Книга пророка Иезекииля, глава 16

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 16
16:1	И бысть слово Господне ко мне глаголя:
16:2 См.: 🔗Ис. 58:1	сыне человечь, засвидетелствуй Иерусалиму беззакония его
16:3 См.: 🔗Быт. 10:16 🔗Быт. 27:46	и речеши: сия глаголет Адонаи Господь дщери Иерусалимстей: корень твой и бытие твое от земли Хананейски: отец твой Аморреанин и мати твоя Хеттеаныня:
16:4	и рождение твое, в оньже день родилася еси, не обязаша сосец твоих, и водою не омыша тя на спасение, ни солию осолиша, ниже пеленами повиша:
16:5	и не пощаде тебе око Мое, еже сотворити тебе едино от всех сих, пострадати что о тебе, и отвержена была еси на лице поля стропотством души твоея, в день в оньже родилася еси.
16:6 См.: 🔗Лк. 15:20 🔗Ам. 5:4	И проидох сквозе тя и видех тя смешену во крови твоей и рекох ти: от крове твоея жива буди: и рекох тебе: во крови твоей живот твой:
16:7 См.: 🔗Отк. 3:17	умножайся, якоже прозябение селное дах тя, и умножилася еси и возвеличилася и вошла еси во грады градов: сосцы твои возрастоша, и власи твои просветлеша, ты же была еси нага и без красы.
16:8 См.: 🔗Исх. 19:4 🔗Ос. 2:19	И проидох сквозе тя и видех тя: и се, время твое, яко время витающих: и прострох криле Мои на тя и прикрых студ твой, и кляхся тебе и внидох в завет с тобою, глаголет Адонаи Господь, и была еси Мне:
16:9	и омых тя водою и ополосках кровь твою от тебе и помазах тя елеем,
16:10 См.: 🔗Ис. 61:10 🔗Отк. 19:8	и облекох тя в пестроты и обух тя в червлены, и препоясах тя виссоном и возложих на тя трихаптон,
16:11	и украсих тя утварию и возложих запястие на руце твои и гривну на выю твою,
16:12 См.: 🔗Ис. 28:5 🔗Прит. 4:9	и дах усерязи на ноздри твоя и колца во ушы твои и венец хвалы на главу твою:
16:13 См.: 🔗Лк. 22:29	и украшенна была еси златом и сребром, и одежды твоя виссонны и трихапты и испещрения, семидал и мед и масло яла еси, и была еси добра зело зело, и управилася еси на царство:
16:14	и изыде имя твое во языки в доброте твоей, зане совершенно бе лепотою в красоте, юже учиних на тебе, глаголет Адонаи Господь.
16:15 См.: 🔗Ис. 1:21 🔗Ос. 2:2	Ты же уповала еси на доброту твою и соблудила еси во имени твоем и излияла еси блужение твое на всякаго мимоходящаго, тому была еси, емуже не подобаше:
16:16 См.: 🔗Ос. 2:8	и взяла еси от риз твоих и сотворила себе кумиры сошвеныя и соблудила еси с ними, и не внидеши, и не будет.
16:17	И взяла еси сосуды хвалы твоея от сребра Моего и злата Моего, от нихже дах тебе, и сотворила себе образы мужески, и соблудила еси в них.
16:18	И взяла еси ризы своя испещренныя и одеялася еси в ня, и масло Мое и фимиам Мой положила еси пред лицем их,
16:19	и хлебы Моя, яже дах тебе, семидалом и маслом и медом напитах тя, и положила еси та пред лицем их в воню благоухания. И бысть по сих, глаголет Адонаи Господь,
16:20 См.: 🔗Лев. 18:21	и взяла еси сыны твоя и дщери твоя, яже родила еси, и заклала еси им в потребление. Еда мало соблудила еси?
16:21 См.: 🔗Иез. 20:31	И заклала еси чада твоя и дала еси я, внегда принесла еси их на жертву им.
