Книга пророка Иезекииля, глава 7

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 7
7:1	И бысть слово Господне ко мне глаголя:
7:2 См.: 🔗Плч. 4:18	и ты, сыне человечь, рцы: сия глаголет Господь: земли Израилеве конец прииде, конец прииде на четыри краи земли.
7:3	Пришел есть конец, ныне конец тебе, и испущу ярость Мою на тя, и отмщу тебе по путем твоим, и дам на тя вся мерзости твоя.
7:4 См.: 🔗Иез. 5:11 🔗Иез. 22:31	Не пощадит око Мое на тя, и не помилую, зане путь твой на тя дам, и мерзости твоя среде тебе будут, и увеси, яко Аз Господь.
7:5	Темже сия глаголет Адонаи Господь: зло едино зло, се, идет.
7:6	Конец пришел есть, прииде конец, воста на тя, се, прииде.
7:7	Прииде плетение на тя живущаго на земли: прииде время, приближися день, не с молвою, ниже с болезньми.
7:8 См.: 🔗Иез. 22:31	Ныне изблизу излию гнев Мой на тя и скончаю ярость Мою на тебе, и осужду тя по путем твоим и дам на тя вся мерзости твоя.
7:9 См.: 🔗Иез. 8:18	Не пощадит око Мое, и не помилую, зане пути твоя на тя дам, и мерзости твоя посреде тебе будут, и познаеши, яко Аз Господь бияй.
7:10 См.: 🔗Иоил. 2:2	Се, день Господень приходит, се, конец пришел есть, изыде плетение, и процвете жезл,
7:11	прозябе укоризна, и сокрушит утверждение беззаконника: и не с плищем, ни с потщанием: и не от них суть, и несть красы в них.
7:12	Прииде время, приближися день: купуяй да не радуется, и продаяй да не плачется, яко гнев на все множество их.
7:13	Занеже притяжаваяй ко продающему ктому не возвратится, и еще в жизни живущему, яко видение на все множество их не возвратится, и человек во очесех жизни своея не укрепится.
7:14	Вострубите трубою и разсудите вся, и не будет грядущаго на рать, яко гнев Мой на все множество их.
7:15 См.: 🔗Плч. 1:20 🔗Иез. 5:12	Рать отвне с мечем, глад же и смерть извнутрь: иже на поли мечем скончается, сущих же во граде глад и смерть скончает.
7:16 См.: 🔗Ис. 38:14	И уцелеют спасеннии от них и будут на горах яко голубицы скорбяще: и всех избию, коегождо в неправдах его.
7:17 См.: 🔗Иез. 21:7	Вся руки разслабеют, и вся стегна окаляются мокростию.
7:18 См.: 🔗Ис. 15:2 🔗Иер. 48:37	И препояшутся во вретища, и покрыет я ужас: и на всяцем лицы срам на них, и на всяцей главе плешь.
7:19 См.: 🔗Иов. 20:20 🔗Прит. 10:2 🔗Сир. 5:10 🔗Соф. 1:18	Сребро их на стогнах повержется, и злато их презрено будет: сребро их и злато не возможет избавити их в день гнева Господня, души их не насытятся, и чрева их не наполнятся, зане казнь неправостей их бысть.
7:20	Избранныя утвари в гордыню положиша я, и образы мерзостей своих и гнусности сотвориша от них: сего ради дах оная им в нечистоту.
7:21 См.: 🔗Ис. 1:7 🔗Иер. 6:12 🔗Ос. 7:9	И предам я в чуждия руце, еже разграбити я, и губителем земли в корысти, и осквернят я.
7:22	И отвращу лице Мое от них, и осквернят стражбу Мою, и внидут в ня неопасно, и осквернят я:
7:23	и сотворят мятеж, понеже земля полна суда крове, и град полн беззакония.
7:24	И приведу злыя языки, и наследят домы их: и отвращу величание крепости их, и осквернятся святая их.
7:25 См.: 🔗Иер. 8:11	И моление приидет, и взыщет мира, и не будет.
7:26 См.: 🔗Ис. 29:14	Горе на горе будет, и весть на весть будет, и не будет видение от пророка, и закон погибнет от жерца и совет от старец.
7:27 См.: 🔗Втор. 28:59 🔗Ис. 29:14 🔗Иер. 29:17	Царь восплачется, и князь облечется в пагубу, и руки людий земли разслабеют: по путем их сотворю им и по судом их отмщу им, и уразумеют, яко Аз Господь.