Евангелие от Луки, глава 20

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 20
20:1 См.: 🔗Мф. 21:23 🔗Мк. 11:27	И бысть во един от дний онех, учащу Ему люди в церкви и благовествующу, приидоша священницы и книжницы со старцы
20:2	и реша к Нему, глаголюще: рцы нам, коею областию сия твориши, или кто есть давый Тебе власть сию?
20:3	Отвещав же рече к ним: вопрошу вы и Аз единаго словесе, и рцыте Ми:
20:4	крещение Иоанново с небесе ли бе, или от человек?
20:5	Они же помышляху в себе, глаголюще, яко аще речем: с небесе, речет: почто убо не веровасте ему?
20:6 См.: 🔗Мф. 14:5	Аще ли же речем: от человек, вси людие камением побиют ны: известно бо бе о Иоанне, яко пророк бе.
20:7	И отвещаша: не вемы откуду.
20:8	Иисус же рече им: ни Аз глаголю вам, коею областию сия творю.
20:9 См.: 🔗Ис. 5:1 🔗Иер. 2:21 🔗Мф. 21:33 🔗Мк. 12:1	Начат же к людем глаголати притчу сию: человек некий насади виноград, и вдаде его делателем, и отиде на лета многа:
20:10	и во время посла к делателем раба, да от плода винограда дадут ему: делатели же бивше его, послаша тща.
20:11	И приложи послати другаго раба: они же и того бивше и досадивше (ему), послаша тща.
20:12	И приложи послати третияго: они же и того уязвльше изгнаша.
20:13	Рече же господин винограда: что сотворю? Послю сына моего возлюбленнаго, еда како, его видевше, усрамятся.
20:14 См.: 🔗Евр. 1:2	Видевше же его делателе, мышляху в себе, глаголюще: сей есть наследник: приидите, убием его, да наше будет достояние.
20:15 См.: 🔗Евр. 13:12	И изведше его вон из винограда, убиша. Что убо сотворит им господин винограда?
20:16	Приидет и погубит делатели сия и вдаст виноград инем. Слышавше же рекоша: да не будет.
20:17 См.: 🔗Пс. 117:22 🔗Ис. 28:16 🔗Мф. 21:42 🔗Мк. 12:10 🔗Деян. 4:11 🔗1Пет. 2:6 🔗Рим. 9:33	Он же воззрев на них, рече: что убо писаное сие: камень, егоже небрегоша зиждущии, сей бысть во главу угла?
20:18	Всяк падый на камени том, сокрушится: а на немже падет, стрыет его.
20:19	И взыскаша архиерее и книжницы возложити Нань руце в той час и убояшася народа: разумеша бо, яко к ним притчу сию рече.
20:20 См.: 🔗Мф. 22:15 🔗Мк. 12:13	И наблюдше послаша лаятели, притворяющих себе праведники быти: да имут Его в словеси, во еже предати Его началству и области игемонове.
20:21	И вопросиша Его, глаголюще: Учителю, вемы, яко право глаголеши и учиши, и не на лица зриши, но воистинну пути Божию учиши:
20:22	достоит ли нам кесареви дань даяти, или ни?
20:23	Разумев же их лукавство, рече к ним: что Мя искушаете?
20:24	Покажите Ми цату: чий имать образ и надписание? Отвещавше же рекоша: кесарев.
20:25 См.: 🔗Мф. 17:27 🔗Мф. 22:21 🔗Рим. 13:7	Он же рече им: воздадите убо, яже кесарева, кесареви, и яже Божия, Богови.
20:26	И не могоша зазрети глаголгола Его пред людьми: и дивишася о ответе Его и умолчаша.
20:27 См.: 🔗Мф. 22:23 🔗Мк. 12:18 🔗Деян. 23:8	Приступиша же нецыи от саддукей, глаголющии воскресению не быти, вопрошаху Его,
20:28 См.: 🔗Втор. 25:5	глаголюще: Учителю, Моисей написа нам: аще кому брат умрет имый жену, и той безчаден умрет, да брат его поймет жену и возставит семя брату своему:
20:29	седмь убо братий бе: и первый поят жену, умре безчаден:
20:30	и поят вторый жену, и той умре безчаден:
20:31	и третий поят ю: такожде же и вси седмь: и не оставиша чад и умроша:
20:32	послежде же всех умре и жена:
20:33	в воскресение убо, котораго их будет жена? Седмь бо имеша ю жену.
20:34	И отвещав рече им Иисус: сынове века сего женятся и посягают:
20:35	а сподобльшиися век он улучити и воскресение, еже от мертвых, ни женятся, ни посягают:
20:36	ни умрети бо ктому могут: равни бо суть Ангелом и сынове суть Божии, воскресения сынове суще:
20:37 См.: 🔗Исх. 3:6 🔗Мф. 22:32 🔗Мк. 12:26	а яко востают мертвии, и Моисей сказа при купине, якоже глаголет Господа Бога Авраамля и Бога Исаакова и Бога Иаковля:
20:38	Бог же несть мертвых, но живых: вси бо Тому живи суть.
20:39	Отвещавше же нецыи от книжник рекоша: Учителю, добре рекл еси.
20:40 См.: 🔗Мф. 22:42 🔗Мк. 12:35	Ктому же не смеяху Его вопросити ничесоже. Рече же к ним:
20:41	како глаголют Христа Сына Давидова быти?
20:42 См.: 🔗Мф. 22:44	Сам бо Давид глаголет в книзе псаломстей: рече Господь Господеви моему: седи о десную Мене,
20:43 См.: 🔗Пс. 109:1	дондеже положу враги Твоя подножие ногама Твоима.
20:44	Давид убо Господа Его нарицает, и како Сын ему есть?
20:45	Слышащым же всем людем, рече учеником Своим:
20:46 См.: 🔗Мф. 23:6 🔗Мк. 12:38 🔗Лк. 11:43	внемлите себе от книжник хотящих ходити во одеждах и любящих целования на торжищих и председания на сонмищих и преждевозлежания на вечерях:
20:47	иже снедают домы вдовиц и виною далече молятся: сии приимут лишше осуждение.