Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 20 | |
20:1 См.: 🔗Мф. 21:33 | Подобно бо есть Царствие Небесное человеку домовиту, иже изыде купно утро наяти делатели в виноград свой, |
20:2 | и совещав с делатели по пенязю на день, посла их в виноград свой. |
20:3 | И изшед в третий час, виде ины стоящя на торжищи праздны, |
20:4 | и тем рече: идите и вы в виноград мой, и еже будет правда, дам вам. Они же идоша. |
20:5 | Паки же изшед в шестый и девятый час, сотвори такоже. |
20:6 | Во единыйженадесять час изшед, обрете другия стоящя праздны и глагола им: что зде стоите весь день праздни? |
20:7 | Глаголаша ему: яко никтоже нас наят. Глагола им: идите и вы в виноград (мой), и еже будет праведно, приимете. |
20:8 | Вечеру же бывшу, глагола господин винограда к приставнику своему: призови делатели и даждь им мзду, начен от последних до первых. |
20:9 | И пришедше иже во единыйнадесять час, прияша по пенязю. |
20:10 | Пришедше же первии мняху, яко вящше приимут: и прияша и тии по пенязю: |
20:11 | приемше же роптаху на господина, |
20:12 | глаголюще, яко сии последнии един час сотвориша, и равных нам сотворил их еси, понесшым тяготу дне и вар. |
20:13 | Он же отвещав рече единому их: друже, не обижу тебе: не по пенязю ли совещал еси со мною? |
20:14 | Возми твое и иди: хощу же и сему последнему дати, якоже и тебе: |
20:15 | или несть ми леть сотворити, еже хощу, во своих ми? Аще око твое лукаво есть, яко аз благ есмь? |
20:16 См.: 🔗Мф. 19:30 🔗Мф. 22:14 | Тако будут последнии перви, и первии последни: мнози бо суть звани, мало же избранных. |
20:17 | И восходя Иисус во Иерусалим, поят обанадесяте ученика едины на пути и рече им: |
20:18 См.: 🔗Мк. 10:33 🔗Лк. 18:31 | се, восходим во Иерусалим, и Сын Человеческий предан будет архиереем и книжником: и осудят Его на смерть, |
20:19 См.: 🔗Мк. 10:34 🔗Ин. 18:31 | и предадят Его языком на поругание и биение и пропятие: и в третий день воскреснет. |
20:20 См.: 🔗Мк. 10:35 | Тогда приступи к Нему мати сыну Зеведеову с сынома своима, кланяющися и просящи нечто от Него. |
20:21 | Он же рече ей: чесо хощеши? Глагола Ему: рцы, да сядета сия оба сына моя, един одесную Тебе, и един ошуюю (Тебе), во Царствии Твоем. |
20:22 См.: 🔗Мф. 26:39 | Отвещав же Иисус рече: не веста, чесо просита: можета ли пити чашу, юже Аз имам пити, или крещением, имже Аз крещаюся, креститися? Глаголаста Ему: можева. |
20:23 | И глагола има: чашу убо Мою испиета, и крещением, имже Аз крещаюся, имате креститися: а еже сести одесную Мене и ошуюю Мене, несть Мое дати, но имже уготовася от Отца Моего. |
20:24 См.: 🔗Мк. 10:41 🔗Лк. 22:24 | И слышавше десять, негодоваша о обою брату. |
20:25 | Иисус же призвав их, рече: весте, яко князи язык господствуют ими, и велицыи обладают ими: |
20:26 | не тако же будет в вас: но иже аще хощет в вас вящший быти, да будет вам слуга: |
20:27 | и иже аще хощет в вас быти первый, буди вам раб: |
20:28 | якоже Сын Человеческий не прииде, да послужат Ему, но послужити и дати душу Свою избавление за многих. |
20:29 См.: 🔗Мк. 10:46 🔗Лк. 18:35 | И исходящу Ему от Иерихона, по Нем иде народ мног. |
20:30 См.: 🔗Мф. 9:27 | И се, два слепца седяща при пути, слышавша, яко Иисус мимоходит, возописта, глаголюща: помилуй ны, Господи, Сыне Давидов. |
20:31 | Народ же прещаше има, да умолчита: она же паче вопияста, глаголюща: помилуй ны, Господи, Сыне Давидов. |
20:32 | И востав Иисус возгласи я и рече: что хощета, да сотворю вама? |
20:33 | Глаголаста Ему: Господи, да отверзетеся очи наю. |
20:34 | Милосердовав же Иисус прикоснуся очию има: и абие прозреста има очи, и по Нем идоста. |