Книга пророка Иезекииля, глава 24

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 24
24:1	И бысть слово Господне ко мне, в девятое лето, в месяц десятый, в десятый день месяца, глаголя:
24:2 См.: 🔗Иер. 22:30 🔗4Цар. 25:1	сыне человечь, напиши себе имя дне сего, от негоже укрепися царь Вавилонский на Иерусалим, от сего дне, иже днесь,
24:3	и рцы притчу к дому прогневляющему, и речеши к ним: сия глаголет Адонаи Господь: настави коноб, настави и влий в онь воду,
24:4 См.: 🔗Мих. 3:3	и верзи в онь на двое разсеченая, всякое разсечение доброе, голень и рамо, обрезана от костей,
24:5	от избранных скотов взятая, и подгнещай костьми под ними: возвре и воскипе, и сваришася кости его посреде его.
24:6 См.: 🔗Наум. 3:1 🔗Авв. 2:12	Того ради сия глаголет Адонаи Господь: о, граде кровей! Конобе, в немже есть яд, и яд не изыде из него: по удом его изнесе, не паде на нем жребий.
24:7 См.: 🔗Быт. 4:10 🔗Иез. 26:4 🔗Пс. 78:13	Яко кровь его среде его есть, на гладцем камени вчиних ю: не пролиях ея на землю, еже покрыти ю землею,
24:8	еже навести ярость Мою (на ню), во отмщение еже отмстити: дах кровь его на гладцем камени, еже не покрыти ея.
24:9 См.: 🔗Наум. 3:1	Того ради сия глаголет Адонаи Господь: о, люте, граде кровей! Аз же возвеличу главню
24:10	и умножу дрова и возгнещу огнь, яко да истают мяса, и оскудеет юха, и кости истают,
24:11	и станет на главнях его, (тощь) разгореся, яко да изгорит, и распалится и сгорит медь его, и истает среде его нечистота его, и оскудеет яд его:
24:12	да смирится яд его, и не изыдет из него многий яд его, и посрамится яд его:
24:13 См.: 🔗Иез. 5:13 🔗Иез. 16:42	в нечистоте твоей укроп, понеже осквернялся еси ты и не очистился от нечистоты твоея: и что будет аще не очистишися по сем, дондеже исполню ярость Мою в тебе?
24:14	Аз Господь глаголах, и приидет, и сотворю, и не укосню, и не пощажу, и не буду умолен: по путем твоим и по помыслом твоим сужду тебе, глаголет Адонаи Господь: сего ради, се, Аз сужду тебе по кровем твоим и по помыслом твоим сужду тебе, нечисте, пресловуте и великий на разгневание.
24:15	И бысть слово Господне ко мне глаголя:
24:16 См.: 🔗Прит. 31:10 🔗Сир. 26:16 🔗1Кор. 7:29	сыне человечь, се, Аз вземлю от тебе желания очес твоих в поражении, не восплачи, ниже возрыдай, ниже да приидут тебе слезы,
24:17 См.: 🔗Втор. 26:14 🔗Ос. 9:4 🔗Иез. 24:22	возстени молчя: стенание крове, чресл плачь есть: да будут власи твои сплетени на тебе, и сапози твои на ногах твоих, и да не утешишися устнами их, и хлеба мужей да не снеси.
24:18	И глаголах к людем заутра, якоже заповеда ми, и умре жена моя в вечер, и сотворих заутра, якоже повелеся ми.
24:19	И рекоша ко мне людие: не возвестиши ли нам, что суть сия, яже ты твориши?
24:20	И рекох к ним: слово Господне бысть ко мне глаголя:
24:21	рцы к дому Израилеву, сия глаголет Адонаи Господь: се, Аз оскверню святая Моя, величания крепости вашея, желания очес ваших, и ихже щадят души вашя: и сынове ваши и дщери вашя, яже остависте, мечем падут:
24:22 См.: 🔗Иер. 16:7 🔗Иез. 24:17	и сотворите, якоже аз сотворих: от уст их не утешитеся и хлеба мужей не снесте,
24:23 См.: 🔗Иез. 24:22	и власи ваши на главах ваших, и сапози ваши на ногах ваших: не будете терзатися, ниже плакати, и истаете в неправдах ваших, и не утешите кийждо брата своего.
24:24 См.: 🔗Иез. 12:6	И будет вам Иезекииль в чудо: по всему елика сотворих, сотворите: егда приидут сия, и уразумеете, яко Аз Адонаи Господь.
24:25 См.: 🔗Пс. 143:12	И ты, сыне человечь, не в день ли той, егда возму от них крепость их, вознесение хвальбы их, желания очию их и возношение души их, сыны их и дщери их:
24:26 См.: 🔗Иез. 33:21	в той день приидет уцелевый к тебе возвестити тебе во ушы,
24:27 См.: 🔗Иез. 15:7 🔗Иез. 24:24 🔗Иез. 29:21 🔗Ам. 5:13	в той день отверзутся уста твоя ко уцелевшему, и возглаголеши и не премолчиши ктому, и будеши им в чудо: и уведят, яко Аз Адонаи Господь.