Книга Бытия, глава 25

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 25
25:1	Приложив же Авраам, поя жену, ейже имя Хеттура:
25:2 См.: 🔗1Пар. 1:32	роди же ему Зомврана и Иезана, и Мадала и Мадиама, и Иесвока и Соиена.
25:3	Иезан же роди Савана и Фамана и Дедана. Сынове же Дедани быша: Рагуил и Навдеил, и Асуриим и Латусиим и Лаомим.
25:4	Сынове же Мадиамли: Ефар и афир, и Енох и Авида и Елдага. Вси сии быша сынове Хеттурины.
25:5 См.: 🔗Быт. 15:4 🔗Быт. 21:10 🔗Быт. 24:36	Даде же Авраам вся своя имения Исааку сыну своему:
25:6	сыном же наложниц своих даде Авраам дары и отпусти я от Исаака сына своего, еще жив сый, к востоку на землю восточную.
25:7	Сия же лета дний жития Авраамля, елика поживе, лет сто седмьдесят пять:
25:8 См.: 🔗Быт. 35:29 🔗Евр. 12:23	и ослабев умре Авраам в старости добрей, старец исполнен дний, и приложися к людем своим.
25:9 См.: 🔗Быт. 49:30	И погребоша его Исаак и Исмаил два сынове его в пещере Сугубей, на селе Ефронове сына Саарова Хеттеанина, еже есть прямо Мамврии,
25:10 См.: 🔗Быт. 23:16	на селе и в пещере, юже притяжа Авраам от сынов Хеттеовых: тамо погребоша Авраама и Сарру жену его.
25:11 См.: 🔗Быт. 16:14 🔗Быт. 24:62	Бысть же по умертвии Авраамли, благослови Бог Исаака сына его: и вселися Исаак у кладязя Видения.
25:12 См.: 🔗Быт. 16:15	Сия же бытия Исмаила сына Авраамля, егоже роди Агарь Египтяныня, раба Саррина, Аврааму:
25:13 См.: 🔗1Пар. 1:29	и сия имена сынов Исмаилих, по именом родов его: первенец Исмаилов Наваиоф, и Кидар и Навдеил, и Массам
25:14	и Масма, и Дума и Масси,
25:15 См.: 🔗Иов. 6:19	и Ходдан и Феман, и Иетур и Нафес и Кедма.
25:16	Сии суть сынове Исмаили: и сия имена их в скиниях их и в селех их: дванадесять князи в языцех их.
25:17	И сия лета жития Исмаилова, сто тридесять седмь лет: и ослабев умре, и приложися к роду своему.
25:18	Вселися же от Евилата даже до Сура, иже есть в лице Египту, даже доити ко Ассириом: пред лицем всех братий своих вселися.
25:19 См.: 🔗Быт. 21:2 🔗1Пар. 1:34 🔗Мф. 1:2	И сия бытия Исаака сына Авраамля: Авраам роди Исаака.
25:20	Бяше же Исаак лет четыредесяти, егда поя Ревекку дщерь Вафуила Сирина от Месопотамии Сирския, сестру Лавана Сирина, себе в жену.
25:21	Моляшеся же Исаак Господеви о Ревекце жене своей, яко неплоды бяше: послуша же его Бог, и зачат во утробе Ревекка жена его.
25:22	Играста же младенца в ней, и рече: аще тако ми хощет быти, почто ми сие? И иде вопрошати Господа.
25:23 См.: 🔗Рим. 9:10 🔗Мал. 1:2	И рече ей Господь: два языка во утробе твоей суть, и двои людие от утробы твоея разлучатся: и людие людий превзыдут, и болший поработает меншему.
25:24	И исполнишася дние родити ей, и бяху сей близнята во утробе ея:
25:25 См.: 🔗Быт. 27:11	изыде же сын первенец чермен, весь, яко кожа, космат: и нарече имя ему Исав:
25:26 См.: 🔗Ос. 12:3 🔗Деян. 7:8	и посем изыде брат его, рука же его придержася пяте Исавове: и нарече имя ему Иаков. Исааку же бе шестьдесят лет, егда роди их Ревекка.
25:27	Возрастоша же юноши: и бысть Исав человек ведый ловити, селный: Иаков же бысть человек нелукав, живый в дому.
25:28	И возлюби Исаак Исава, яко ловитва его бяше брашно ему: Ревекка же любляше Иакова.
25:29	Свари же Иаков варение: и прииде Исав с поля изнемог,
25:30 См.: 🔗Быт. 36:1	и рече Исав Иакову: напитай мя варением сочива сего, яко изнемогаю. Сего ради прозвася имя ему Едом.
25:31	И рече Иаков Исаву: отдаждь ми днесь первенство свое.
25:32	Рече же Исав: се, аз иду умрети, и вскую ми первенство сие?
25:33 См.: 🔗Евр. 12:16 🔗Быт. 27:36	И рече Иаков ему: кленися ми днесь. И кляся ему, и отдаде Исав Иакову первенство свое.
25:34	Иаков же даде Исаву хлеб и варение сочевно: яде же и пи, и востав отиде: и нивочтоже вмени себе Исав первенство.