Книга Премудрости Соломона, глава 7 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 7
7:1	Есмь бо и аз человек смертен, подобен всем и земнороднаго внук первозданнаго:
7:2 См.: 🔗Иов. 10:10	и во чреве матерни изобразихся плоть, в десятомесячнем времени согустився в крови от семене мужеска и услаждения сном сошедшагося.
7:3	И аз рожден восприях общаго аера и на подобострастную землю спадох, первый глас подобный всем испустих плача:
7:4	в пеленах воскормлен есмь, и с (великим) прилежанием:
7:5 См.: 🔗Сир. 40:4	ни един бо царь ино име рождения начало,
7:6 См.: 🔗Иов. 1:21 🔗1Тим. 6:7	един бо вход всем есть в житие, подобен же и исход.
7:7 См.: 🔗3Цар. 3:9 🔗2Пар. 1:10	Сего ради помолихся, и дан бысть мне разум: призвах, и прииде на мя дух премудрости.
7:8	Предсудих ю паче скиптров и престолов, и богатство ничтоже вмених ко сравнению тоя,
7:9 См.: 🔗Иов. 28:15 🔗Прит. 8:10	ниже уподобих ея каменю драгоценному, яко все злато пред нею песок малый, и яко брение вменится пред нею сребро:
7:10	паче здравия и красоты возлюбих ю и предизбрах ю вместо света имети, яко неугасаемо есть блистание ея.
7:11 См.: 🔗3Цар. 3:13	Приидоша же мне благая вся вкупе с нею и безчислено богатство рукама ея:
7:12	и возвеселихся о всех, яко ими обладает премудрость: не ведех же ю родителницу быти сих.
7:13	Нелестне научихся, без зависти преподаю и богатства ея не сокрываю:
7:14 См.: 🔗Ин. 15:15	неоскудно бо есть сокровище человеком, еже употребившии к Богу послашася в содружение, дарами от наказания представлени.
7:15	Мне же даде Бог глаголати по разумению и мнети достойне о подаваемых, яко Той и премудрости предводитель есть и премудрых исправитель:
7:16 См.: 🔗2Кор. 3:5	в руку бо Его и мы и словеса наша, и всякий разум и дел художество.
7:17 См.: 🔗3Цар. 4:29	Сей бо даде мне о сущих познание неложное, познати составление мира и действие стихий,
7:18	начало и конец и средину времен, возвратов премены и изменения времен,
7:19	лет круги и звезд расположения,
7:20 См.: 🔗3Цар. 4:33	естество животных и гнев зверей, ветров усилие и помышления человеков, разнство летораслем и силы корений.
7:21	И елика суть скрыта и явна, познах: всех бо художница научи мя Премудрость.
7:22 См.: 🔗Иов. 12:13	Есть бо в той дух разума свят, единородный, многочастный, тонкий, благодвижный, светлый, нескверный, ясный, невредителный, благолюбивый, остр, невозбранен, благоделателен,
7:23 См.: 🔗Прит. 8:12 🔗1Кор. 2:10 🔗Евр. 1:3	человеколюбив, известный, крепкий, безпечальный, всесильный, всевидяй, и сквозе вся проходяй духи разумичныя, чистыя, тончайшыя.
7:24 См.: 🔗Евр. 4:12	Всякаго бо движения подвижнейша есть премудрость: достизает же и проницает сквозе всяческая ради (своея) чистоты.
7:25	Пара бо есть силы Божия и излияние Вседержителя славы чистое: сего ради ничтоже осквернено на ню нападает.
7:26	Сияние бо есть света присносущнаго и зерцало непорочно Божия действия и образ благостыни Его.
7:27 См.: 🔗1Кор. 12:4	Едина же сущи всяческая может, и пребывающи в себе вся обновляет, и по родом в душы преподобных преходящи, други Божия и пророки устрояет:
7:28	ни когоже бо любит Бог, токмо сего, иже со премудростию пребывает.
7:29	Есть бо сия благолепнее солнца и паче всякаго расположения звезд: свету соравняема обретается первая:
7:30	сего бо преемлет нощь, премудрости же не одолеет злоба.