Книга Премудрости Иисуса, сына Сирахова, глава 31 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 31
31:1	Бдение богатства растлевает плоти, и попечение его отгонит сон:
31:2 См.: 🔗Дан. 6:18	печаль бдения отторгает дремание, и недуг лют отимает сон.
31:3	Трудится богатый в собирании богатства и в покои насыщается сладостей своих:
31:4	трудится убогий во умалении жития, и в покои скудный бывает.
31:5 См.: 🔗Сир. 27:1 🔗1Тим. 6:9	Любяй злато не оправдится, и гоняй растление сим насытится.
31:6 См.: 🔗Сир. 8:3	Мнози падоша злата ради, и бысть пагуба их прямо лицу их.
31:7	Древо претыкания есть всем жрущым ему, и всяк безумлив ят будет им.
31:8 См.: 🔗Лк. 6:24 🔗Пс. 61:11 🔗1Тим. 6:17	Блажен богатый, иже обретеся без порока и иже вслед злата не иде.
31:9	Кто есть сей? И ублажим его, сотвори бо дивная в людех своих.
31:10	Кто искушен им и совершен бысть? И будет на похваление.
31:11	Кто могл преступити, и не преступи, и зло сотворити, и не сотвори?
31:12	Утвердятся благая его, и милостыни его исповесть собрание.
31:13 См.: 🔗Прит. 23:1	Сел ли еси при трапезе велицей, не разверзи на ней гортани твоего
31:14 См.: 🔗Прит. 23:6 🔗Сир. 14:10	и не рцы: много на ней есть. Помяни, яко зло есть око лукаво.
31:15	Лукавнее ока что есть создано? Сего ради о коей либо вещи слезит.
31:16	Идеже аще узриши, не простирай руки и не гнетися с ним в солило.
31:17	Разсуждай, яже суть искренняго, от тебе самаго, и о всяцей вещи размышляй.
31:18 См.: 🔗Сир. 37:33	Яждь яко человек предлежащее ти и не пресыщайся, да не возненавиден будеши.
31:19	Престани первый ради наказания и не пресыщайся, да не преткнешися:
31:20	и аще сядеши посреде многих, первее их не простри руки твоея.
31:21	Коль доволно человеку наказанному малое, и на одре своем не постраждет зла.
31:22 См.: 🔗Еккл. 5:11	Сон здравый от чрева умеренна: воста заутра, и душа его с ним:
31:23	труд бдения и холера и чревоболение с мужем ненасытным.
31:24 См.: 🔗Сир. 32:15	И аще отяготился еси брашны, востани от трапезы и почиеши.
31:25	Послушай мене, чадо, и не уничижи мене, и на последок обрящеши словеса моя.
31:26	Во всех делех твоих буди тщателен, и всяк недуг не имать приступити к тебе.
31:27 См.: 🔗Прит. 22:9	Щедраго хлебами благословят устне, и послушество доброты его верно.
31:28 См.: 🔗1Цар. 25:10	На скупаго в хлебех поропщет град, и послушество злобы его известно.
31:29 См.: 🔗Иудиф. 12:20 🔗Ис. 5:22	В вине не мужайся, многих бо погуби вино.
31:30	Пещь искушает железо в калении, тако вино сердца гордых во пиянстве.
31:31 См.: 🔗Суд. 9:13 🔗Прит. 31:4	Полезно вино животу человечу, аще пиеши е в меру его.
31:32 См.: 🔗Пс. 103:15	Кий живот побеждаемому вином? Сие бо на веселие человеком создано есть.
31:33	Радование сердца и веселие души вино пиемо во время прилично:
31:34	горесть души вино пиемо много в распри и клевете:
31:35	умножает пиянство ярость безумнаго на претыкание, умаляя крепость и сотворяя струпия.
31:36	В пире вина не обличай искренняго и не уничижи его в веселии его:
31:37	словесе поносна не рцы ему и не оскорби его во истязании.