Книга пророка Исаии, глава 8

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 8
8:1 См.: 🔗Ис. 30:8 🔗Авв. 2:2	И рече Господь ко мне: приими себе свиток нов велик и напиши в нем писалом человечим, еже скоро пленение сотворити корыстей, приспе бо:
8:2	и свидетели мне сотвори верны человеки, Урию иереа и Захарию сына Варахиина.
8:3	И приступих ко пророчице, и во чреве зачат и роди сына. И рече Господь мне: нарцы имя ему: скоро плени, нагло расхити,
8:4 См.: 🔗Ис. 7:8	зане прежде неже разумети отрочати назвати отца или матерь, приимет силу Дамаскову, и корысти Самарийския пред царем Ассирийским.
8:5	И приложи Господь глаголати ко мне еще, глаголя:
8:6 См.: 🔗Неем. 3:15 🔗Ин. 9:11	понеже не восхотеша людие сии воды Силоамли текущия тисе, но восхотеша имети Рассона и сына Ромелиева царя над вами,
8:7 См.: 🔗Отк. 17:15 🔗Ис. 10:8	сего ради се, возводит Господь на вы воду реки сильну и многу, царя Ассирийска и славу его: и взыдет на всяку дебрь вашу, и обыдет всяку стену вашу,
8:8 См.: 🔗Ис. 30:28	и отимет от Иудеи человека, иже возможет главу воздвигнути, или могущаго что совершити: и будет полк его, во еже наполнити ширину страны Твоея, с нами Бог!
8:9	Разумейте, языцы, и покаряйтеся, услышите даже до последних земли: могущии, покаряйтеся: аще бо паки возможете, паки побеждени будете,
8:10 См.: 🔗Ис. 7:7	и иже аще совет совещаете, разорит Господь, и слово, еже аще возглаголете, не пребудет в вас, яко с нами Бог.
8:11 См.: 🔗Ис. 42:8	Тако глаголет Господь: крепкою рукою не покаряются хождению пути людий сих, глаголюще:
8:12 См.: 🔗Мф. 10:26	да не когда рекут: жестоко: все бо, еже аще рекут людие сии, жестоко есть: страха же их не убойтеся, ниже возмятитеся.
8:13 См.: 🔗1Пет. 3:15	Господа Сил, Того освятите, и Той будет тебе в страх.
8:14 См.: 🔗Ис. 28:16	И аще будеши уповая на Него, будет тебе во освящение, а не якоже о камень претыкания преткнешися, ниже яко о камень падения: домове же Иаковли в пругле, и в раздолии седящии во Иерусалиме.
8:15 См.: 🔗Ис. 28:13	Сего ради изнемогут в них мнози, и падут, и сокрушатся, и приближатся, и яти будут человецы в твердыни суще.
8:16 См.: 🔗Ис. 29:11 🔗Ис. 54:13 🔗Ин. 6:45	Тогда явлени будут печатлеющии закон, еже не учитися.
8:17	И речет: пожду Бога отвращшаго лице Свое от дому Иаковля и уповая буду Нань.
8:18 См.: 🔗Евр. 2:13	Се, аз и дети, яже ми даде Бог: и будут знамения и чудеса в дому Израилеве от Господа Саваофа, иже обитает на горе Сион.
8:19 См.: 🔗Лев. 19:31 🔗Втор. 18:11	И аще рекут к вам: изыщите чревоволшебников и от земли возглашающих, тщесловующих, иже от чрева глашают, не язык ли к Богу своему взыщет? Что испытуют мертвыя о живых?
8:20 См.: 🔗Мф. 13:52 🔗Деян. 28:23	Закон бо в помощь даде, да рекут не якоже слово сие, заньже не леть дары даяти.
8:21 См.: 🔗Пс. 58:16	И приидет на вы жесток глад, и будет, егда взалчете, скорбни будете и зло речете князю и отечеству:
8:22 См.: 🔗Ис. 5:30	и воззрят на небо горе, и на землю низу призрят, и се, скудость тесна и тма, скорбь и теснота и тма, якоже не видети: и не оскудеет в тесноте сый даже до времене.