Книга Числа, глава 4

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 4
4:1	И рече Господь к Моисею и Аарону, глаголя:
4:2	возми сочисление сынов Каафовых от среды сынов Левииных, по сонмом их, по домом отечеств их,
4:3 См.: 🔗Чис. 8:15	от двадесяти и пяти лет и вышше, даже до пятидесяти лет, всяк входяй служити, творити вся дела в скинии свидения.
4:4	И сия дела сынов Каафовых от среды сынов Левииных, по сонмом их, по домом отечеств их, в скинии свидения Святое Святых.
4:5 См.: 🔗Чис. 10:17 🔗Нав. 18:1	И да внидут Аарон и сынове его, егда воздвигнется полк, и да снимут завесу осеняющую, и да обвиют в ню кивот свидения,
4:6 См.: 🔗3Цар. 8:8	и да покрыют его покровом кожаным синим, и да возложат нань одежду всю синетную сверху, и да вложат носила:
4:7 См.: 🔗Исх. 25:30	и на трапезе предложения да положат на ней одежду всю багряную и блюда, и кадилницы и чашы, и возливалницы, имиже возливают, и хлебы на ней всегда да будут:
4:8	и да возложат на ню одежду червлену, и да покрыют ю покровом кожаным синим, и да вложат носила ея:
4:9 См.: 🔗Исх. 25:31	и да возмут одежду синю, и покрыют светилник светящий и свещы его, и щипцы его и очищала его, и вся сосуды елеа его, имиже служат в них:
4:10	и да вложат его и вся сосуды его в покров кожан синий, и да возложат его на носила:
4:11 См.: 🔗Исх. 30:3	и на олтарь златый да положат одежду синю, и да покрыют его покровом кожаным синим, и да вложат носила его:
4:12	и да возмут вся сосуды служебныя, еликими служат в них во святых, и вложат во одежду синю, и да покрыют их покровом кожаным синим, и да возложат на носила:
4:13	и покров да возложат на олтарь, и покрыют его одеждою всею багряною:
4:14 См.: 🔗Исх. 27:3	и да возложат на него вся сосуды его, еликими служат на нем в них, и кадилники, и вилицы и чашы, и покров и вся сосуды олтаря, и да возложат на него покров кожан синь и да вложат носила его: и да возмут одежду багряну, и да покрыют умывалницу и стояла ея: и да вложат ю в покров кожаный синий, и да возложат на носила.
4:15 См.: 🔗1Пар. 13:10	И совершат Аарон и сынове его, покрывающе святая и вся сосуды святыя, внегда воздвизатися полку: и по сих да внидут сынове Каафовы воздвизати, и да не прикоснутся святых, да не умрут. Сия да воздвизают сынове Каафовы в скинии свидения.
4:16 См.: 🔗Исх. 30:23	Надсмотритель Елеазар, сын Аарона жерца, елей светилный, и фимиам сложения, и жертва яже по вся дни, и елей помазания, надсмотрение всея скинии и елика суть в ней во святем, во всех делех.
4:17	И рече Господь к Моисею и Аарону, глаголя:
4:18	не потребите сонм племене Каафова от среды левитов:
4:19	сие сотворите им, и живи будут и не умрут: приходящым им ко Святым Святых, Аарон и сынове его да внидут и да устроят их коегождо по ношению его,
4:20 См.: 🔗1Цар. 6:19	и да не внидут внезапу видети святая, и умрут.
4:21	И рече Господь к Моисею, глаголя:
4:22	возми сочисление сынов Гирсоних, и иже по домом отечеств их, по сонмом их и по племенем их,
4:23	от двадесяти и пяти лет и вышше, даже до пятидесяти лет, соглядайте я, всяк входяй служити и творити дела в скинии свидения.
4:24 См.: 🔗1Пар. 15:2	Сия служба сонма Гирсонова, служити и воздвизати.
4:25 См.: 🔗Исх. 26:7	И да воздвигнет опоны скинии и скинию свидения, и покров ея и покров синий сущий сверх ея, и опону дверий скинии свидения,
4:26	и опоны двора, и завесу дверий двора, елика над скиниею свидения, и яже окрест олтаря, и прочая их, и вся сосуды служебныя, еликими служат в них, да сотворят.
4:27	По слову Аарона и сынов его да будет вся служба сынов Гирсоновых по всем службам их и по всем делам их: и да соглядаеши их по именам, вся носимая ими.
4:28 См.: 🔗Чис. 7:7	Сия служба сонма сынов Гирсоновых в скинии свидения, и стражба их рукою Ифамара, сына Аароня жерца.
4:29	Сынове Мерарины по сонмом их, по домом отечеств их, соглядайте их,
4:30	от двадесяти и пяти лет и вышше, даже до пятидесяти лет, соглядайте их, всяк входяй служити дела скинии свидения.
4:31 См.: 🔗Чис. 10:17 🔗Исх. 26:15	И сия хранения воздвизаемых ими, по всем делом их в скинии свидения: главицы скинии и вереи ея, и столпы ея и стояла ея, и покров и стояла их, и столпы их, и покров дверий скинии,
4:32	и столпы двора окрест и стояла их, и столпы завесы дверий двора и стояла их, и колки их и верви их, и вся сосуды их и вся служения их: по именам соглядайте их и вся сосуды стражбы воздвизаемых ими.
4:33 См.: 🔗Чис. 7:8	Сия служба сонма сынов Мерариных во всех делех их, в скинии свидения рукою Ифамара, сына Аароня жерца.
4:34	И согляда Моисей и Аарон и князи Израилевы сыны Каафовы по сонмом их, по домом отечеств их,
4:35	от двадесяти и пяти лет и вышше, даже до пятидесяти лет, всяк входяй служити и творити дела в скинии свидения.
4:36	И бысть соглядание их по сонмом их, две тысящы седмь сот пятьдесят.
4:37	Сие сочтение сонма Каафова, всех служащих в скинии свидения, якоже согляда Моисей и Аарон повелением Господним, рукою Моисеовою.
4:38	И соглядани быша сынове Гирсони по сонмом своим, по домом отечеств своих,
4:39	от двадесяти и пяти лет и вышше, даже до пятидесяти лет, всяк входяй служити и творити дела в скинии свидения.
4:40	И бысть соглядание их по сонмом их, по домом отечеств их, две тысящы шесть сот тридесять.
4:41	Сие соглядание сонма сынов Гирсоновых, всех служащих в скинии свидения, ихже соглядаша Моисей и Аарон по глаголу Господню, рукою Моисеовою.
4:42	Соглядани же быша сынове Мерарины по сонмом своим, по домом отечеств своих,
4:43	от двадесяти и пяти лет и вышше, даже до пятидесяти лет, всяк входяй служити на дела скинии свидения.
4:44	И бысть сочтение их по племеном их, по сонмом их, по домом отечеств их, три тысящы и двести.
4:45	Сие сочисление сонма сынов Мерариных, ихже согляда Моисей и Аарон по глаголу Господню, рукою Моисеовою.
4:46	Вси согляданнии левиты, ихже согляда Моисей и Аарон и князи сынов Израилевых, по сонмом их и по домом отечеств их,
4:47	от двадесяти и пяти лет и вышше, даже до пятидесяти лет, всяк входяй на дело дел, и к делам воздвизаемым в скинии свидения.
4:48	И быша согляданнии осмь тысящ пять сот осмьдесят.
4:49	Повелением Господним соглядаше их Моисей, мужа по мужу над делы их, и яже воздвизаху сии, и соглядани суть, якоже повеле Господь Моисею.