Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 11 | |
11:1 См.: 🔗Втор. 17:17 | И царь Соломон бе женолюбив, и поя жены чуждыя, и дщерь фараоню, Моавитяныни, Амманитяныни, и Аморреаныни, |
11:2 См.: 🔗Исх. 34:15 🔗Втор. 7:3 | от язык, ихже отрече Господь сыном Израилевым: не входите в ня, и тии да не входят в вас, да не отвратят душ ваших вслед идол своих: к тем прилепися Соломон любити, |
11:3 | и быша ему жен началных седмь сот, и подложниц триста. |
11:4 См.: 🔗3Цар. 21:25 🔗Сир. 47:22 | И бысть в время старости Соломони, и совратиша жены чуждия сердце его вслед богов иных, и не бе сердце его совершенно с Господем Богом его, якоже сердце Давида отца его, |
11:5 См.: 🔗Суд. 2:13 🔗4Цар. 23:13 | и хождаше Соломон вслед Астарта мерзости Сидонския и вслед царя их, идола сынов Аммоних. |
11:6 | И сотвори Соломон лукавое пред Господем: и не хождаше вслед Господа, якоже Давид отец его. |
11:7 См.: 🔗Чис. 21:29 🔗4Цар. 23:13 | Тогда созда Соломон высоко (капище) Хамосу, идолу Моавлю, и царю их, идолу сынов Аммоних, и Астарте, мерзости Сидонстей, на горе яже пред Иерусалимом: |
11:8 | и тако сотвори всем женам своим чуждим, яже кадяху и жряху идолом своим. |
11:9 См.: 🔗3Цар. 9:2 | И разгневася Господь на Соломона, яко уклони сердце свое от Господа Бога Израилева, и явльшагося ему дважды |
11:10 См.: 🔗3Цар. 6:12 | и заповедавшаго ему дважды о словеси сем, весма не ходити ему вслед богов инех, но хранити и творити яже заповеда ему Господь Бог, |
11:11 См.: 🔗3Цар. 12:15 | и рече Господь к Соломону: понеже быша сия с тобою, и не сохранил еси заповедий Моих и повелений Моих, яже заповедах тебе, раздирая раздеру царство твое из руку твоею и дам е рабу твоему: |
11:12 См.: 🔗3Цар. 12:16 | обаче во дни твоя не сотворю сих Давида ради отца твоего: от руки же сына твоего отиму е: |
11:13 См.: 🔗3Цар. 9:3 🔗3Цар. 11:31 | токмо всего царства не возму, скипетр един дам сыну твоему Давида ради раба Моего и Иерусалима ради града, егоже избрах. |
11:14 | И воздвиже Господь противника на Соломона Адера Идумеанина от семене царска во Идумеи. |
11:15 См.: 🔗2Цар. 8:14 | И бысть егда искорени Давид Едома, егда иде Иоав воевода вой погребати побиенныя, изсече всяк мужеск пол во Идумеи: |
11:16 См.: 🔗2Цар. 8:13 | яко шесть месяц седяше тамо Иоав и весь Израиль во Идумеи, дондеже изби всяк мужеск пол в Идумеи: |
11:17 См.: 🔗3Цар. 22:47 🔗2Цар. 8:14 | и избеже Адер сам и вси мужие Идумейстии от отроков отца его с ним, и внидоша во Египет: Адер же бяше отрочищь мал. |
11:18 | И восташа мужие из града Мадиамска, и приидоша в Фаран, и взяша мужей с собою и приидоша к фараону царю Египетскому. И вниде Адер к фараону, и даде ему (царь) дом, и пищу определи ему, и землю даде ему. |
11:19 | И обрете Адер благодать пред очима фараонима зело, и даде ему в жену сестру жены своея, сестру Фекемины болшую. |
11:20 | И роди ему сестра Фекемины Адеру Ганивафа сына своего, и воскорми его Фекемина посреде сынов фараоних, и бе Ганиваф посреде сынов фараоних. |
11:21 См.: 🔗3Цар. 2:10 🔗Исх. 4:18 | И Адер услыша бо Египте, яко успе Давид со отцы своими, и яко умре Иоав воевода воинству, и рече Адер к фараону: отпусти мя, да возвращуся в землю мою. |
