Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 5 | |
5:1 См.: 🔗3Цар. 7:51 | И внесе Соломон святая Давида отца своего, сребро и злато и вся сосуды, и даде в сокровище дому Господня. |
5:2 См.: 🔗3Цар. 8:1 | Тогда собра Соломон вся старейшины Израилевы и вся началники колен, вожды отечеств сынов Израилевых во Иерусалим, да вознесут кивот завета Господня от града Давидова, иже есть Сион. |
5:3 См.: 🔗3Цар. 8:2 | И собрашася ко царю вси мужие Израилевы в праздник, сей есть месяц седмый. |
5:4 См.: 🔗Чис. 4:15 🔗1Пар. 15:2 | И приидоша вси старейшины Израилевы, и взяша вси левити кивот |
5:5 | и внесоша его и скинию свидения и вся сосуды святыя, иже в скинии, и внесоша его священницы и левити. |
5:6 См.: 🔗3Цар. 8:5 | Царь же Соломон и весь сонм сынов Израилевых, и боящиися и собрании пред кивотом, жряху телцы и овцы безчисленны и несочисляемы от множества. |
5:7 См.: 🔗3Цар. 8:6 | И внесоша священницы кивот завета Господня на место его, еже есть молитвенник храма, во Святая Святых, под криле херувимов. |
5:8 | И бяху херувими распростерше крила своя над местом кивота, и покрываху херувими над кивотом и над носилами его свыше. |
5:9 См.: 🔗3Цар. 8:8 | И длиннее бяху носила, и видяхуся главы носил от святых в лице молитвенника, и не видяхуся вне, и быша тамо даже до настоящаго дне. |
5:10 | Ничтоже бе в кивоте, токмо две скрижали, ихже положи Моисей в Хориве, егда закон даде Господь сыном Израилевым, исходящым им из земли Египетския. |
5:11 См.: 🔗3Цар. 8:10 | И бысть исходящым священником от святых, вси бо священницы, иже ту обретошася, освящени быша и не бяху расположени в дневную чреду, |
5:12 См.: 🔗1Пар. 25:1 | левити же и певцы вси с сынми Асафовыми, со Еманом, Идифумом, и с сынми их и с братиями их, облечени в ризы льняны, в кимвалех и псалтири и гуслех (возглашаху) стояще пред олтарем, и с ними жерцев сто двадесять трубяще трубами: |
5:13 | и бысть един глас в трублении и в псалмопении и в возглашении гласом единым еже хвалити и исповедатися Господеви. И егда воздвигоша глас в трубах и кимвалех и органех песней, и глаголаху: исповедайтеся Господеви, яко благ, яко в век милость Его: и дом исполнися облака славы Господни, |
5:14 См.: 🔗Исх. 40:35 🔗3Цар. 8:11 | и не могоша священницы стати служити от лица облака, наполни бо слава Господня дом Божий. |