Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 17 | |
17:1 См.: 🔗Ис. 65:6 | Грех Иудин написан есть писалом железным на ногти адамантове, начертан на скрижали сердца их и на розех олтарей их. |
17:2 См.: 🔗Иер. 11:13 | Егда воспомянут сынове их олтари своя и дубравы своя при древе лиственне и на холмех высоких, |
17:3 См.: 🔗Иер. 15:13 | о, нагорный (жителю)! Крепость твою и сокровища твоя в расхищение дам, и высокая твоя, грех ради твоих, яже во всех пределех твоих, |
17:4 См.: 🔗Иер. 15:14 | и останешися един от наследия твоего, еже дах тебе: и служити тя сотворю врагом твоим в земли, еяже не веси: яко огнь разжегл еси в ярости Моей, даже во век горети будет. Сия глаголет Господь: |
17:5 | проклят человек, иже надеется на человека и утвердит плоть мышцы своея на нем, и от Господа отступит сердце его: |
17:6 См.: 🔗Ис. 1:30 🔗Иер. 48:6 | и будет яко дивия мирика в пустыни и не узрит, егда приидут благая, и обитати будет в сухоте и в пустыни, в земли сланей и необитаемей. |
17:7 | И благословен человек, иже надеется на Господа, и будет Господь упование его: |
17:8 См.: 🔗Пс. 1:3 | и будет яко древо насажденное при водах, и во влаге пустит корение свое: не убоится, егда приидет зной, и будет на нем стеблие зелено, и во время бездождия не устрашится и не престанет творити плода. |
17:9 См.: 🔗Пс. 63:7 | Глубоко сердце (человеку) паче всех, и человек есть, и кто познает его? |
17:10 | Аз Господь испытуяй сердца и искушаяй утробы, еже воздати комуждо по пути его и по плодом изобретений его. |
17:11 | Возгласи ряб, собра, ихже не роди, творяй богатство свое не с судом: в преполовении дний своих оставит е и на последок свой будет безумен. |
17:12 См.: 🔗Иер. 14:21 | Престол славы возвышен от начала, место святыни нашея. |
17:13 | Чаяние Израилево, Господи! Вси оставляющии Тя да постыдятся, отступающии (от Тебе) на земли да напишутся, яко оставиша источник живых вод, Господа. |
17:14 | Изцели мя, Господи, и изцелею: спаси мя, и спасен буду, яко хвала моя Ты еси. |
17:15 См.: 🔗Ис. 5:19 | Се, тии глаголют ко мне: где есть слово Господне? Да приидет. |
17:16 См.: 🔗Иов. 32:21 🔗1Кор. 4:3 | Аз же не утрудихся, Тебе (пастырю) последуяй, и дне человеча не пожелах: Ты веси исходящая от устен моих, пред лицем Твоим суть: |
17:17 См.: 🔗Иер. 16:19 | не буди ми во отчуждение, упование мое Ты в день лют. |
17:18 См.: 🔗Иер. 20:11 | Да постыдятся гонящии мя, аз же да не постыждуся: да устрашатся тии, аз же да не устрашуся: наведи на них день озлобления, сугубым сокрушением сотри их. |
17:19 См.: 🔗Ис. 29:21 | Сия глаголет Господь ко мне: иди и стани во вратех сынов людий твоих, имиже входят царие Иудины и исходят, и во всех вратех Иерусалимских и речеши к ним: |
17:20 | слышите слово Господне, царие Иудины и вся Иудеа и весь Иерусалим, входящии во врата сия. |
17:21 См.: 🔗Неем. 13:19 🔗Ин. 5:9 | Сия глаголет Господь: сохраните душы вашя и не носите бремен в день суббот, и не исходите враты Иерусалима, |
17:22 См.: 🔗Исх. 20:8 🔗Иез. 20:12 | и не износите бремен из домов ваших в день субботный, и всякаго дела не творите: освятите день субботный, якоже заповедах отцем вашым: |
17:23 См.: 🔗Иер. 7:24 | и не услышаша, ни приклониша уха своего, но ожесточиша выи своя паче отец своих, да не услышат мя и да не приимут наказания. |
17:24 См.: 🔗Ис. 56:2 🔗Ис. 58:13 | И будет, аще послушаете Мене, глаголет Господь, еже не вносити бремен во врата града сего в день субботный, и святити день субботный, не творити в онь всякаго дела, |
17:25 См.: 🔗Иер. 22:4 | и внидут во врата града сего царие и началницы, седящии на престоле Давидове и восходящии на колесницах и конех своих, тии и началницы их, мужие Иудины и обитателие Иерусалима: и обитати будут во граде сем во веки: |
17:26 См.: 🔗Иер. 32:44 | и приидут от градов Иудиных и от окрестных Иерусалима, и от земли Вениамини и от польных, и от горних и от юга, носяще всесожжения и жертву, и фимиам и манау и ливан, носяще хвалу в дом Господень. |
17:27 | И будет, аще не послушаете Мене еже святити день субботный и не носити бремен, ниже входити вратами Иерусалима в день субботный, то зажгу огнь во вратех его, и пожрет домы Иерусалимли и не угаснет. |