Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 43 | |
43:1 См.: 🔗Ис. 41:8 | И ныне сице глаголет Господь Бог сотворивый тя, Иакове, и создавый тя, Израилю: не бойся, яко избавих тя, прозвах тя именем твоим: Мой еси ты. |
43:2 | И аще преходиши сквозе воду, с тобою есмь, и реки не покрыют тебе: и аще скозе огнь пройдеши, не сожжешися, и пламень не опалит тебе, |
43:3 | яко Аз Господь Бог твой, Святый Израилев, Спасаяй тя: сотворих премену твою Египет и Ефиопию, и Соину за тя. |
43:4 См.: 🔗Мал. 1:2 | Отнелиже честен был еси предо Мною, прославился еси, и Аз тя возлюбих, и дам человеки за тебе и князи за главу твою. |
43:5 | Не бойся, яко с тобою есмь: от восток приведу семя твое и от запад соберу тя: |
43:6 | реку северу: приведи: и ливу: не возбраняй, приведи сыны Моя от земли дальния и дщери Моя от краев земных, |
43:7 | всех, елицы нарицаются именем Моим: во славе бо Моей устроих его и создах его и сотворих и. |
43:8 См.: 🔗Ис. 42:18 🔗Лк. 1:79 | И изведох люди слепы, и очи суть такожде слепы, и глуси ушы имущии. |
43:9 См.: 🔗Ис. 42:9 | Вси языцы собрашася вкупе, и соберутся князи от них. Кто возвестит сия? Или яже исперва кто возвестит вам? Да приведут свидетели своя и оправдятся, и да услышат и да рекут истину. |
43:10 См.: 🔗Ис. 41:4 | Будите Ми свидетелие, и Аз свидетель, глаголет Господь Бог, и отрок Мой, егоже избрах, да увесте и веруете Ми и уразумеете, яко Аз есмь: прежде Мене не бысть ин Бог, и по Мне не будет. |
43:11 См.: 🔗Ос. 13:4 | Аз Бог, и несть разве Мене Спасаяй. |
43:12 | Аз возвестих и спасох, укорих, и не бе в вас чуждий: вы Мне свидетелие, и Аз свидетель, глаголет Господь Бог, |
43:13 См.: 🔗Иов. 9:12 🔗Ис. 14:27 | еще от начала, и несть изимаяй от руку Моею: сотворю, и кто отвратит е? |
43:14 | Тако глаголет Господь Бог, Избавляяй вас, Святый Израилев: вас ради послю в Вавилон и воздвигну вся бежащыя, и Халдее в кораблех свяжутся. |
43:15 | Аз Господь Бог Святый ваш, показавый Израиля Царя вашего. |
43:16 См.: 🔗Исх. 14:22 | Сице глаголет Господь, даяй путь по морю и по воде сильне стезю: |
43:17 | изводяй колесницы и кони и народ силен: но успоша и не востанут, угасоша аки лен угашен. |
43:18 См.: 🔗Ис. 65:17 | Не поминайте первых, и ветхих не помышляйте, |
43:19 См.: 🔗2Кор. 5:17 🔗Отк. 21:5 | се, Аз творю новая, яже ныне возсияют, и увесте я: и сотворю в пустыни путь и в безводней реки. |
43:20 | Возблагословят Мя зверие селнии, сирини и дщери струфовы: яко дах в пустыни воду и реки в безводней, напоити род Мой избранный, |
43:21 | люди Моя, яже снабдех, добродетели Моя поведати. |
43:22 См.: 🔗Ин. 15:16 🔗1Ин. 4:10 | Не ныне призвах тебе, Иакове, ниже трудитися сотворих тя, Израилю. |
43:23 | Не принесл еси Мне овец твоих всесожжения твоего, ни в жертвах твоих прославил Мя еси, не поработих тя в жертвах, ниже утруждена сотворих тя в Ливане: |
43:24 См.: 🔗Ис. 53:12 🔗Лк. 24:27 | не купил еси Мне на сребро фимиама, ниже тука треб твоих возжелах, но во гресех твоих стал еси предо Мною и в неправдах твоих. |
43:25 См.: 🔗Ис. 44:22 | Аз есмь, Аз есмь заглаждаяй беззакония твоя Мене ради и грехи твоя, и не помяну. |
43:26 | Ты же помяни, и да судимся: глаголи ты беззакония твоя прежде, да оправдишися. |
43:27 | Отцы ваши первии согрешиша, и князи ваши беззаконноваша на Мя. |
43:28 | И оскверниша князи святая Моя, и дах погубити Иакова и Израиля во укоризну. |