Книга пророка Иеремии, глава 52

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 52
52:1 См.: 🔗4Цар. 24:18 🔗2Пар. 36:11	Сущу двадесяти и единому лету Седекии, внегда нача царствовати, и царствова во Иерусалиме единонадесять лет: и имя матери его Амиталь, дщи Иеремиина, от Ловны.
52:2	И сотвори лукавое пред очима Господнима по всему, елико творяше Иоаким:
52:3 См.: 🔗4Цар. 24:20	яко ярость Господня бысть на Иерусалим и на Иуду, дондеже отверже их от лица Своего: и отступи Седекиа от царя Вавилонска.
52:4 См.: 🔗4Цар. 25:1 🔗Иер. 39:1	И бысть в девятое лето царства его, в десятый месяц, в десятый день месяца, прииде Навуходоносор царь Вавилонский и вся сила его на Иерусалим, и облегоша его и сотвориша окрест его острог от четвероуголных камений.
52:5	И бысть во облежении град даже до первагонадесяте лета царства Седекиина.
52:6 См.: 🔗4Цар. 25:3	Месяца же четвертаго в девятый день, утвердися глад во граде, и не бяше хлеба людем земли.
52:7	И просекоша град, и вси мужие воинстии изыдоша нощию путем врат, иже есть между двема стенама, иже бяше прямо вертограду цареву, Халдее же добываху град окрест лежаще, и отидоша путем в пустыню.
52:8 См.: 🔗4Цар. 25:5 🔗Плч. 4:19	И погна сила Халдейска вслед царя и постиже его об ону страну Иерихона, и вси отроцы его разсыпашася от него.
52:9 См.: 🔗4Цар. 25:6	И яша царя и приведоша и ко царю Вавилонскому в Девлаф, иже есть в земли Емаф, и глагола ему с судом.
52:10 См.: 🔗Иер. 39:6	И изсече царь Вавилонский сыны Седекиины пред очима его, и вся князи Иудины изсече в Девлафе.
52:11 См.: 🔗4Цар. 25:7 🔗Иез. 12:13 🔗Иез. 17:16	Очи же Седекии изят, и связа его оковами, и приведе его царь Вавилонский в Вавилон и вдаде его в дом жерновный до дне, в оньже умре.
52:12 См.: 🔗4Цар. 25:8	В десятый же день пятаго месяца (лето сие девятоенадесять Навуходоносору царю Вавилонску) прииде Навузардан архимагир, стоящь пред лицем царя Вавилонска, во Иерусалим,
52:13 См.: 🔗4Цар. 25:9 🔗Иер. 39:8	и сожже храм Господень и дом царев, и вся домы градския и всяк дом велик сожже огнем,
52:14	и всяку стену Иерусалимлю окрест разори сила Халдейска, яже бяше со архимагиром.
52:15	И от убогих людий, и останок людий, и оставшихся во граде и избегших, иже убежаша ко царю Вавилонску, и прочий народ пресели Навузардан воевода:
52:16 См.: 🔗4Цар. 25:12	прочиих же остави людий убогих в делатели винограда и земледелцев.
52:17 См.: 🔗2Пар. 3:15 🔗Иер. 27:19	Столпы же медяныя, иже во храме Господни, и подставы, и море медяное, еже во храме Господни, сокрушиша Халдее, и взяша медь их, и отнесоша в Вавилон:
52:18 См.: 🔗4Цар. 25:14	и венец и чашы, и вилицы и вся сосуды медяныя, в нихже служаху,
52:19 См.: 🔗4Цар. 25:15	и фимиамники и чашы, и умывалницы и свещники, и кадилницы и чашицы, яже бяху златая и яже бяху сребряная, взя архимагир.
52:20 См.: 🔗3Цар. 7:23	И столпа два и море едино, и телцев дванадесять медяных под морем, яже сотвори царь Соломон во храме Господни, не бе веса меди сосуд тех.
52:21 См.: 🔗3Цар. 7:15 🔗4Цар. 25:17	Столп же кийждо осминадесяти лактей бе в высоту, вервь же дванадесяти лактей окрест его обдержаше, и толстота его четырех перст окрест,
52:22	и глава на них медяна, пять лакот высота главы единыя, и мрежа, и шипки на венце окрест, все бяше медяно: такожде бысть и вторый столп.
52:23	И бяше шипков девятьдесят и шесть едина страна, и бяше всех шипков над мрежею окрест сто.
52:24 См.: 🔗4Цар. 25:18	И взя архимагир Сареа жерца старейшаго и жерца Софонию втораго и триех стрегущих путь.
52:25	И от града взя каженика единаго, иже бе приставник людий воинских, и седмь мужей нарочитых, иже пред лицем царевым обретошася во граде, и книгочия сил учащаго людий земли, и шестьдесят мужей от людий земли, иже обретошася среде града:
52:26	и взя их Навузардан архимагир и приведе я ко царю Вавилонску в Девлаф.
52:27 См.: 🔗4Цар. 25:21	И изби я царь Вавилонский в Девлафе в земли Емаф: и преселен бысть Иуда от земли своея.
52:28	Сии суть людие, ихже пресели Навуходоносор в седмое лето, Иудеев три тысящы и двадесять и три:
52:29	во осмоенадесять лето Навуходоносор из Иерусалима душ осмь сот тридесять и две пресели.
52:30 См.: 🔗1Езд. 2:64	В двадесять третие лето Навуходоносора пресели Навузардан архимагир Иудеев душ седмь сот и четыредесять пять, всех же душ четыре тысящы и шесть сот.
52:31 См.: 🔗4Цар. 25:27	И бысть в тридесять седмое лето преселения Иоакима царя Иудина, в двадесять пятый день месяца вторагонадесять, вознесе Евилмеродах царь Вавилонский в первое лето царства своего главу Иоакима царя Иудина, и изведе его из храма, в немже стрежашеся, и глагола ему благая:
52:32	и даде престол его выше царей, иже с ним, в Вавилоне,
52:33	и измени ризы его темничныя, и ядяше хлеб всегда пред лицем его во вся дни живота своего:
52:34	и урок ему даяшеся всегда от царя Вавилонска, даже до дне, в оньже умре, во вся дни живота его.