Книга Притчей Соломоновых, глава 25

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 25
25:1	Сия притчи Соломони бывшыя нерасположенны, яже списаша друзие Езекии царя Иудейска.
25:2 См.: 🔗Втор. 29:29 🔗Рим. 11:33	Слава Божия крыет слово, слава же царева почитает повеления Его.
25:3 См.: 🔗Прит. 20:5	Небо высоко, земля же глубока: сердце же царево необличително.
25:4	Куй неискушенное сребро, и очистится чисто все.
25:5 См.: 🔗Прит. 20:8	Убивай нечестивыя от лица царева, и исправится в правде престол его.
25:6	Не гордися пред лицем царевым и на месте сильных не стани:
25:7 См.: 🔗Лк. 14:9	лучше бо ти есть, егда речет: взыди ко мне: нежели смиритися тебе пред лицем сильнаго.
25:8	Иже видеста очи твои, глаголи. Не впадай в тяжбу скоро, да не раскаешися послежди, егда тебе досадит друг твой.
25:9 См.: 🔗Сир. 19:10	Вступай вспять, не неради, да не поносит убо тебе друг:
25:10	свара же твоя и вражда твоя не отступит, но будет ти равна со смертию. Благодать и любы свобождает, в нихже утверди себе, да не в поношении будеши, но сохрани пути твоя добре устроены.
25:11	(Якоже) яблоко злато во усерязи сардийскаго камене, сице рещи слово при приличных ему.
25:12	И (якоже) во усерязь златый сардийский камень многоценный вяжется, (сице) слово премудро во ухо благопослушно.
25:13	Якоже исходище снега в жатву зноя пользует, тако вестник верен пославших его: душы бо употребляющих его пользует.
25:14 См.: 🔗Иак. 2:16	Якоже ветри и облацы и дождеве являющиися, тако и хвалящийся о даянии ложнем.
25:15 См.: 🔗Прит. 15:1	В долготерпении благополучие царем: язык же мякок сокрушает кости.
25:16 См.: 🔗Прит. 24:13	Мед обрет яждь умеренно, да не како пресыщен изблюеши.
25:17	Не учащай вносити ногу твою ко другу твоему, да не когда насыщься тебе, возненавидит тя.
25:18 См.: 🔗Пс. 58:8	Дреколь и мечь и стрела остра, тако и муж свидетелствуяй на друга своего свидетелство ложное.
25:19	Путь злаго и нога законопреступнаго погибнут в день зол.
25:20	Якоже оцет неполезен вреду и дым очима, тако припадшая страсть в телеси сердце оскорбляет.
25:21	Якоже молие в ризе и червие в древе, тако печаль мужу вредит сердце.
25:22 См.: 🔗Рим. 12:20 🔗1Цар. 24:20	Аще алчет враг твой, ухлеби его: аще ли жаждет, напой его:
25:23	сие бо творя, углие огненное собираеши на главу его, Господь же воздаст тебе благая.
25:24 См.: 🔗Прит. 21:9	Ветр северный воздвизает облаки, лице же безстудно язык раздражает.
25:25 См.: 🔗Прит. 15:30	Лучше жити во угле непокрытем, неже во храмине общей со женою клеветливою.
25:26	Якоже вода студеная души жаждущей благоприятна, тако весть благая от земли издалеча.
25:27 См.: 🔗Прит. 25:16 🔗Сир. 3:21 🔗Рим. 12:3	Якоже аще кто источник заграждает и исходище воды губит, тако не лепо праведнику пасти пред нечестивым.
25:28	Ясти мед много не добро: почитати же подобает словеса славна.