16:22	Сие паче всякаго блуда твоего и гнусностей твоих: и не помянула еси дний младенства твоего, егда была еси нага и безобразна, и смешена во крови твоей жила еси.
16:23	И бысть по всех злобах твоих, горе горе тебе, глаголет Адонаи Господь,
16:24 См.: 🔗Иер. 3:2	и создала еси себе храм блуднический и сотворила себе полагания на всех стогнах:
16:25	и в начале всякаго пути создала еси блудилища своя и растлила доброту твою, и разложила голени твоя всякому мимоходящему и умножила еси блуд твой:
16:26 См.: 🔗Иез. 23:20	и соблудила с сынми Египетскими соседы твоими дебелоплотными, и многажды блудила еси, еже разгневати Мя.
16:27	И се, простру руку Мою на тя и отвергу законы твоя и предам тя душам ненавидящым тебе, дщерем иноплеменников, совращающым тя с пути твоего, имже нечествовала еси.
16:28	И соблудила еси с сынми Ассировыми и ниже тако насытилася еси: и соблудила и не насытилася,
16:29	и умножила заветы твоя ко земли Хананейстей, Халдейстей, и ниже в сих насытилася еси.
16:30 См.: 🔗Кол. 2:11 🔗Иез. 23:44	Что сотворю сердцу твоему, глаголет Адонаи Господь, внегда твориши вся сия дела жены блудницы продерзыя? И соблудила еси трегубо во дщерех твоих.
16:31 См.: 🔗Ос. 8:11	Егда соградила еси блудилище твое в начале всякаго пути и высокая твоя сотворила еси на всех стогнах, и не была яко блудница собирающая наем.
16:32 См.: 🔗Прит. 7:19	Жена любодейница подобна тебе, от мужа своего вземлющи наем,
16:33 См.: 🔗Быт. 38:16	всем блудившым с нею даяше наем: и ты дала еси наем всем рачителем твоим и обременяла их, еже приходити им к тебе отвсюду в блужения твоя.
16:34	И бысть в тебе сопротивно обычаю женску во блужении твоем, и с тобою соблудившым, вместо еже бы дати тебе наем, и наем не дадеся тебе, и бысть в тебе сопротивно.
16:35 См.: 🔗Ос. 5:3	Сего ради слыши, блуднице, слово Господне.
16:36	Сия глаголет Адонаи Господь: зане излияла еси медь твою, и открыется срам твой во блужении твоем ко рачителем твоим, и во вся помышления беззаконий твоих, и во крови чад твоих, яже дала еси им:
16:37 См.: 🔗Наум. 3:5	сего ради, се, Аз на тя соберу вся похотники твоя, с нимиже смесилася еси, и всех, ихже любила еси, со всеми, ихже ненавидела еси: и соберу я на тя отвсюду и открыю злобы твоя к ним, и узрят весь срам твой.
16:38 См.: 🔗Иез. 23:10	И отмщу ти отмщением любодейцы и проливающия кровь, и положу тя во крови ярости и рвения,
16:39	и предам тя в руце их, и раскопают блудилище твое и разорят высокая твоя, и совлекут с тебе ризы твоя и возмут сосуды хвалы твоея, и оставят тя нагу и безстудну:
16:40 См.: 🔗Иез. 23:47	и приведут на тя народы, и побиют тебе камением и изсекут тя мечьми своими,
16:41 См.: 🔗4Цар. 25:9 🔗Иер. 52:10	и запалят домы твоя огнем и сотворят в тебе отмщение пред женами многими: и обращу тя от блужения, и найма ктому не даси.
16:42 См.: 🔗Иез. 5:13	И послю ярость Мою на тя, и отимется рвение Мое от тебе: и почию и ктому не попекуся.
16:43 См.: 🔗Иез. 9:10	Понеже не помянула еси дний младенства твоего и опечалила Мя во всех сих: и се, Аз пути твоя на главу твою дах, глаголет Адонаи Господь: и тако сотворила еси нечестие по всем беззаконием твоим.
