Книга пророка Исаии, глава 64

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 64
64:1 См.: 🔗Лк. 10:24 🔗Отк. 22:20 🔗Пс. 96:5	Аще отверзеши небо, трепет приимут от Тебе горы и растают,
64:2 См.: 🔗Пс. 82:19	яко тает воск от лица огня, и попалит огнь супостаты, и явлено будет имя Твое в сопротивных Твоих: от лица Твоего языцы возмятутся:
64:3 См.: 🔗Суд. 5:5	егда сотвориши славная, трепет приимут от Тебе горы.
64:4 См.: 🔗1Кор. 2:9	От века не слышахом, ниже очи наши видеша бога, разве Тебе, и дела Твоя, яже сотвориши ждущым милости.
64:5 См.: 🔗Пс. 30:20	Милость бо срящет творящих правду, и пути Твоя помянутся: се, Ты разгневался еси, и мы согрешихом.
64:6 См.: 🔗Пс. 89:6	Сего ради заблудихом и быхом яко нечисти вси мы, якоже порт нечистыя вся правда наша, и отпадохом яко листвие беззаконий ради наших: тако ветр восхитит нас.
64:7	И несть призываяй имя Твое и помянувый удержати Тя: яко отвратил еси лице Твое от нас и предал ны еси беззаконий ради наших.
64:8 См.: 🔗Ис. 63:16	И ныне, Господи, Отец наш еси Ты, мы же брение, дела руку Твоею вси:
64:9 См.: 🔗Пс. 78:8	не прогневайся на ны зело и не помяни во время беззаконий наших, и ныне призри, яко людие Твои вси мы.
64:10 См.: 🔗Пс. 78:1	Град святилища Твоего бысть пуст, Сион якоже пустыня бысть, Иерусалим на проклятие:
64:11	дом святый наш и слава, юже благословиша отцы наши, бысть огнем пожжен, и вся славная наша купно падоша.
64:12 См.: 🔗Ис. 62:1	И о всех сих терпел еси, Господи, и молчал, и смирил еси ны зело.