Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 4 | |
4:1 | Адам же позна Еву жену свою, и заченши роди Каина и рече: стяжах человека Богом. |
4:2 | И приложи родити брата его, Авеля. И бысть Авель пастырь овец, Каин же бе делаяй землю. |
4:3 | И бысть по днех, принесе Каин от плодов земли жертву Богу: |
4:4 См.: 🔗Евр. 11:4 | и Авель принесе и той от первородных овец своих и от туков их. И призре Бог на Авеля и на дары его: |
4:5 См.: 🔗Прит. 15:8 🔗Ис. 1:13 | на Каина же и на жертвы его не внят. И опечалися Каин зело, и испаде лице его. |
4:6 См.: 🔗Мф. 20:15 | И рече Господь Бог Каину: вскую прискорбен был еси? И вскую испаде лице твое? |
4:7 См.: 🔗Рим. 6:16 | Еда аще право принесл еси, право же не разделил еси, не согрешил ли еси? Умолкни: к тебе обращение его, и ты тем обладаеши. |
4:8 | И рече Каин ко Авелю брату своему: пойдем на поле. И бысть внегда быти им на поли, воста Каин на Авеля брата своего и уби его. |
4:9 См.: 🔗Пс. 9:13 🔗Пс. 115:6 | И рече Господь Бог ко Каину: где есть Авель брат твой? И рече: не вем: еда страж брату моему есмь аз? |
4:10 См.: 🔗Евр. 12:24 🔗Отк. 6:10 | И рече Господь: что сотворил еси сие? Глас крове брата твоего вопиет ко Мне от земли: |
4:11 | и ныне проклят ты на земли, яже разверзе уста своя прияти кровь брата твоего от руки твоея: |
4:12 | егда делаеши землю, и не приложит силы своея дати тебе: стеня и трясыйся будеши на земли. |
4:13 | И рече Каин ко Господу Богу: вящшая вина моя, еже оставитися ми: |
4:14 См.: 🔗Быт. 9:6 | аще изгониши мя днесь от лица земли, и от лица Твоего скрыюся, и буду стеня и трясыйся на земли, и будет, всяк обретаяй мя убиет мя. |
4:15 | И рече ему Господь Бог: не тако: всяк убивый Каина седмижды отмстится. И положи Господь Бог знамение на Каине, еже не убити его всякому обретающему его. |
4:16 | И изыде Каин от лица Божия и вселися в землю Наид, прямо Едему. |
4:17 | И позна Каин жену свою, и заченши роди Еноха. И бе зиждяй град, и именова град во имя сына своего Енох. |
4:18 | Родися же Еноху Гаидад: и Гаидад роди Малелеила: и Малелеил роди Мафусала: Мафусал же роди Ламеха. |
4:19 См.: 🔗Быт. 2:24 | И взя себе Ламех две жены: имя единей Ада и имя вторей Селла. |
4:20 | И роди Ада Иовила: сей бяше отец живущих в селениих скотопитателей. |
4:21 | И имя брату его Иувал: сей бяше показавый певницу и гусли. |
4:22 | Селла же и тая роди Фовела: сей бяше млатобиец, ковачь меди и железа: сестра же Фовелова Ноема. |
4:23 | Рече же Ламех своим женам: Ада и Селла, услышите глас мой, жены Ламеховы, внушите моя словеса: яко мужа убих в язву мне и юношу в струп мне: |
4:24 | яко седмицею отмстися от Каина, от Ламеха же седмьдесят седмицею. |
4:25 См.: 🔗Быт. 5:3 | Позна же Адам Еву жену свою: и заченши роди сына, и именова имя ему Сиф, глаголющи: воскреси бо ми Бог семя другое, вместо Авеля, егоже уби Каин. |
4:26 | И Сифу бысть сын: именова же имя ему Енос: сей упова призывати имя Господа Бога. |