Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 24 | |
24:1 | Премудрость похвалит душу свою и посреде людий своих восхвалится. |
24:2 | В церкви Вышняго отверзет уста своя и прямо силе Его восхвалится: |
24:3 См.: 🔗Евр. 1:3 | аз из уст Вышняго изыдох и яко мгла покрых землю, |
24:4 | аз на высоких вселихся, и престол мой во столпе облачне, |
24:5 См.: 🔗Прем. 1:7 🔗Прем. 12:1 | круг небесный обыдох едина и во глубине бездны походих, |
24:6 | волну морскую и всю землю, и вся люди и язык стяжах, |
24:7 | со всеми сими покоя взысках, и во наследии чием водворюся? |
24:8 | Тогда заповеда ми Создатель всех, и Создавый мя препокои скинию мою и рече: |
24:9 | во Иакове вселися и во Израили наследствуй. |
24:10 См.: 🔗Прит. 8:22 | Прежде века из начала созда мя, и даже до века не оскудею. |
24:11 | Во скинии святей пред Ним послужих и тако в Сионе утвердихся: |
24:12 | во граде возлюбленнем такожде мя препокои, и во Иерусалиме власть моя: |
24:13 | и укоренихся в людех прославленных, в части Господни наследия Его. |
24:14 | Яко кедр вознесохся в Ливане и яко кипарис на горах Аермонских, |
24:15 См.: 🔗Втор. 34:3 | яко финикс возвысихся на брезех и яко сад шипковый во Иерихоне, |
24:16 | яко маслина благолепна на поли, и вознесохся яко явор: |
24:17 | якоже корица и яко аспалаф ароматов дах воню, и яко смирна избранна издах благоухание, |
24:18 | яко халвани и оникс и стакти, и яко ливаново курение во скинии. |
24:19 | Аз яко теревинф распрострох ветвия моя, и ветви моя ветви славы и благодати: |
24:20 См.: 🔗Ин. 15:1 | аз яко виноград прорастих благодать, и цвети мои плод славы и богатства. |
24:21 См.: 🔗Ис. 55:1 🔗Прит. 9:5 | Приступите ко мне, желающии мене, и от плодов моих насытитеся: |
24:22 См.: 🔗Пс. 18:11 | память бо моя сладка паче меда, и наследие мое паче сота медвена. |
24:23 | Ядущии мя еще взалчут, и пиющии мя еще вжаждутся: |
24:24 См.: 🔗Исх. 24:3 | слушаяй мене не посрамится и делающии у мене не согрешат. |
24:25 | Сия вся книга завета Бога Вышняго, |
24:26 | закон, егоже заповеда Моисей, наследие сонмом Иаковлим: |
24:27 См.: 🔗Быт. 2:11 | насыщая яко Фисон премудростию и яко Тигр во дни новоплодий, |
24:28 См.: 🔗Нав. 3:15 | исполняяй яко Евфрат разума и якоже Иордан во днех жатвы, |
24:29 См.: 🔗Ам. 8:8 | являяй яко свет наказание и якоже Гион во дни оымания вина. |
24:30 См.: 🔗1Кор. 13:9 | Не сконча первый уразумети ея, такожде и последний не изследи ея: |
24:31 См.: 🔗Рим. 11:33 | ибо паче моря умножися размышление ея, и совет ея паче бездны велия. |
24:32 | И аз яко раскопание из реки и якоже водотечие изыдох в рай. |
24:33 | Рех: напою мой вертоград и упою себе луг: |
24:34 См.: 🔗Флп. 1:9 | и се, раскопание ми бысть рекою, и река моя бысть морем. |
24:35 | Понеже наказание яко утро просвещу и проявлю е даже до далече: |
24:36 См.: 🔗Авв. 2:3 | еще учение якоже пророчество излию и оставлю е в роды вечны. |
24:37 | Видите, яко не себе единому трудихся, но всем ищущым ея. |