Книга пророка Иеремии, глава 14

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 14
14:1	И бысть слово Господне ко Иеремии о бездождии.
14:2 См.: 🔗Плч. 3:6	Рыдала Иудеа, и врата ея разрушишася, и отемнишася на земли, и вопль Иерусалима взыде.
14:3 См.: 🔗Втор. 28:24 🔗2Цар. 13:30	И вельможи его послаша менших своих к воде: приидоша на кладязи и не обретоша воды, и отнесоша сосуды своя тщы: постыждени суть и посрамлени, и покрыша главы своя.
14:4 См.: 🔗Иоил. 1:11	И дела земли оскудеша, яко не бяше дождя на землю: постыждени суть земледелцы, покрыша главы своя.
14:5	И еленицы на ниве родиша и оставиша, яко не бе травы.
14:6 См.: 🔗Иер. 12:4	Онагри сташа на камениих, браша в себе ветр яко змиеве, оскудеша очи их, яко не бе травы.
14:7 См.: 🔗Иер. 3:25	Беззакония наша противусташа нам: Господи, сотвори нам ради имене Твоего, яко мнози греси наши пред Тобою, Тебе согрешихом.
14:8 См.: 🔗Иер. 17:13 🔗Иер. 50:7	Ожидание Израилево, Господи, Спасителю наш во время скорби! Вскую яко пришлец еси на земли и яко путник укланяющься во виталище?
14:9 См.: 🔗Пс. 43:24 🔗Исх. 25:10	Еда будеши якоже человек спяй, или аки муж не могий спасти? Ты же в нас еси, Господи, и имя Твое призвано бысть на нас, не забуди нас.
14:10	Сия глаголет Господь людем сим: возлюбиша подвизати нозе свои и не упокоишася, и Бог не благопоспеши в них, ныне воспомянет беззакония их и посетит грехи их.
14:11 См.: 🔗Иер. 11:14	И рече Господь ко мне: не молися о людех сих во благо:
14:12 См.: 🔗Прит. 1:28 🔗Ис. 1:15 🔗Ис. 58:3	егда поститися будут, не услышу прошения их, и аще принесут всесожжения и жертвы, не благоволю в них: яко мечем и гладом и мором Аз скончаю их.
14:13 См.: 🔗Иер. 5:12 🔗Иер. 6:13 🔗Иер. 8:10	И рекох: сый Господи Боже, се, пророцы их прорицают и глаголют: не узрите меча, и глад не будет вам, но истину и мир дам на земли и на месте сем.
14:14 См.: 🔗Иер. 23:21 🔗Иер. 27:15 🔗Иез. 13:9	И рече Господь ко мне: лживо пророцы прорицают во имя Мое, не послах их, ни заповедах им, ни глаголал есмь к ним: понеже видения лжива и гадания и волшебства и произволы сердца своего тии прорицают вам.
14:15 См.: 🔗Иер. 5:13	Сего ради сия глаголет Господь о пророцех, иже пророчествуют во имя Мое ложная, и Аз не послах их, иже глаголют: мечь и глад не будет на земли сей: смертию лютою умрут и гладом скончаются пророцы тии.
14:16 См.: 🔗Иер. 16:4	И людие, имже тии пророчествуют, будут извержени на путех Иерусалима от лица меча и глада, и не будет погребаяй их, и жены их и сынове их и дщери их, и излию на них злая их.
14:17 См.: 🔗Иер. 9:1 🔗Плч. 1:16 🔗Плч. 2:18	И речеши к ним слово сие: да изведут очи ваши слезы день и нощь, и да не престанут, яко сотрением великим сотрена (дева) дщерь людий моих и язвою злою зело.
14:18	Аще изыду на поле, и се, заклани мечем: и аще вниду во град, и се, истаявшии гладом: яко пророк и священник отидоша в землю, еяже не ведяху.
14:19 См.: 🔗Пс. 73:1 🔗Иер. 8:15	Еда отмещущь отвергл еси Иуду, и от Сиона отступи душа Твоя? Вскую поразил еси нас, и несть нам изцеления? Ждахом мира, и не бяху благая: времене уврачевания, и се, боязнь.
14:20 См.: 🔗1Езд. 9:15	Познахом, Господи, грехи нашя, беззакония отец наших, яко согрешихом пред Тобою.
14:21 См.: 🔗Иер. 3:17 🔗Иер. 17:12	Престани ради имене Твоего, не погуби престола славы Твоея: воспомяни, не разори завета Твоего иже с нами.
14:22 См.: 🔗Зах. 10:1	Еда есть во изваянных языческих, иже дождит? Или небеса могут дати влагу свою? Не Ты ли еси, Господи Боже наш? И пождем Тебе, Господи, Ты бо сотворил еси вся сия.