Книга Притчей Соломоновых, глава 8

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 8
8:1 См.: 🔗Сир. 24:1 🔗Мф. 11:19 🔗1Кор. 1:24	Темже ты премудрость проповеждь, да разум послушает тебе.
8:2	На высоких бо краех есть, посреде же стезь стоит:
8:3	при вратех бо сильных приседит, во входех же поется.
8:4	Вас, о, человецы, молю, и вдаю мой глас сыном человеческим.
8:5 См.: 🔗Пс. 91:7	Уразумейте, незлобивии, коварство, ненаказаннии же, приложите сердце.
8:6 См.: 🔗Мф. 7:29	Послушайте мене: честная бо реку и изнесу от устен правая.
8:7 См.: 🔗Ин. 8:46	Яко истине поучится гортань мой, мерзки же предо мною устны лживыя.
8:8 См.: 🔗Пс. 11:7	С правдою вси глаголы уст моих, ничтоже в них стропотно, ниже развращенно.
8:9	Вся права разумевающым, и права обретающым разум.
8:10 См.: 🔗Иов. 28:15 🔗Прит. 3:14 🔗Прем. 7:9	Приимите наказание, а не сребро, и разум паче злата искушена: избирайте же ведение паче злата чиста.
8:11 См.: 🔗Иов. 28:16	Лучши бо премудрость камений многоценных, всякое же честное недостойно ея есть.
8:12 См.: 🔗Лк. 11:49	Аз премудрость вселих совет, и разум и смысл аз призвах.
8:13 См.: 🔗Сир. 1:18	Страх Господень ненавидит неправды, досаждения же и гордыни, и пути лукавых: возненавидех же аз развращенныя пути злых.
8:14	Мой совет и утверждение, мой разум, моя же крепость.
8:15 См.: 🔗Быт. 49:10 🔗Дан. 2:21 🔗Рим. 13:1	Мною царие царствуют, и сильнии пишут правду:
8:16	мною вельможи величаются, и властитилие мною держат землю.
8:17	Аз любящыя мя люблю, ищущии же мене обрящут благодать.
8:18 См.: 🔗Прит. 3:16	Богатство и слава моя есть, и стяжание многих и правда.
8:19 См.: 🔗Иов. 28:17 🔗Прем. 7:9	Лучше есть плодити мене, паче злата и камения драга: мои же плоды лучше сребра избранна.
8:20	В путех правды хожду и посреде стезь оправдания живу,
8:21	да разделю любящым мя имение, и сокровища их исполню благих. Аще возвещу вам бывающая на всяк день, помяну, яже от века, изчести.
8:22 См.: 🔗Прем. 9:9 🔗Сир. 24:10 🔗Ин. 1:1	Господь созда мя (евр.: стяжа мя) начало путий Своих в дела Своя,
8:23	прежде век основа мя, в начале, прежде неже землю сотворити,
8:24	и прежде неже бездны соделати, прежде неже произыти источником вод,
8:25 См.: 🔗Пс. 89:3 🔗Пс. 109:3	прежде неже горам водрузитися, прежде же всех холмов раждает мя.
8:26	Господь сотвори страны и ненаселенныя, и концы населенныя поднебесныя.
8:27	Егда готовяше небо, с Ним бех, и егда отлучаше престол Свой на ветрех,
8:28 См.: 🔗Иов. 26:8 🔗Иов. 36:29	и егда крепки творяше вышния облаки, и егда тверды полагаше источники поднебесныя,
8:29 См.: 🔗Иов. 38:10	и егда полагаше морю предел его, да воды не мимо идут уст его, и крепка творяше основания земли, бех при нем устрояющи.
8:30 См.: 🔗Ин. 5:20	Аз бех, о нейже радовашеся, на всяк же день веселяхся пред лицем Его на всяко время,
8:31 См.: 🔗Ин. 1:10	егда веселяшеся вселенную совершив, и веселяшеся о сынех человеческих.
8:32 См.: 🔗Пс. 118:1 🔗Лк. 11:28	Ныне убо, сыне, послушай мене: и блажени, иже пути моя сохранят.
8:33	Услышите премудрость, и умудритеся, и не отмещите.
8:34 См.: 🔗Сир. 14:24 🔗Мк. 3:20	Блажен муж, иже послушает мене, и человек, иже пути моя сохранит, бдяй при моих дверех присно, соблюдаяй праги моих входов:
8:35	исходи бо мои исходи живота, и уготовляется хотение от Господа:
8:36	согрешающии же в мя нечествуют на своя души, и ненавидящии мя любят смерть.