Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 21 | |
21:1 | Аще же обрящется убиеный на земли, юже Господь Бог дает тебе наследити, лежащь на поли, и не ведят убившаго и: |
21:2 | да изыдут старцы и судии твои и да измерят до градов, иже окрест убиенаго: |
21:3 | и будет град приближаяйся убиеному, и да возмут старейшины града того юницу от говяд, еюже не делано, и яже ярма не понесе: |
21:4 | и да изведут старейшины града того юницу в дебрь суху, яже не оранна, ниже насеяна, и да пресекут жилы юницы в дебри: |
21:5 См.: 🔗Втор. 10:8 🔗Втор. 17:8 | и да приступят жерцы Левити: яко сих избра Господь Бог твой предстояти Ему и благословляти во имя Его: и во устех их да будет всякое прекословие и всякая язва: |
21:6 См.: 🔗Пс. 25:6 🔗Мф. 27:24 | и вси старейшины града того, приближающиися убиеному, да омыют руце над главою юницы, ейже пресечены суть жилы в дебри, |
21:7 | и отвещавше да рекут: руце наши не пролияша крове сея, и очи наши не видеша: |
21:8 | милостив буди людем Твоим Израилю, ихже извел еси, Господи, из земли Египетския, да не будет кровь неповинна на людех Твоих Израили: и очистится им кровь: |
21:9 | ты же отимеши кровь неповинну от среды себе, аще сотвориши доброе и угодное пред Господем Богом твоим. |
21:10 | Аще же изыдеши на брань противу врагом твоим, и предаст я Господь Бог твой в руце твои, и плениши плен от них, |
21:11 См.: 🔗Исх. 34:16 🔗Втор. 7:3 | и узриши в плене добру обличием, и возлюбиши ю, и поймеши ю себе в жену, |
21:12 | и введеши ю внутрь в дом твой, и да обриеши главу ея, и да обрежеши ногти ея, |
21:13 | и да совлечеши ризы пленныя ея с нея: и да сядет в дому твоем, и да плачется отца своего и матере своея месяц дний: и но сем внидеши к ней, и совокупишися с нею, и будет тебе жена. |
21:14 | И будет аще не восхощеши ея, да отпустиши ю свободну, продажею же да не продаси ея на цене: да не отринеши ея, понеже смирил еси ю. |
21:15 См.: 🔗Быт. 29:30 🔗1Цар. 1:5 | Аще же будут мужу две жены, едина от них люба, и другая не люба, и породят ему любая и нелюбая, и будет сын перворожденный от нелюбимыя: |
21:16 | и будет в оньже день разделит сыном своим имение свое, не возможет первенцем быти сын любимыя, презрев сына нелюбимыя первенца: |
21:17 См.: 🔗Быт. 49:3 🔗4Цар. 2:9 | но сына нелюбимыя за первенца да признает, и даст ему сугубо от всего, еже обрящется ему, яко сей есть начало чад его, и сему достоит первенство. |
21:18 См.: 🔗Втор. 13:6 | Аще же кому будет сын непокорив и грубитель, не послушаяй гласа отца своего и гласа матере своея, и накажут его, и не послушает их, |
21:19 | да возмут его отец его и мати его, и да изведут его пред старейшины града своего и пред врата места своего, |
21:20 | и да рекут к мужем града своего: сын наш сей непокорив есть и грубитель и не слушает речи нашея, сластолюбствуя пиянствует: |
21:21 | и да побиют его мужие града того камением, и да умрет: и измите злое от себе самих, да и прочии слышавше убоятся. |
21:22 | Аще же будет на ком грех, суд смертный, и да умрет, и повесите его на древе, |
21:23 См.: 🔗Гал. 3:13 | да не пренощует тело его на древе, но во гробе погребите его в тойже день: яко проклят есть от Бога всяк висяй на древе: и да не оскверните земли, юже Господь Бог твой дает тебе во жребий. |