16:44 См.: 🔗Ос. 2:5	Сия суть вся, елика рекоша на тя в притчи, глаголюще: якоже мати, тако и дщерь.
16:45 См.: 🔗Иез. 16:3	Дщерь матере твоея ты еси, отринувшая мужа своего и чада своя: и сестры сестр твоих, отринувшыя мужей своих и чад своих: мати ваша Хеттеаныня, а отец ваш Аморрей:
16:46 См.: 🔗Иер. 3:7 🔗Ос. 2:1 🔗Рим. 9:29	сестра ваша старейшая Самариа, та и дщери ея живущыя ошуюю тебе: и сестра твоя меншая, живущая одесную тебе, Содома и дщери ея.
16:47	Но ниже по путем их ходила еси, ниже сотворила по беззаконием их поне мало, и превозшла еси их во всех путех твоих.
16:48 См.: 🔗Быт. 18:20	Живу Аз, глаголет Адонаи Господь, не сотворила Содома сия сестра твоя и дщери ея, якоже ты сотворила и дщери твоя.
16:49 См.: 🔗Сир. 16:9 🔗Лк. 17:28	Обаче сие беззаконие Содомы сестры твоея, гордость в сытости хлеба и во изюбилии вина, и сластолюбствоваша та и дщери ея: сие бяше ей и дщерем ея: и руки убогому и нищему не подаяху,
16:50	и величахуся, и сотвориша беззакония предо Мною: и отвергох я якоже видех.
16:51 См.: 🔗4Цар. 17:7 🔗Иез. 23:11	Самариа же пол грехов твоих не согреши: и умножила еси беззакония твоя паче онех, и оправдала еси сестры твоя во всех беззакониих твоих, яже сотворила еси.
16:52 См.: 🔗Иер. 3:11	И ты приими мучение твое, в немже растлила еси сестры твоя во гресех твоих, имиже беззаконновала паче тех, и оправдала их паче тебе: и ты посрамися и приими безчестие твое, внегда оправдати тебе сестры твоя.
16:53 См.: 🔗Иер. 29:14 🔗Иез. 39:25	И обращу обращения их, обращение Содомы и дщерей ея, и обращение Самарии и дщерей ея, и обращу обращение твое среде их,
16:54 См.: 🔗Иез. 5:15	яко да приимеши мучение твое и безчестна будеши от всех, яже сотворила еси во разгневании моем.
16:55	И сестра твоя Содома и дщери ея возставятся, якоже беша исперва: и Самариа и дщери ея возставятся, якоже беша исперва: и ты и дщери твоя возставитеся, якоже бесте прежде.
16:56	И не была Содома сестра твоя во слышание во устех твоих во днех гордыни твоея,
16:57	прежде откровения злоб твоих, якоже ныне укоризна еси дщерей Сирских и всех сущих окрест ея дщерей иноплеменничих одержащих тя окрест:
16:58	нечестия твоя и беззакония твоя ты понесла еси я, глаголет Господь.
16:59 См.: 🔗Неем. 10:29	Сия глаголет Адонаи Господь: и сотворю в тебе, якоже сотворила еси, якоже презрела еси еже преступити завет Мой:
16:60 См.: 🔗Лк. 1:72 🔗Евр. 8:8	и воспомяну Аз завет Мой, иже с тобою во днех младенства твоего, и возставлю тебе завет вечный:
16:61 См.: 🔗Иез. 36:31	и помянеши пути твоя и безчестна будеши, внегда поймеши сестры твоя старейшыя со юнейшими твоими, и дам я тебе на созидание, но не от завета твоего:
16:62 См.: 🔗Гал. 4:6	и возставлю Аз завет Мой с тобою, и увеси, яко Аз Господь:
16:63 См.: 🔗Иез. 6:9 🔗Рим. 6:21	яко да помянеши и усрамишися, и не будет тебе ктому отверсти уст твоих от лица безчестия твоего, егда милостив буду тебе по всем, елика сотворила еси, глаголет Адонаи Господь.