Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 39 | |
39:1 См.: 🔗4Цар. 25:1 🔗Иер. 52:4 | И бысть в девятое лето Седекии царя Иудина, в месяц десятый, прииде Навуходоносор царь Вавилонский и вся сила его на Иерусалим, и воеваху нань. |
39:2 | И в первоенадесять лето Седекии, в месяц четвертый, в девятый день месяца, разседеся град. |
39:3 | И внидоша вси князи царя Вавилонска и седоша во вратех средних, Ниргелсарасар, Самагад, Навусахар, Навусарис, Нагаргас, Насерравамаг, и прочии воеводы царя Вавилонскаго. |
39:4 | И бысть егда узре я Седекиа царь Иудин и вси мужие ратнии, и избегоша, и изыдоша в нощи от града по пути вертограда царева и сквозе врата, яже беша между стеною и предстением: и изыдоша в путь пустыни. |
39:5 См.: 🔗Иер. 32:4 | И гнаша вслед их воинство Халдейско, и постигоша Седекию и поли пустыни Иерихонския, и емше приведоша к Навуходоносору царю Вавилонску во Ревлаф, иже в земли Емаф, и глагола к нему с судом. |
39:6 См.: 🔗Соф. 1:8 | И изби царь Вавилонский сыны Седекиины во Ревлафе пред очима его, и вся вельможы Иудины поби царь Вавилонский. |
39:7 См.: 🔗4Цар. 25:7 | И очи Седекии изят, и окова его путы, и отведе его в Вавилон. |
39:8 См.: 🔗4Цар. 25:9 🔗Иер. 12:13 | Дом же царев и домы всех людий пожгоша Халдее огнем и стену Иерусалимску превратиша: |
39:9 | и останок людий, и оставших во граде, и убегшыя, иже утекоша ко царю Вавилонску, и останок людий, и оставших пресели Навузардан воевода в Вавилон: |
39:10 См.: 🔗4Цар. 25:12 | а от людий убогих, ничтоже имущих, остави Навузардан воевода воинств в земли Иудине, и даде им винограды и нивы в той день. |
39:11 | И заповеда Навуходоносор царь Вавилонский о Иеремии пророце Навузарданови воеводе воинств и рече: |
39:12 | возми его и положи нань очи твои и ничтоже ему сотвори зла: но якоже восхощет, тако сотвори ему. |
39:13 | Посла убо Навузардан воевода воинства и Навузезван, и Рапсарис и Ниргел, и Сарасар и Фавман, и вси воеводы царя Вавилонска: |
39:14 См.: 🔗Иер. 26:24 | и послаша, и пояша Иеремию от двора темничнаго, и даша его Годолии сыну Ахикамову, сына Сафаня, и изведоша его, и седе среде людий. |
39:15 | И ко Иеремии бысть слово Господне ко дворе темничнем глаголя: |
39:16 См.: 🔗Иер. 38:7 | иди и рцы ко Авдемелеху Мурину, глаголя: тако рече Господь Бог Израилев: се, Аз приношу словеса Моя на град сей во злая? А не во благая: и будут пред лицем твоим в той день: |
39:17 | и избавлю тя в той день, и не дам тебе в руце человек, ихже ты боишися от лица их: |
39:18 См.: 🔗Иер. 21:9 🔗Иер. 38:2 | яко избавляя спасу тя, и мечем не падеши: и будет душа твоя на обретение, яко уповал еси на Мя, рече Господь. |