Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 49 | |
49:1 | Послушайте Мене, острови, и внемлите, языцы. Временем многим стояти будет, глаголет Господь: от чрева матере Моея нарече имя Мое, |
49:2 | и положи уста Моя яко мечь остр, и под кровом руки Своея скры Мя: положи Мя яко стрелу избранну, и в туле своем скры Мя, |
49:3 См.: 🔗Мф. 12:18 🔗Ин. 17:4 | и рече Ми: раб Мой еси Ты, Израилю, и в Тебе прославлюся. |
49:4 | Аз же рекох: вотще трудихся, всуе и ни во что дах крепость Мою: сего ради суд Мой пред Господем и труд Мой пред Богом Моим. |
49:5 | И ныне тако глаголет Господь, создавый Мя от чрева раба Себе, еже собрати Иакова к Нему и Израиля: соберуся и прославлюся пред Господем, и Бог Мой будет Мне крепость. |
49:6 См.: 🔗Ис. 42:6 🔗Деян. 13:47 | И рече Ми: велие Ти есть, еже назватися Тебе рабом Моим, еже возставити племена Иаковля и разсеяние Израилево обратити: се, дах Тя в завет рода, во свет языком, еже быти Тебе во спасение даже до последних земли. |
49:7 См.: 🔗Ис. 53:3 | Тако глаголет Господь, Избавивый Тя Бог Израилев: освятите уничижающаго душу Свою, гнушаемаго от язык рабов княжеских: царие узрят Его, и востанут князи и поклонятся Ему Господа ради, яко верен есть Святый Израилев, и избрах Тя. |
49:8 См.: 🔗2Кор. 6:2 | Тако глаголет Господь: во время приятно послушах Тебе и в день спасения помогох Ти, и сотворих Тя и дах Тя в завет вечный языков, еже устроити землю и наследити наследия пустыни, |
49:9 См.: 🔗Ис. 61:1 | глаголюща сущым во узах: изыдите, и сущым во тме: открыйтеся. На всех путех пастися будут, и на всех стезях пажить их: |
49:10 См.: 🔗Отк. 7:16 | не взалчут, ниже вжаждут, ниже поразит их зной, ниже солнце, но Милуяй их утешит их и сквозе источники водныя проведет их. |
49:11 См.: 🔗Ис. 62:10 | И положу всяку гору в путь и всяку стезю в паству им. |
49:12 | Се, сии издалеча приидут, сии от севера и от моря, инии же от земли Персския. |
49:13 | Радуйтеся, небеса, и веселися, земле, да отрыгнут горы веселие и холми правду, яко помилова Бог люди Своя и смиренныя людий Своих утеши. |
49:14 См.: 🔗Иер. 31:20 | Рече же Сион: остави мя Господь, и Бог забы мя. |
49:15 | Еда забудет жена отроча свое, еже не помиловати изчадия чрева своего? Аще же и забудет сих жена, но Аз не забуду тебе, глаголет Господь. |
49:16 См.: 🔗Пс. 50:20 | Се, на руках Моих написах стены твоя, и предо Мною еси присно, |
49:17 | и вскоре возградишися, от нихже разорился еси, и опустошившии тя изыдут из тебе. |
49:18 | Возведи окрест очи твои и виждь вся, се, собрашася приидоша к тебе, живу Аз, глаголет Господь: яко всеми ими аки в красоту облечешися и обложиши себе ими яко утварию невеста. |
49:19 | Понеже пустая твоя и разсыпаная и падшая ныне утеснеют от обитающих, и удалятся от тебе поглощающии тя. |
49:20 | Рекут бо во ушы твои сынове твои, ихже был погубил еси: тесно ми место, сотвори ми место, да вселюся. |
49:21 См.: 🔗Ис. 60:4 | И речеши в сердцы своем: кто мне породи сих? Аз же безчадна и вдова, сих же кто воспита мне? Аз же остахся едина, сии же мне где быша? |
49:22 См.: 🔗Ис. 66:12 🔗Лк. 18:15 | Тако глаголет Господь Господь: се, воздвизаю на языки руку Мою и на островы воздвигну знамение Мое, и приведут сыны твоя в лоне и дщери твоя на плещах возмут. |
49:23 См.: 🔗Ис. 60:16 | И будут царие кормителие твои, и княгини их кормилицы твоя: до лица земли поклонятся тебе и прах ног твоих оближут, и увеси, яко Аз Господь Бог, и не посрамятся терпящии Мя. |
49:24 См.: 🔗Мф. 12:29 | Еда возмет кто от исполина корысти? И аще кто пленит неправедне, спасетлися? |
49:25 См.: 🔗Лк. 11:22 🔗Ис. 49:9 | Зане тако глаголет Господь: аще кто пленит исполина, возмет корысти: вземляй же от крепкаго спасется: Аз же прю твою разсужду и Аз сыны твоя избавлю: |
49:26 | и оскорбившии тебе снедят плоть свою и испиют яко вино ново кровь свою, и упиются: и увесть всяка плоть, яко Аз Господь Избавивый тя и заступаяй крепость Иаковлю. |