Вторая книга Паралипоменон (Вторая книга Хроник, Вторая Летопись), глава 1

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 1
1:1 См.: 🔗3Цар. 2:12 🔗3Цар. 3:1	И укрепися Соломон сын Давидов на царстве своем, и Господь Бог его (бе) с ним и возвеличи его в высоту.
1:2	И рече Соломон ко всему Израилю, тысящником и сотником, и судиям и всем началником пред Израилем.
1:3 См.: 🔗3Цар. 3:4 🔗1Пар. 16:39 🔗Исх. 40:18	И иде Соломон и все множество в вышний Гаваон, идеже бе скиния свидения Божия, юже сотвори Моисей раб Божий в пустыни.
1:4 См.: 🔗2Цар. 6:17	Кивот же Господень принесе Давид от Града Кариафиарима на место, еже уготова ему Давид, яко водрузи ему скинию во Иерусалиме.
1:5 См.: 🔗Исх. 31:2 🔗Исх. 38:1	И олтарь медян, егоже содела Веселеил сын Урии сына Орова, ту бе пред скиниею Господнею и взыска его Соломон и вся церковь.
1:6	Вознесе же ту Соломон на олтари медянем пред Господем, иже в скинии свидения, и принесе на нем тысящу всесожжений.
1:7 См.: 🔗3Цар. 3:5	В ту нощь явися Господь Соломону и рече ему: проси (что хощеши) да дам тебе.
1:8 См.: 🔗1Пар. 28:5	Рече же Соломон к Богу: Ты сотворил еси с Давидом отцем моим милосердие велико и поставил мя еси царя вместо его:
1:9 См.: 🔗3Цар. 3:8 🔗Прем. 9:7	и ныне, Господи Боже, да исполнится слово Твое к Давиду отцу моему, Ты бо мене сотворил царя над людьми многими, якоже прах земный:
1:10 См.: 🔗3Цар. 3:12 🔗Прем. 7:7 🔗Чис. 27:17	ныне даждь мне премудрость и разум, да вниду и изыду пред людьми твоими сими, кто бо может судити сих людий Твоих многих?
1:11 См.: 🔗3Цар. 3:11	И рече Бог к Соломону: понеже бысть сие в сердцы твоем, и не попросил еси богатства имений, ниже славы, ниже душ противящихся тебе, и дний многих не просил еси, но просил еси себе премудрости и разума, да судити можеши люди Моя, над нимиже поставих тя царя,
1:12 См.: 🔗3Цар. 3:13 🔗3Цар. 4:31 🔗2Пар. 9:22	премудрость и разум даю тебе, богатство же и имения и славу дам тебе, яко не бысть в царех преждебывших тебе подобен тебе, и по тебе такожде не будет.
1:13	Прииде же Соломон от вышняго Гаваона во Иерусалим пред скинию свидения и царствова над Израилем.
1:14 См.: 🔗3Цар. 10:26	И собра Соломон колесницы и конники, и быша ему тысяща и четыреста колесниц и дванадесять тысящ конник: и остави их во градех колесничных, людие же с царем во Иерусалиме.
1:15 См.: 🔗3Цар. 10:27	И положи царь сребро и злато во Иерусалиме яко камение, кедры же во Иудеи яко черничие, еже на поли во множестве.
1:16 См.: 🔗3Цар. 10:28	Исхождение же коней Соломоновых из Египта ценою купцов царских, иже хождаху и куповаху.
1:17 См.: 🔗3Цар. 10:29	И восхождаху и привождаху из Египта колесницу едину за шесть сот сребреник, и коня за сто и пятьдесят сребреник: такожде и от всех царств Хеттейских и от царей Сирийских рукама их приводима бываху.