См.: 🔗Иер. 6:16	Понеже забыша Мене людие Мои всуе жруще, и изнемогут на путех своих и на стезях вечных, еже взыти на стези не имущыя пути на хождение,
18:16 См.: 🔗Иер. 19:8 🔗Иер. 49:13 🔗Иер. 50:13	еже положити землю свою в запустение и во звиздание вечное: всяк, иже прейдет по ней, почудится и покивает главою своею:
18:17 См.: 🔗Прит. 1:26	якоже ветр палящь разсею их пред враги их, хребет, а не лице покажу им в день погибели их.
18:18 См.: 🔗Мал. 2:7	И рекоша: приидите и умыслим на Иеремию совет, ибо не погибнет закон от священника, ни совет от премудраго, ни слово от пророка: приидите и поразим его языком, и не вонмем всем словесем его.
18:19 См.: 🔗Иер. 20:12	Вонми, Господи, мне и услыши глас оправдания моего.
18:20 См.: 🔗Быт. 44:4 🔗Пс. 7:16 🔗Мф. 22:15	Еда воздаются злая за благая? Яко глаголаша словеса на душу мою и мучителство свое сокрыша ми. Помяни стоявшаго мя пред Тобою, еже глаголати за них благая, да отвращу гнев Твой от них.
18:21 См.: 🔗Пс. 108:9	Сего ради даждь сыны их в глад и собери их в руце меча: да будут жены их безчадны и вдовы, и мужие их да будут убиени смертию, и юноши их да падут мечем на рати:
18:22 См.: 🔗Пс. 34:7 🔗Лк. 20:20	да будет вопль в домех их: наведи на них разбойники внезапу, понеже совещаша слово, да имут мя, и сети скрыша на мя.
18:23 См.: 🔗Иер. 11:19 🔗Пс. 108:14	Ты же, Господи, веси весь совет их на мя в смерть: да не очистиши беззакония их и грехов их от лица Твоего да не изгладиши: да будет болезнь их пред Тобою, и во время ярости Твоея сотвори им.