Послание апостола Павла к Римлянам, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1 См.: 🔗2Цар. 12:5 🔗Мф. 7:1 🔗Лк. 6:37 🔗1Кор. 4:5	Сего ради безответен еси, о, человече всяк судяй: имже бо судом судиши друга, себе осуждаеши. Таяжде бо твориши судяй.
2:2	Вемы же, яко суд Божии есть поистинне на творящих таковая.
2:3	Помышляеши ли же сие, о, человече, судяй таковая творящым и творя сам таяжде, яко ты избежиши ли суда Божия,
2:4 См.: 🔗Ис. 30:18 🔗Иер. 3:12 🔗2Пет. 3:15	или о богатстве благости Его и кротости и долготерпении нерадиши, не ведый, яко благость Божия на покаяние тя ведет?
2:5 См.: 🔗Иак. 5:3	По жестокости же твоей и непокаянному сердцу, собираеши себе гнев в день гнева и откровения праведнаго суда Божия,
2:6 См.: 🔗Прит. 24:12 🔗Мф. 16:27	Иже воздаст коемуждо по делом его.
2:7 См.: 🔗Мф. 25:46	Овым убо, по терпению дела благаго, славы и чести и нетления ищущым, живот вечный.
2:8 См.: 🔗Иер. 23:19 🔗Евр. 10:27	А иже по рвению противляются убо истине, повинуются же неправде, ярость и гнев.
2:9	Скорбь и теснота на всяку душу человека творящаго злое, Иудеа же прежде и Еллина.
2:10	Слава же и честь и мир всякому делающему благое, Иудееви же прежде и Еллину.
2:11 См.: 🔗Втор. 10:17 🔗2Пар. 19:7	Несть бо на лица зрения у Бога.
2:12 См.: 🔗Лк. 12:47	Елицы бо беззаконно согрешиша, беззаконно и погибнут: и елицы в законе согрешиша, законом суд приимут.
2:13 См.: 🔗Мф. 7:21 🔗Иак. 1:22	Не слышателие бо закона праведни пред Богом, но творцы закона, (сии) оправдятся:
2:14	егда бо языцы, не имуще закона, естеством законная творят, сии, закона не имуще, сами себе суть закон.
2:15	Иже являют дело законное написано в сердцах своих, спослушествующеи им совести, и между собою помыслом осуждающым или отвещающым,
2:16 См.: 🔗Еккл. 12:14 🔗Мф. 25:31 🔗Ин. 5:22 🔗Деян. 10:42 🔗1Кор. 4:5	в день, егда судит Бог тайная человеком, по благовестию моему, Иисусом Христом.
2:17 См.: 🔗Мих. 3:11	Се ты Иудей именуешися, и почиваеши на законе, и хвалишися о Бозе,
2:18	и разумееши волю, и разсуждаеши лучшая, научаемь от закона,
2:19 См.: 🔗Ис. 42:19 🔗Мф. 15:14	уповая же себе вожда быти слепым, света сущым во тме,
2:20	наказателя безумным, учителя младенцем, имуща образ разума и истины в законе.
2:21 См.: 🔗Пс. 49:16	Научая убо инаго, себе ли не учиши,
2:22	проповедая не красти, крадеши: глаголяй не прелюбы творити, прелюбы твориши: гнушаяся идол, святая крадеши:
2:23	иже в законе хвалишися, преступлением закона Бога безчествуеши.
2:24 См.: 🔗Ис. 52:5 🔗Иез. 36:20	Имя бо Божие вами хулится во языцех, якоже есть писано.
2:25 См.: 🔗Лев. 26:41 🔗Иер. 4:4 🔗1Кор. 7:19 🔗Гал. 6:15	Обрезание бо пользует, аще закон твориши. Аще же закона преступник еси, обрезание твое необрезание бысть.
2:26 См.: 🔗Деян. 10:35	Аще убо необрезание оправдание закона сохранит, не необрезание ли его во обрезание вменится,
2:27 См.: 🔗Мф. 12:41	и осудит еже от естества необрезание, закон совершающее, тебе, иже Писанием и обрезанием еси преступник закона.
2:28 См.: 🔗Рим. 9:6	Не бо иже яве, Иудей есть, ни еже яве во плоти, обрезание.
2:29 См.: 🔗Втор. 30:6 🔗Рим. 4:12 🔗Кол. 2:11	Но иже в тайне Иудей, и обрезание сердца духом, (а) не писанием: емуже похвала не от человек, но от Бога.