11:22 | И рече фараон Адеру: чим ты не доволен еси у мене? И се, ты просишися отити в землю свою? И рече ему Адер: яко отпущая да отпустиши мя. И возвратися Адер в землю свою. |
11:23 См.: 🔗2Цар. 8:3 | И воздвиже Господь противника Соломону Разона, сына Елиадаева, иже убеже от Ададезера царя Сувска, господина своего. |
11:24 См.: 🔗2Цар. 8:3 🔗2Цар. 10:16 | И собрашася к нему мужие, и бе воевода полка мятежнаго, егда убиваше я Давид: и идоша в Дамаск, и седоша в нем, и воцаришася в Дамасце. |
11:25 | И бе стужая Израилеви во вся дни Соломони: сия злоба Адера: и отягчи Израиля и воцарися в земли Едомстей. |
11:26 См.: 🔗2Пар. 13:6 | И Иеровоам сын Наватов, Ефрафянин от Сариры, сын жены вдовицы, раб Соломонов, и воздвиже руце на царя Соломона. |
11:27 См.: 🔗3Цар. 9:15 | И сия вина, яко воздвиже руце на царя Соломона: царь Соломон созидаше Краеградие и ограждаше стеною град Давида отца своего: |
11:28 | Иеровоам же человек крепок силою. И виде Соломон отрока, яко муж дел есть, и постави его над бременами дому Иосифова. |
11:29 | И бысть во время оно, и Иеровоам изыде из Иерусалима, и обрете его Ахиа Силонитянин пророк на пути, и соврати его с пути: и бе Ахиа облечен в ризу нову: и (беста) оба едины на поли. |
11:30 | И взя Ахиа за ризу свою новую, яже бе на нем, и раздра ю на дванадесять жребий, |
11:31 См.: 🔗3Цар. 12:15 🔗3Цар. 14:8 | и рече Иеровоаму: приими себе десять жребий, яко тако глаголет Господь Бог Израилев: се, Аз отторгаю царство из руки Соломони, и дам ти хоругвий десять: |
11:32 См.: 🔗3Цар. 12:20 | и две хоругви будут ему, раба ради Моего Давида и Иерусалима ради града, егоже избрах Себе от всех колен Израилевых, |
11:33 | занеже остави Мя и поклонися Астарте мерзости Сидонстей и Хамосу и кумиром Моавлим и царю их претыканию сынов Аммоних, и не пойде по путем Моим, еже творити угодная предо Мною, якоже Давид отец его: |
11:34 | и не отиму царства всего от руку его, понеже защищая защищу его во вся дни живота его, Давида ради раба Моего, егоже избрах, иже сохрани заповеди Моя и оправдания: |
11:35 | и отиму царство от руки сына его, и дам ти десять хоругвий, |
11:36 См.: 🔗3Цар. 12:15 🔗2Цар. 21:17 | сыну же его дам две хоругви, яко да будет престол рабу Моему Давиду во вся дни предо Мною во Иерусалиме граде, егоже избрах Себе на положение имени Моему тамо: |
11:37 | и прииму тя, и воцаришися, в нихже желает душа твоя, и ты будеши царь над Израилем: |
11:38 | и будет аще сохраниши вся, елика заповедаю ти, и пойдеши по путем Моим, и сотвориши угодная предо Мною, хранити заповеди Моя и повеления Моя, якоже сотвори Давид раб Мой, и буду с тобою, и созижду ти дом верен, якоже создах Давиду, и дам ти Израиля: |
11:39 См.: 🔗Лк. 1:32 | и озлоблю род Давидов за сия, но не во вся дни. |
11:40 См.: 🔗3Цар. 14:30 | И искаше Соломон убити Иеровоама. И воста Иеровоам, и убежа во Египет к Сусакиму царю Египетску, и бе во Египте, дондеже Соломон умре. |
11:41 См.: 🔗2Пар. 1:1 🔗Сир. 47:23 | И прочая словес Соломоних, и вся елика сотвори, и весь смысл его, не се ли, сия писана быша в книзе словес Соломоних? |
11:42 | И дние, в няже царствова Соломон во Иерусалиме над всем Израилем, четыредесять лет. |
11:43 См.: 🔗2Пар. 9:31 🔗Мф. 1:7 | И успе Соломон со отцы своими: и погребоша его во граде Давида отца его, и воцарися Ровоам сын его вместо его. |