Книга Притчей Соломоновых, глава 30

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 30
30:1	Сия глаголет муж верующым Богови, и почиваю:
30:2 См.: 🔗1Кор. 15:9 🔗Иак. 1:10	безумнее бо есмь от всех человек, и разума человеческаго несть во мне:
30:3	Бог же научи мя премудрости, и разум святых уразумех.
30:4 См.: 🔗Иов. 38:4	Кто взыде на небо и сниде? Кто собра ветры в недра? Кто возврати воду в ризу? Кто обдержа вся концы земли? Кое имя его? Или кое имя сыну его, да разумееши?
30:5 См.: 🔗Пс. 11:7	Вся бо словеса Божия раздежена: защищает же Сам благоговеющих Ему.
30:6 См.: 🔗Втор. 4:2 🔗Втор. 12:32	Не приложи ко словесем Его, да не обличит тя, и ложь будеши.
30:7	Двое прошу у Тебе: не отими от мене благодати прежде умертвия моего:
30:8 См.: 🔗Евр. 13:5 🔗Мф. 6:11 🔗1Тим. 6:8	суетно слово и ложно далече от мене сотвори, богатства же и нищеты не даждь ми: устрой же ми потребная и самодоволная,
30:9 См.: 🔗Втор. 8:12	да не насыщься ложь буду и реку: кто мя видит? Или обнищав украду и кленуся именем Божиим.
30:10	Не предаждь раба в руце господина, да не когда прокленет тя, и изчезнеши.
30:11	Чадо зло кленет отца и матерь не благословит.
30:12 См.: 🔗Ис. 65:5	Чадо зло праведна себе судит, исхода же своего не измы.
30:13 См.: 🔗Прит. 6:17	Чадо зло высоки очи имать, веждома же своима возносится.
30:14 См.: 🔗Пс. 54:22 🔗Прит. 12:18 🔗Иер. 9:8	Чадо зло мечь зубы (своя) имать, и членовныя яко сечиво, еже губити и поядати смиренныя от земли и убогия их от человек.
30:15	Пиявица име три дщери, любовию возлюблены, и три сия не насытишася ея, и четвертая не удовлися рещи: доволно (ми есть).
30:16	Ад и похоть жены, и земля ненапоеная водою и вода и огнь не рекут: довлеет.
30:17 См.: 🔗Прит. 20:20	Око ругающееся отцу и досаждающее старости матерни, да исторгнут е вранове от дебрия и да снедят е птенцы орли.
30:18	Трие ми суть невозможная уразумети, и четвертаго не вем:
30:19	следа орла паряща (по воздуху) и пути змиа (ползуща) по камени, и стези корабля пловуща по морю и путий мужа в юности (его).
30:20	Таков путь жены блудницы: яже егда сотворит, и измывшися, ничтоже, рече, содеях нелепо.
30:21	Треми трясется земля, четвертаго же не может понести:
30:22	аще раб воцарится, и безумный исполнится пищею, и раба аще изженет свою госпожу,
30:23	и мерзкая жена аще ключится добру мужу.
30:24	Четыри же суть малейшая на земли, сия же суть мудрейша мудрых:
30:25 См.: 🔗Прит. 6:6	мравие, имже несть крепости и уготовляют в жатву пищу:
30:26	и хирогрилли, язык не крепок, иже сотвориша в камениих домы своя:
30:27	безцарни суть прузие, и воюют от единаго повеления благочинно:
30:28	ящерица, руками опирающися и удобь уловляема сущи, живет во твердех царевых.
30:29	Трие суть, яже благопоспешно ходят, четвертое же, еже добре проходит:
30:30 См.: 🔗Дан. 7:4 🔗Отк. 5:5	скимен львов крепчае зверей, иже не отвращается, ни устрашается скота,
30:31 См.: 🔗Еккл. 8:4	и петель ходя в кокошех благодушен, и козел предводитель стаду, и царь глаголяй к народу во языце.
30:32	Аще вдаси себе в веселие и простреши руку твою со сваром, поруган будеши.
30:33 См.: 🔗Прит. 15:18	Мельзи млеко, и будет масло. Аще ли ноздри чешеши, изыдет кровь: аще же извлечеши словеса, изыдут судове и тяжбы.