Книга Притчей Соломоновых, глава 9

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 9
9:1 См.: 🔗1Тим. 3:15 🔗Евр. 3:6 🔗Отк. 3:12	Премудрость созда себе дом и утверди столпов седмь:
9:2	закла своя жертвенная, и раствори в чаши своей вино, и уготова свою трапезу:
9:3 См.: 🔗Лк. 14:16	посла своя рабы, созывающи с высоким проповеданием на чашу, глаголющи:
9:4 См.: 🔗Мф. 11:25 🔗1Кор. 1:27	иже есть безумен, да уклонится ко мне.
9:5 См.: 🔗Ин. 6:48 🔗Ис. 55:1	И требующым ума рече: приидите, ядите мой хлеб и пийте вино, еже растворих вам:
9:6 См.: 🔗Тит. 2:12	оставите безумие и живи будете, да во веки воцаритеся: и взыщите разума, да поживете и исправите разум в ведении.
9:7	Наказуяй злыя приимет себе безчестие, обличаяй же нечестиваго порочна сотворит себе (обличения бо нечестивому раны ему).
9:8 См.: 🔗Прит. 15:12 🔗Мф. 7:6	Не обличай злых, да не возненавидят тебе: обличай премудра, и возлюбит тя.
9:9 См.: 🔗Прит. 27:6	Даждь премудрому вину, и премудрейший будет: сказуй праведному, и приложит приимати.
9:10 См.: 🔗Прит. 1:7	Начало премудрости страх Господень, и совет святых разум: разумети бо закон, помысла есть благаго.
9:11 См.: 🔗Прит. 10:27	Сим бо образом многое поживеши время, и приложатся тебе лета живота твоего.
9:12	Сыне, аще премудр будеши, себе премудр будеши и искренним твоим: аще же зол будеши, един почерпнеши злая. Сын наказан премудр будет, безумный же слугою употребится. Иже утверждается на лжах, сей пасет ветры, той же поженет птицы парящыя: остави бо пути своего винограда, в стезях же своего земледелания заблуди, проходит же сквозе пустыню безводную и землю определенную в жаждех, собирает же рукама неплодие.
9:13	Жена безумная и продерзая скудна хлебом бывает, яже не весть стыдения,
9:14	седе при дверех дому своего, на столце яве на стогнах,
9:15	призывающая мимоходящих и исправляющих пути своя:
9:16	иже есть от вас безумнейший, да уклонится ко мне: и лишенным разума повелеваю, глаголющи:
9:17 См.: 🔗Прит. 20:17 🔗Сир. 23:23	хлебом сокровенным в сладость прикоснитеся и воду татьбы сладкую пийте.
9:18 См.: 🔗Прит. 7:27	Он же не весть, яко земнороднии у нея погибают и во дне ада обретаются. Но отскочи, не замедли на месте ея, ниже настави ока своего к ней: тако бо пройдеши воду чуждую и прейдеши реку чуждую: от воды же чуждия ошайся и от источника чуждаго не пий, да многое время поживеши, и приложатся тебе лета живота.