Послание апостола Павла к Титу, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1 См.: 🔗Тит. 1:9	Ты же глаголи, яже подобает здравому учению:
2:2	старцем трезвенным быти, честным, целомудренным, здравствующым верою, любовию, терпением:
2:3 См.: 🔗1Тим. 2:9	старицам такожде во украшении святолепным, не клеветивым, не вину многу порабощенным, доброучителным,
2:4	да уцеломудрят юныя, мужелюбицам быти, чадолюбицам,
2:5 См.: 🔗Быт. 3:16 🔗Еф. 5:22	целомудренным, чистым, домы добре правящым, благим, покаряющымся своим мужем, да не слово Божие хулится:
2:6	юношы такожде моли целомудрствовати.
2:7 См.: 🔗1Пет. 5:3 🔗1Тим. 4:12	О всем (же) сам себе подавая образ добрых дел, во учении независтное, честность, нетление,
2:8 См.: 🔗1Пет. 2:12	слово здравое, незазорное. Да противный посрамится, ничтоже имея глаголати о нас укорно.
2:9 См.: 🔗1Пет. 2:18 🔗Еф. 6:5 🔗Кол. 3:22	Рабы, своим господем повиноватися, во всем благоугодным быти, не прекословным,
2:10	не крадущым, но веру всяку являющым благу. Да учение Спасителя нашего Бога украшают во всем.
2:11 См.: 🔗Лк. 1:47 🔗Лк. 2:30 🔗Лк. 3:6 🔗Тит. 3:4	Явися бо благодать Божия спасителная всем человеком,
2:12 См.: 🔗1Ин. 2:15 🔗Еф. 1:4	наказующи нас, да отвергшеся нечестия и мирских похотей, целомудренно и праведно и благочестно поживем в нынешнем веце,
2:13 См.: 🔗Деян. 24:25 🔗1Ин. 3:2	ждуще блаженнаго упования и явления славы великаго Бога и Спаса нашего Иисуса Христа,
2:14 См.: 🔗Исх. 19:6 🔗Гал. 1:4 🔗Еф. 2:10 🔗Евр. 9:14	Иже дал есть Себе за ны, да избавит ны от всякаго беззакония и очестит Себе люди избранны, ревнители добрым делом.
2:15	Сия глаголи, и моли, и обличай со всяким повелением. Да никтоже тя преобидит.